Read lumasaaba 2 Bye Kimiboolo 14 Bible Online

2 Bye Kimiboolo 14 - lumasaaba bible

2 Bye Kimiboolo 14

¹Aryo umuyiinga Abiya nga n'afwa baamusiikha mu ŋani aambi ni baakuuka beewe mu shiriimba sha Dawudi. Lwanyuma umusooleli weewe Asa weela mu bikyele byeewe nga umuyiinga. Mu mbuka yeewe, shibala sha Yuda shabakho mu lukoosi khuumala kimiiko likhumi.

²Shaba shiryo lwekhuuba Asa aakhola bibiindu biilayi luundi bikwalaafu bibikhoyesa Umukasya Wele weewe.

³Aafuniaakaka bibyeeso byeesi besaayilakho ba wele be kamanaambo, waakhupakaka bisiindi bye kamabaale, waamenyulaka ni kimirongoolo kyeesi baaraambisa khukhwiisaayilakho wele umukhasi Ashera.

⁴Lwanyuma waalakila babaandu boosi be mu Yuda khukhwiisaaya Umukasya Wele we baakuuka baabwe, ni khuuloondelela kamakaambila keewe ni biilakilo byeewe.

⁵Asa warusakilawo ilala bibyeeso bye khukhwiisaayilakho, atweela ni bibyeeso bye khukhwookhelakho bubaane khukhwaama mu buli shiriimba shoosi she mu Yuda. Lweesho sheesi akhola, buyiinga bweewe bwaaba mu lukoosi khu mbuka yeewe.

⁶Mu miiko ikyo mweesi baabeela mu lukoosi, Asa wanyalisa khukhwoombekha kamatikiiyi khu biriimba bya Yuda. Niye s'afunakho imbuka iye busoolo ta, lwekhuuba Umukasya umweene niye uwamuwa lukoosi.

⁷Asa waalomela babaandu ba Yuda ari, “Khakhwombekhe biriimba lwanyuma khwombekhe kamatikiiyi khuubibotokhelela, ni kiminaala, ni bilibwa bibikhomekhebwa ni kimibya. Liiswa lino lili lilyeefwe, lwekhuuba ifwe khwaloondelela Umukasya Wele weefwe. Ni naye ari bona wakhuweele lukoosi khu mbeka tsoosi khukhwaama isi baasiku beefwe.” Baryo babaandu baakhola byoosi nga n'abalomela, boombekha kamatikiiyi, baaba buulayi.

⁸Umuyiinga Asa aaba ni baselikhale nga boola kimyeeka kitaru (300,000) khukhwaama mu shikuuka sha Yuda mwoonyene nga baayaabalila tsingabo ni kamafumo; ni baselikhale babaandi kimyeeka kibili ni kimikaanda shinaane (280,000) nga bano baama mu shikuuka sha Benyamini shonyene, nga nabo baayaabalila buyiingo ni bufumo. Bano boosi baaba basaani baamanyilifu naabi mu bye busoolo.

⁹Aabawo umusaani umu Esiyopiya mutweela, nga lisiina lyeewe bari Zera, waaraangilila baselikhale baboola ifuuma ndweela (1,000,000), ni kamakaali bitoondo bitaru, beetsa khukhwibwaakala Yuda, baakhuumba boola i Maresha.

¹⁰Asa naye weetsa khuumwakaanana ibweene iyo, baryo boombi berekekha khusoolanila mu litila lya Zefata, aambi ni Maresha.

¹¹Lwanyuma Asa weelootsela Umukasya Wele weewe ari, “O Umukasya, mbaawo na mutweela uuli nga iwe, khuuyeeta abo babaakhali ni kamaani, khuunyalisa khuuwula abo babaali ni kamaani ta. Ni nashiryo, ifwe khweyikinile iwe wenyene, O Umukasya, khuukhuyeeta. Ifwe khuli khuutsya khuusoolanisa liiye lino lye kamaani, khuuweesa lisiina lyoowo shiriifwa! O Umukasya, ifwe khwaamanyiile ilala khuri, iwe uli Wele weefwe, mbaawo unyala waakhuwula na khari ta.”

¹²Aryo Umukasya waayeeta Asa ni liiye lyeewe lya Yuda khuuwula ba Esiyopiya, baryo baasiku boosi baatitukhawo.

¹³Ne Asa ni liiye lyeewe baatimisa ba Esiyopiya khuutsya khwoolela ilala i Gera. Baryo ba Esiyopiya beeribwa luukali, yaataambawo babaanyala khuuramawo nga baalamu khuusoolana ta. Baryo boosi baahela nga beeribwa n'Umukasya ni liiye lyeewe. Baselikhale ba Yuda baayaaya bibiindu biikali naabi bibyaba bye ba Esiyopiya.

¹⁴Nga boolile i Gera, bebwaakala biriimba byoosi bibyaba mu shifwo isho, lwekhuuba babaandu baayo baawulila byoosi bibyakholebwa, buuri bw'Omukasya bwabawaamba naabi. Baryo baselikhale ba Yuda babawula boosi, basutaka bibiindu bye buyiindifu biikali naabi byeesi baakana khukhwaama mu biriimba bino.

¹⁵Baatsya bebwaakala kamasari mweesi babaayi baaba bamenya, bawaambaka kamasheese kamakali, ni tsiŋamila. Lwanyuma lwayo beelayo i Yerusalemu.