Read lumasaaba 1 Bye Kimiboolo 24 Bible Online

1 Bye Kimiboolo 24 - lumasaaba bible

1 Bye Kimiboolo 24

¹Be lisaaye lya Aroni baakabananisibwamo, khuuloondekhana ni basoleeli beewe, nga nibo bano: Nadabu, Abihu, Eliyezari, ni Isamari.

²Khuurusakho ndi, Nadabu ni Abihu baafwa nga paapa waabwe ashiiliwo umulamu, ni nashiryo sibaaba ni babaana ta. Nashiryo Eliyazari ni Isamari bekyela basaayi.

³Umuyiinga Dawudi, nga ayeetebwakho ni Zadoki umwaana uwa Eliyezeri, ni Ahimeleki umwaana uwa Isamari, baruunga babaandu bano mu bibuli khuuloondekhana ni buraambi bweesi batsya khukhola.

⁴Mu be lisaaye lya Eliyazari mwanyoolikhanamo basaani baakhulu babafuura buukali, khuuminyisa babaama mu lisaaye lya Isamari. Nashiryo be lisaaye lya Eliyezari baabakabananisamo baaraangilisi be tsintsu likhumi na tsisesaba. Ne be lisaaye lya Isamari, baabakabananisamo tsintsu shinaane.

⁵Khukhwaama ni aabawo baaraangilisi be lisaayilo ni babaraangilila bye khukhwisaaya khukhwaama khu mbeka tsyoombi, lwa Eliyazari ni lwa Isamari, buuraambi bwoosi bwakabibwa khuubirira mu khukhupa khaakokha.

⁶Luwalo lutweela abe luloondelela be ntsu ndweela iyamamo Eliyazari, luluundi nalwo ni lululoondelela be ntsu iya Isamari. Shemaya, umusoleeli uwa Nasaneli, niye uwaba umuroni uwe ba Levi, nga kamasina akaronera ibweeni w'omuyiinga, ni baaraangilisi, n'umusaayi Zadoki, ni Ahimeleki umusoleeli uwa Abiyasaari, ni baaraangilisi be tsintsu tsye bakuuka be basaayi ni ba Levi.

⁷Khaakokha khakhaanyoowa khaakwa khu Yehoyaribu, khakhaakhola khabili khaakwa khu Yedaya;

⁸khe khataru khaakwa khu Harimu, khe khaane khu Seyorimu,

⁹khe kharaano khu Malikiya, khe khasesaba khu Miyamini,

¹⁰khe kumusaafu khu Hakozi, khe shinaane khu Abiya,

¹¹khe shisyeenda khu Yeshuwa, khe likhumi khu Shekaniya,

¹²khe likhumi na khatweela khu Eliyashibu, khe likhumi na bubili khu Yakimu,

¹³khe likhumi na butaru khu Hupaha, khe likhumi na bune khu Yeshebeyabu,

¹⁴khe likhumi na buraano khu Biligali, khe likhumi na busesaba khu Imeri,

¹⁵khe likhumi na musaafu khu Heziri, khe likhumi na shinaane khu Hapizezi,

¹⁶khe likhumi na syeenda khu Pesahiya, khe kamakhumi kabili khu Yehezikeli,

¹⁷khe kamakhumi kabili na khatweela khu Yakini, khe kamakhumi kabili na bubili khu Gamuli,

¹⁸khe kamakhumi kabili na butaru khu Delaya, khe kamakhumi kabili na bune khu Mayaziya.

¹⁹Abano buraambi bwaabwe bwaba bwe khukhwakaanisa mu Lisaayilo ly'Omukasya, khuuloondekhana n'isaambo isi kuuka waabwe Aroni aashinanikhisa, naluundi nga Umukasya Wele, n'amulakila.

²⁰Bano nibo baaraangilisi be tsintsu tsyaabwe babaaramire be mu shikuuka sha Levi: lisaaye lya Amuramu, Shubayeli; lisaaye lya Shubayeli, Yehadeyiya.

²¹Mu lisaaye lya Rehabiya, Ishayiya niye umukiboole.

²²Mu lisaaye lya Izarite, Shelomosi; mu lisaaye lya Shelomosi, Yahasi.

²³Babaana ba Heburoni baaba: Yeriya niye umukiboole, Amariya ukhola khabili, Yaziyeli ukhola khataru, ni Yekameyamu ukhola khane.

²⁴Mika abe ali n'umusoleeli bari Mika, Mika waaba n'umusoleeli bari Shamiri.

²⁵Mika waaba ni wandaaye uw'esaani bari Ishiya, Ishiya waaba n'umusoleeli bari Zekariya.

²⁶Basoleeli ba Merari baaba: Mahili ni Musiyi. Umusoleeli uwa Yayaziya bari Beno.

²⁷Basoleeli ba Merari baaba nibo bano: Yayaziya, Beno, Shohamu, Zakuri, ni Ibiri.

²⁸Mu ba Mahili, Eliyezeri s'aabakho ni babaana ta.

²⁹Umusoleeli uwa Kishi bari Yerameeli.

³⁰Basoleeli ba Mushi nibo bano: Mahili, Ederi, ni Yerimosi. Abo nibo be lisaaye lya Levi, nga buli mutweela ali umuraangilisi uwe muuntsu mumweewe.

³¹Buli umuraangilisi uwe intsu ni mutweela khu bandaaye basoleeli bafwiitikho, nabo bakhupa bukokha khukhalawo buraambi bwa buli mutweela, nga balebe baabwe ba Levi, ni baakhola. Shino bashikholela mu moni tsy'omuyiinga Dawudi, ni Zadoki, Ahimeleki, ni baaraangilisi be tsintsu tsye basaayi mu ba Levi.