Read lumasaaba 2 Bye Kimiboolo 12 Bible Online

2 Bye Kimiboolo 12 - lumasaaba bible

2 Bye Kimiboolo 12

¹Lwanyumakho nga Rehobowamu waamalile khuuyila bunyala bwe buyiinga bweewe bwoosi, niye atweela ni babaandu be mu Yuda boosi, bakhalawo balekha khuuloondelela kamakaambila k'Omukasya ta.

²Isho shaakila mu mwiiko kwe kharaano, kwe buwuli bwa Rehobowamu, Umukasya waabawa shitaambiso lwe bumiinyi bwaabwe, nga afukiilila umuyiinga Shishaka we Misiri khukhwiitsa khukhwiibwaakala Yuda.

³Shishaka yuno nga eetsa khukhwiibwaakala, eetsa ni liiye lilyoola shikana shitweela ni bitoondo (1,200) bibili lye kamakaali, ni baselikhale kimikaanda kisesaba (60,000) babaakyeendela khu ŋwaaŋwa. Shishaka eetsa ni baselikhale babaandi babaakyeendela khu bikyele busa, ne nga abe sibabalikha ta. Bano nabo baaba ba Misiri nga baama i Libiya, Sukiiti, ni Esiyopiya.

⁴Aryo webwaakala, weyilila biriimba bya Yuda bibyabakho tsimako byoosi, wakhuumba waatsya woola ni Yerusalemu weene.

⁵Khu mbuka yino, Rehobowamu ni baaraangilisi babaandi ba Yuda baaba nga baatimiile i Yerusalemu, khukhwilukha khukhwiibwaakala khwa Shishaka. Ne ni baaba nga bali i Yerusalemu iyo, umuŋoosi Shemaya weetsayo waababoolela ari, “Umukasya aloma ari lwekhuuba inywe mwamwantsukha mwamulekha, shiikila naye abaantsukhile waabalekha. Umukasya atsya s'atsya khuubayeeta khuusoolanisa Shishaka ta.”

⁶Lwanyuma lwe khuwulila ilomo iyo, umuyiinga Rehobowamu ni baaraangilisi tsana babaaramile beewunamila nga kumutaambo kwabawaambile lweesho sheesi baakhola, baaloma bari, “sheesi Umukasya ali khukhola shili shaŋali shisheene.”

⁷Ne Umukasya n'abona nga beewunamiile lwe kumutaambo, waalomela Shemaya luundi ari, “Naaboone nga babaandu ba Yuda beewunamiile ni kumutaambo lwe bibyoonako byaabwe, nashiryo ise singene imbahesele ilala ta. Nashiryo kane imbalekheleyo imbuka ye khuubawonesa. Singene ifukiilise Shishaka khuubokyesanisa burafu bwase bwoosi ta.

⁸Ne khuubawula kane abasoolanise abawule, nio nabo bamanye nga ni shili shilayi khukhwakaanisa ise Umukasya, khufuurisa khukhwakaanisa baawuli be mu shibala.”

⁹Aryo umuyiinga Shishaka weetsa webwaakala Yerusalemu, waanuulamo bibiindu bibyaba bye buyiindifu buukali khukhwaama mu Liisaayilo Liikhulu ni khukhwaama mu lubili. Aryo waayililamo ni tsingabo tse zaabu tseesi Solomoni aakholesa.

¹⁰Lwanyuma mu shifwo sh'etso, Rehobowamu waakholayo tsingabo tsitsiindi khukhwaama mu buroonzi, waatsiwa baaliindi be khu shilibwa khuuliinda byoosi buulayi.

¹¹Abe buli lweesi Rehobowamu atsiila mu Liisaayilo Liikhulu ly'Omukasya, baaliindi abe basuta tsingabo tsaabwe. Ne lwanyuma lwayo abe batsisuta batsisayo mwibiikhilo lyatso.

¹²Ne lwekhuuba Rehobowamu ewombeekha umweene isi Umukasya, isho shaakila Umukasya wayeeta Yuda shalekha khukhwoonakisibwila ilala ta. Ni khu mbuka iyo, bibiindu byatsiila Yuda buulayi.

¹³Rehobowamu aarakikha khuuwula nga umuyiinga nga ali ni kimiiko kamakhumi kane na mutweela. Aryo waaba umuyiinga we kamaani naabi mu Yerusalemu. Weeloosela khuuwula nga umuyiinga mu Yerusalemu khuumala kimiiko likhumi na musaafu, nga nisho shiriimba sheesi Umukasya aarobora khuumwisaayilamo. Lisiina lya maayi wa Rehobowamu lyaba bari Naama uwaba aama i Amoni.

¹⁴Ne shonyene ndi aakhola buubi buukali mu moni ts'Omukasya, waalekha khuwuliilisa byeesi Umukasya akana ta.

¹⁵Buuraambi bwa Rehobowamu bubuundi bwoosi, bweesi aakhola nga ali umuyiinga, khukhwaamila ilala khu khurakikha khukhwoolesa khu ntsakamo, byoosi byaronebwa byaamayo bye baŋoosi baabili nga nibo Shemaya ni Ido. Khu mbuka iye buuwuli bwa Rehobowamu buno, Rehobowamu ni Yerobowamu baaba nga basoolana buli mbuka.

¹⁶Rehobowamu n'ola khuufwa, baamusiikha aambi ni baakuuka beewe mu Yerusalemu, mu shiriimba sha kuukawe Dawudi. Aryo umusooleli weewe Abiya weela mu bikyele byeewe nga umuyiinga.