Read lumasaaba 2 Bye Kimiboolo 11 Bible Online

2 Bye Kimiboolo 11 - lumasaaba bible

2 Bye Kimiboolo 11

¹Lwanyuma nga umuyiinga Rehobowamu woolile i Yerusalemu, waakhalawo khuutsya khwibwaakala Isiraeli nio anyale khukhwikobosela shibala shoosi. Aryo kila abuusanisa babaandu be mu shikuuka sha Benyamini ni sha Yuda atweela, boosi nga boola babaandu kumukaanda mutweela ni bikana shinaane (18,000).

²Ne ilomo y'Omukasya yeetsila umuŋoosi Shemaya

³khuutsya aboolele umuyiinga Rehobowamu, na buli muundu yeesi uwe mu Yuda ni mu Benyamini ari,

⁴“Umukasya ali khuubarewula ari, mukhatsya mu busoolo khuusoolanisa babaandayeenywe be mu bikuuka bye ngaaki ta. Buli mutweela ni eleyo ingo weewe. Lwekhuuba Umukasya umweene niye ukhalilewo ari shishiindu shino shikholebwe shiryo.” Baryo Rehobowamu atweela ni liiye lyeewe baawuliilisa likono ly'Omukasya, balekha khutsya khusoolanisa Yerobowamu ni liiye lyeewe ta.

⁵Aryo Rehobowamu waarama mu Yerusalemu, wombekha biriimba nga arakho kamatikiiyi, lwe khukhwiliinda khwe linaambo lyaabwe.

⁶Ombekha biriimba nga; Besilehemu, Etamu, Tekowa

⁷Beti-Zuri, Soko, Adulamu,

⁸Gasi, Maresha, Zifu,

⁹Adorayimu, Lakishi, Azeka

¹⁰Zora, Ayijaloni, ni Heburoni. Biriimba bino byoosi byeesi arakho kamatikiiyi byaba bili mu Yuda atweela ni Benyamini.

¹¹Ombekha kamatikiiyi kaaba kamakumu naabi. Aryo mu buli shitweela khu nibyo waramo baselikhale baakhulu, waarakamwo ni birara bye biilyo, kamafura ke kuusaala ku olivu, ni viini.

¹²Mu biriimba byeene waabiikhakamwo tsingabo, ni kamafumo, nga bye khukhwiliinda. Shiryo shikuuka sha Yuda ni Benyamini byaaba nga bili aasi e bunyala bweewe.

¹³Ne basaayi ni ba Levi babaaba nga bamenya mu bikuuka bye ngaaki bya Isiraeli, beetsa mu Yuda, baaba khu lubeka lwa Rehobowamu.

¹⁴Baryo baalekhaka tsiingo tsaabwe ni bye buyiindifu bwaabwe ingaaki, beetsa mu Yuda atweela ni Yerusalemu, lwekhuuba Yerobowamu, atweela ni bayiinga babaandi babeelawo sibaakana khuufukiilisa ba Levi khukhwakaanisa nga basaayi b'Omukasya ta.

¹⁵Yerobowamu eroborera basaayi babeewe, khuuba nga nibo babaakaanisa khu byeeso byeesi umweene arawo mu Isiraeli, ni mu bifwo bibiindi byeesi ombekha lwe khukhwisaaya bifwaani bye tsimbusi ni tsimoosi.

¹⁶Ne babaandu babaaba nga baakhalilawo ilala khukhwiisaayatsaka Umukasya Wele wa Isiraeli, nga baakuuka baabwe ni baakholatsaka, baaloonda khu basaayi ni ba Levi, beetsa i Yerusalemu, khuwaanatsakayo tsisaayilo isi Umukasya.

¹⁷Khuumala imbuka iye kimiiko kitaru, baaba nga bamenya mu Yuda. Baaba nga baraambila atweela ni Rehobowamu, baaba nga bamuwulila nga ni baakhola isi Dawudi ni Solomoni.

¹⁸Rehobowamu aayila umukhasi Mahalati, umukhaana wa Yerimosi uwaba umwaana wa Dawudi, ni maayi weewe aaba Abihayili, umukhaana wa Eliyabu, uwaba umwaana wa Yese.

¹⁹Umukhasi uyu waasaalila Rehobowamu babaana; basooleli bataru, nga nibo Yewushi, Shemariya ni Zahamu.

²⁰Lwanyuma ndi Rehobowamu waayila umukhasi ukuundi isi baalaanga bari Maaka, umukhaana wa Abisalomu. Uyu naye waamusaalila babaana basooleli nga nibo Abiya, Atayi, Ziza, ni Shelomiti.

²¹Bakhasi boosi atweela beesi Rehobowamu aayila baaba likhumi na shinaane, waayila ni bakhasi babaandi kamakhumi kasesaba. Bano baamusalila babaana basooleli kamakhumi kabili na shinaane, ni bakhaana kamakhumi kasesaba. Ne mu bakhasi beewe abo boosi, Rehobowamu afuura khuukana naabi Maaka.

²²Aryo Rehobowamu waaroboramo Abiya nga niye umusooleli isi aasaala ni Maaka, uwaba umukhulu mu baandaaye boosi, waamukhola khuuba nga niye wuutsya khumwiilila mu bikyele nga umuyiinga.

²³Rehobowamu waaba ni kamakyesi khuubona ari aroborakho umusooleli weewe mutweelatweela, waamura mu buli shiriimba shishabakho kamatikiiyi, mu Yuda ni mu Benyamini. Aryo waabakabila bibiraambisibwa byoosi, naluundi waakhakakho naabi khuubona ari afunila buli mutweela khu nibo umukhasi.