Read lumasaaba 2 Bye Kimiboolo 13 Bible Online

2 Bye Kimiboolo 13 - lumasaaba bible

2 Bye Kimiboolo 13

¹Mu mwiiko kwe likhumi na shinaane kwe buyiinga bwa Yerobowamu, nimwo mweesi Abiya ekyela umuyiinga wa Yuda.

²Aryo Abiya waawula nga asiintsiila mu Yerusalemu khuumala kimiiko kitaru. Lisiina lya maayi weewe abe bari Mikaaya, umukhaana wa Uriyeli khukhwaama i Gibeya. Lwanyumakho abalukhawo busoolo akari a Abiya ni Yerobowamu.

³Aryo waaroborayo baselikhale baasoolani baalayi baboola kimyeeka kine (400,000), waatsya mu busoolo, naye Yerobowamu waaroborayo baaselikhale baasoolani baalayi baboola kimyeeka shinaane (800,000), weetsa khuumwakaanana.

⁴Nga liiye lya Yuda lyoolile mu shibala she tsingoongo sha Efurayimu, Abiya waaniina khu lukiingi Zemarayimu, waakuukuula isi Yerobowamu ni ba Isiraeli boosi ari: “Rekeeresa iwe Yerobowamu, atweela ni ba Isiraeli mweesi!

⁵Iwe waakhushimanya uri Umukasya Wele wa Isiraeli aakhola indakaano ni Dawudi ikhanyala yaarusiwawo ta[2], nga amuwa niye atweela ni babetsukhulu beewe buyiinga bwa Isiraeli biilo ni biilo?

⁶Ne imbuka ni yabirawo, iwe Yerobowamu, umwaana wa Nebati, uwaba busa umwakaanisi w'omuyiinga Solomoni, waamulyamo luwomelo waamumiinyaalila.

⁷Lwanyuma nga Rehobowamu wekyelile umuyiinga, iwe webuusila babaandu babaakhalimo ta, waamiinyaalila Rehobowamu, uwaba nga ashiili mwaana, ukhaanyala khuukhushingilila iwe ta.

⁸“Ari bona iwe waambaasa uri unyala waasoolanisa buyiinga bweesi Umukasya awaambisa babetsukhulu ba Dawudi. Liiye lyoowo lili liikali naabi, ne bona iwe uli ni bifwaani bye tsimoosi tseesi wakhola khukhwaama mu zaabu khukhwiisaaya.

⁹Iwe wawoona basaayi b'Omukasya, nga nibo babetsukhulu ba Aroni, atweela ni ba Levi beene. Lwanyuma mu shifwo shaabwe weroborera babaandu baabusheele busa khuuba basaayi, nga kamanaambo kakaandi ni kakhola. Buli umuundu yeesi uwiitsa khukhwiiwaanayo nga wareerire iwuunwa, namwe ni kamasheese musaafu khu sheeso, ekyelilawo umusaayi we ba wele boowo abo!

¹⁰“Ne ifwe Umukasya niye Wele weefwe! Ifwe khwakhumwantsukhakho ta! Babetsukhulu ba Aroni babeene nibo babaashakaanisa nga basaayi, ni ba Levi babeene nibo babaashibayeetakho kumulimo ukwo.

¹¹Nibo bawaanayo tsisaayilo tsintsoshe, ni khukhwoosha bubaane isi Umukasya, buli kumutikhinyi ni angoloobe. Bayila kumukaati kumukhosefu, baakura khu meetsa ikhosefu iyakholebwa khukhwaama mu zaabu, bawaambisaka ni itaala ili khu ntseko iye zaabu buli angoloobe. Ifwe khwaloondelela kamakaambila k'Omukasya Wele weefwe. Ne iwe wamwaantsukha, wamulekha.

¹²Ari manya uri Wele umweene niye ali khu lubeka lweefwe. Umweene kane akhuraangilile ifwe mu busoolo buno, nga basaayi beewe nibo babaafuura tsikhoombi khukhwiitsa khuubasoolanisa inywe. O baandu ba Isiraeli, mukhakhakakho mwasoolanisa Umukasya Wele isi baakuuka beenywe beesaayatsaka ta, lwekhuuba simunyala mwamuwula ta.”

¹³Khu mbuka iyo nga Abiya ashikanikha, Yerobowamu waaba nga waamalile khaale khusiindikha batweela khu liiye lyeewe mu mbola busa, khuutsya khwiibwaakala babaandu ba Yuda nga babaamila inyuma, ne babaandi waabalekha khukhwiibwaakala nga babaamila ibweeni.

¹⁴Ne ba Yuda ni baanyukanyuka baabona nga baasiku balikho babebwaakala tsimbeka tsoombi, inyuma ni bweeni, beelootsela Umukasya. Lwanyuma basaayi baafuura tsikhoombi tsaabwe,

¹⁵ni baselikhale ba Yuda benyusa luwuungu lwe buusoolo. Baryo nga bakhupa luwuungu ulwo, Abiya waaraangilila baselikhale ba Yuda, Wele waawula Yerobowamu atweela ni liiye lye ba Isiraeli lyoosi.

¹⁶Liiye lye ba Isiraeli lyoosi lyaatitukha. Aryo Umukasya waabawaanayo mu bunyala bwe baselikhale ba Yuda baabawula.

¹⁷Abiya ni baselikhale beewe baakhoonya babaandu baakali naabi, boosi atweela beera baselikhale ba Isiraeli baboola kimyeeka kiraano (500,000) khu shifukhu sheene isho shonyene.

¹⁸Baryo musaambo iyo, ba Yuda baawula ba Isiraeli lwekhuuba beeyikina Umukasya Wele we baakuuka baabwe.

¹⁹Abiya atweela ni liiye lyeewe beeloosela khukhwiibwaakala liiye lya Yerobowamu, baatsya baawaambaka bitweela khu biriimba byeewe nga nimwo mulimo Beseli, Jeshana ni Efuroni, ni khutubaasakho bibyaalo bibibotokhelelewo.

²⁰Yerobowamu umuyiinga wa Isiraeli s'elamo luundi khuufuna kamaani mu biifukhu byoosi byeesi Abiya abeela nga ali umuyiinga. Aryo Umukasya waabonabonisa Yerobowamu, lwanyuma waafwa.

²¹Ne Abiya niye weeloosela busa khuuba ni kamaani kamakali. Waayila bakhasi likhumi na bane, waasaala ni nabo babaana basooleli kamakhumi kabili na babili, ni bakhaana likhumi na basesaba.

²²Bibiindu byoosi byeesi Abiya aakhola, ni neebyo byoosi byeesi aakanikha, byaronebwa mu byaamayo bya Ido umuŋoosi.