Read lumasaaba 2 Bye Kimiboolo 1 Bible Online

2 Bye Kimiboolo 1 - lumasaaba bible

2 Bye Kimiboolo 1

¹Solomoni umwaana wa Dawudi, waaba nga ari niye uuli ni bunyala bwoosi mu buyiinga bweewe, lwekhuuba Umukasya Wele, aaba nga ali ni naye, aryo waamwikyelisa khuuba umuundu uwe kamaani kamakali naabi.

²Khu mbuka iyo Solomoni walaanga atweela ba Isiraeli boosi, nga mulimo baakhulu be kamaye babaraangilila bikana, ni babaraangilila bitoondo; naluundi nga mulimo ni baakayi, atweela ni baaraangilisi babaandi be mu Isiraeli boosi, babaraangilila bikuuka.

³Lwanyuma Solomoni wabaraangilila boosi atweela khuutsya khu lukiingi lwe Gibiyoni, isi shiifwo she khukhwisaaya shabatsaka. Baatsyayo lwekhuuba Lisari lya Wele lyaba lili ibweene iyo. Lilyeene lino nilyo lyeesi Musa, umwakaanisi w'Omukasya, ombekha nga bali mu mubiimbi.

⁴Ne nga Dawudi aaba waamala khaale khuureera Isanduuku iye Kamakaambila iya Wele khukhwaama i Kiriyasi-Jeyarimu, nga waakira khaale mu shifwo sheesi aamala khuukiŋoonaŋoonela mu Yerusalemu.

⁵Ne shisheeso sha buroonzi shishakholebwa ni Bezaleli umwaana wa Uri, umwitsukhulu wa Huri, shaba shishiili i Gibiyoni, iburaangisi we Lisari ly'Omukasya. Kila aryo Solomoni nga ali atweela ni babaandu boosi, babuusana iburaangisi walyo, khukhwiireebakho isi Umukasya.

⁶Nga bali abweene awo iburaangisi we Lisari, Solomoni waaniina isi shisheeso sha buroonzi, mu moni ts'Omukasya, waatsya wawaanayo tsisaayilo tsintsoshe shikana shitweela (1,000) khu bweene ukhwo.

⁷Mu shilo isho, Umukasya waabonekhela Solomoni mu marooro, waamureeba ari, “Ukana ise ikhukholele shiina? Loomba kane ishikhuwe.”

⁸Solomoni weelamo Wele ari, “Iwe wokyesanisa khuukana khuukali ate nga khwe kamaani isi paapa wase Dawudi, ne bona ari waakholile ise khukhwiila mu bikyele byeewe nga umuyiinga.

⁹Ni aluno, O Umukasya Wele, ikhuloomba ndi wolelese shisuubiso shoowo sheesi wakholela paapa wase Dawudi. Lwekhuuba bona ari waantsikyelisile ise khuuba umuyiinga we babaandu bano babaali baakali naabi, luundi babaamalataane oosi nga lifukhuulu lye khu shibala!

¹⁰N'umbe ise kamakhula ni kamakyesi, nio inyalise khuubaraangilila buulayi. Akhali isho, naanu unyalisa khuuwula babaandu boowo bano babaali baakali naabi baryo!”

¹¹Wele naye weelamo Solomoni ari, “Lwekhuuba isho nisho sheesi ufuurire khuukana naabi mu mwoyo kwoowo, uryo waalekha khuloomba bibiindu biikali, namwe buyiindifu, namwe shiriifwa shikali, namwe khuuhela khwe baasiku boowo ta, naluundi iwe siwaloombile khuuwaangaala naabi ta. Ne waaloombile uri ufune kamakhula ni kamakyesi ke khuunyalisa khuuraangilila babaandu baase beesi ikhuwaambisile buulayi.

¹²Ilala kamakhula ni kamakyesi inakhuwa. Ne khuulooselakho, kane ikhuwe ni buyiindifu, ni bibiindu biikali, ni shiriifwa shikali, byeesi umuyiinga yeesi uwabawo akhaafunatsakakho ta, namwe silibawo na mutweela uuli bifunakho lwanyuma lwoowo ta.”

¹³Lwanyuma lwa byoosi, Solomoni waarurayo mu shifwo she khukhwisaayilamo i Gibiyoni, weelayo i Yerusalemu. Ibweene iyo waaraangilila ba Isiraeli boosi.

¹⁴Solomoni waarawo bye khukhwiliinda biikali nga mulimo; kamakaali shikana shitweela ni bitoondo bine (1,400), ni tsiŋwaaŋwa kumukaanda mutweela ni bikana bibili (12,000), isi aareka mu biriimba bibiindi, ni kakaandi waakareka aambi ni naye umweene mu Yerusalemu.

¹⁵Mu mbuka iye buwuli bwa Solomoni nga umuyiinga wa Isiraeli, yabawo ifeetsa ngali atweela ni zaabu ngali buli aandu oosi mu Yerusalemu, byafwaana busa nga kamabaale ka busheele busa. Ni khuutubakho ni kimisaala kya sida kyaaba nga kili mikali naabi, kyafwaana busa nga kimisaala kimisikamooli kya busheele busa.

¹⁶Tsiŋwaaŋwa tseesi Solomoni aaraambisatsaka tsakulibwa khukhwaama mu Misiri ni mu Kilikiya. Baasubusi b'omuyiinga baaba bakula bino byoosi khukhwaama i Kilikiya khu beeyi iyaakhila.

¹⁷Khu mbuka iyo kamakaali khukhwaama i Misiri, abe buli litweela balikula nga baraambisa bisiintsa bitoondo bisesaba (600) bye feetsa, na buli ŋwaaŋwa ndweela nga bakikula khu bisiintsa shitoondo shitweela ni kamakhumi karaano (150) bye feetsa. Baryo nabo baakulisa tsiŋwaaŋwa tsino ni kamakaali isi umuyiinga we ba Hiti n'uwe ba Siriya.