Read lumasaaba 2 Bye Kimiboolo 19 Bible Online

2 Bye Kimiboolo 19 - lumasaaba bible

2 Bye Kimiboolo 19

¹Yehoshafati waakobolayo ni lukoosi ingo weewe mu Yerusalemu.

²Ne umuŋoosi Yehu, umusooleli wa Hanani waatsya khumwakaanana. Lwanyuma waalomela Yehoshafati ari, “Lwashiina iwe ukhola buusaale naluundi waayeeta abo babaali baboonaki, waakana abo babaabiyila Umukasya? Ni lwe lomo yino, Umukasya Wele waakhukhalaliile iwe naabi!

³Ne shonyene ndi, byoosi sibili biibi ta. Lwekhuuba iwe wahesela ilala kimisiindi kyeesi besaayilakho Ashera, wele umukhasi, waakimalilawo ilala mu shibala. Shino shokyesanisa shiri uwuliilisa byeesi Wele akana.”

⁴Yehoshafati amenyatsaka mu Yerusalemu, ne abe atela khukhwaamayo n'atsya nga akyeenda mu buyiinga bweewe bwoosi, khukhwaamila ilala i Berisheba, khuutsya khwoola khu lubeka lwe ngaaki mu shibala she tsingoongo sha Efurayimu. Shino ashikholatsaka lwe khuukana khukhwiisatsakamo babaandu kamaani, nga akana bakobole isi Umukasya Wele we bakuuka baabwe.

⁵Aryo waaba nga aroboraka baakayi mu biriimba bibilikho kamatikiiyi byoosi mu Yuda.

⁶Kila abalomela ari, “Mwaakha khukhwimenielesa naabi nga mukaya babaandu, lwekhuuba babaandu bano bali b'Omukasya. Mushebulile muri mukaya khusangaasa Wele ni akhuba khusangaasa babaandu ta. Niye umweene kane abatsake ni nanywe mu buli misaango kyoosi kyeesi mukaya.

⁷Ni lwelomo iyo, ni muryatsake Umukasya, mukaye kimisaango ni bwaŋali bwoosi. Lwekhuuba Wele weefwe niye s'akana bukhali bwaŋali, namwe khukhwikhupila luwaande lutweela, namwe khuulya iwoongo ta.”

⁸Mu Yerusalemu, Yehoshafati waaroborayo ba Levi baalala, ni basaayi, atweela ni baakhulu be tsiingo mu Isiraeli, waabarawo khuukaya kimisaango kya buli saambo nga baakayi khulw'Omukasya. Baryo baaba ni shitsoloŋo shaabwe shikhulu mu Yerusalemu.

⁹Kila abawa biilakilo bino ari, “Mwaakha mukhole byoosi mu bwaŋali nga murya Umukasya, naluundi mushikhola ni kumwoyo mutweela.

¹⁰Babaandu kane bareeratsake kimisaango kyaabwe isi muli nga kiwaambakana ni babandaayaabwe babaamenya mu biriimba, nga kili kya buli saambo, khuufuniaaka kamakaambila ni biilakilo, ni khuutubakho kye bubwiiri. Mwaakhiile khuuwotsesa kimisaango kino, lwanyuma mureewule babaandu khuulekha khwooneka isi Umukasya ta, shishinyala shaamukhalasa luundi waabawa shitaambiso. Mushebulile muri nga mwaaloondeleele biilakilo bino, singene ibewo shikosi shoosi mu buli shiindu shoosi shishikhaakholikhe ta.

¹¹Umusaayi ufuura buukhulu Amariya, niye ukhaabe nga akhalawo ilomo iyaakamayo mu misaango kyoosi kikiwaamba khu Mukasya. Ni Zebadiya umusooleli wa Ishimaeli, umuraangilisi we shikuuka sha Yuda, niye ukhaabe nga akhalawo ilomo iyaakamayo mu misaango kikiindi kyoosi. Ba Levi babaaramile, bakharaambe nga baayeeti beenywe khuubona bari kimisaango kitsya buulayi. Ingana mwiilemo kamaani nga mukhola kimilimo kyeenywe, naluundi inoomba ndi khali Umukasya abeele ni naabo babaali babeelama.”