Read lumasaaba 2 Bye Kimiboolo 16 Bible Online

2 Bye Kimiboolo 16 - lumasaaba bible

2 Bye Kimiboolo 16

¹Mu mwiiko kwe kamakhumi kataru na kisesaba kwe buuwuli bwa Asa, Baasha umuyiinga wa Isiraeli waatsya webwaakala Yuda, lwanyuma woombekha kuutikiiyi khu Rama, nio ilekhe khubawo umuundu yeesi unyala khukhwiinjila namwe khuurura mu buyiinga bwa Asa mu Yuda ta.

²Lwanyuma nga Asa waawuliile aryo, waabukula izaabu ni feetsa khukhwaama mwibiikhilo lye mu Liisaayilo Liikhulu ly'Omukasya, ni khukhwaama mu lubili lw'omuyiinga. Bino byoosi waabyakaanisa isi Benihadadi, umuyiinga wa Siriya, abe umenya i Damasiko, nga amurumila buurume buno ari,

³“Khayo ifwe fweembi khwiise kumukhono khu ndakaano iye lukoosi, nga ni shaba akari a paapa woowo ni paapa wase. Ni nashiryo, bona ise ndi khuukhwakaanisa iwe shiwaanwa she izaabu ni feetsa. Ikhuloomba utsye ufuniaake indakaano iliwo akari owo ni Baasha umuyiinga wa Isiraeli, nio manya shaamuwanyiinya khuurura mu shibala shase.”

⁴Aryo Benihadadi waafukiilisana ni sheesi Asa amuloomba, waarumana baakhulu be liiye lyeewe khuutsya khwiibwaakala biriimba bya Isiraeli. Baryo baatsya baawaamba biriimba nga Ijoni, Dani, Abeli Mayimu, ni khutubakho biriimba bye mu Nafutaali bibyabamo birara.

⁵Aryo Baasha n'awulila bino, waakamisa kumulimo kwe khukhwombekha khu shiriimba sha Rama.

⁶Lwanyuma umuyiinga Asa waalakila babaandu ba Yuda boosi khuutsya basutake kamabaale ni tsimbaawo tseesi Baasha aba ali khuuraambisa khukhwombekha Rama. Aryo naye waatsya wakaraambisa khukhwombekha biriimba bya Geba ni Mizipa.

⁷Ibyo nga byaamalile khuukholekha biryo, Hanani umuŋoosi weetsa isi umuyiinga Asa waamulomela ari: “Lwekhuuba iwe weyikinile naabi umuyiinga wa Siriya, mu shifwo she khukhwiyikina Umukasya Wele woowo, ari iwe s'ulibakho ni khabi iye khuuwula liiye lye ba Siriya ta.

⁸Iwe s'ushebulila nga liiye lye ba Esiyopiya ni ba Libiya lyaba liboofu, luundi lya kamaani luukali, nga bali ni kamakaali ni babaakyeendela khu ŋwaaŋwa? Ne lwekhuuba iwe weyikina Umukasya, niye akhuyeeta iwe wanyalisa khuukawula koosi.

⁹Tsimoni ts'Omukasya tsikyeenda tsiwunguusa mu shibala shoosi, nga tsiweentselesa khuuwa kamaani abo babaakyeenda nga bali babeeyikinwa mu myoyo kyaabwe isi niye. Ne ari bona iwe wakholile shishiindu she busilu busa. Ne lwe shisheene isho, khukhwaama ni shaleelo, buyiinga bwoowo sibutsya khuuwamo busoolo ta.”

¹⁰Ne Asa n'awulila shishiindu shino, lirima lyamuniina khulwa Hanani, shikila amuwaamba wamutuuma mu mapuusu. Khukhwaamila ni abweene awo, Asa warakikha khuubirisaka buubi batweela khu baandu beewe.

¹¹Bibiindu byoosi byeesi Asa aakhola khukhwaama khu khurakikha khukhwoolela ilala ibumaliiliso, baabirona mu Shiitabo she Bibyaamayo bye Bayiinga ba Yuda ni Isiraeli.

¹²Mu mwiiko kwe kamakhumi kataru na syeenda kwe buwuli bweewe, Asa afuna buulwaale bwe mu shikhaandakilo, bubwaba buubi naabi. Ne niye walekha khukhwiyikina Umukasya lwe buyeeti ta, weyikina naabi bakaangi beewe.

¹³Aryo waafwa mu mwiiko kwe kamakhumi kane na mutweela kwe buwuli bweewe.

¹⁴Baamusiikha mu ŋani yeewe isi umweene aabeetsa mu lwaanda, mu shiriimba sha Dawudi. Baryo baamwaalisa khu shitaanda khweesi baaba baareere bibiwunya buulayi, ni kamafura kakaandi nako kakaawunya buulayi, nga bamusiikha. Lwanyuma babaandu baasa kumulilo kwe kamaani naabi lwe khuumushebulila.