Read lumasaaba 2 Bye Kimiboolo 20 Bible Online

2 Bye Kimiboolo 20 - lumasaaba bible

2 Bye Kimiboolo 20

¹Lwanyumakho, baselikhale ba Mowaabu ni ba Amoni, atweela ni ba Mewuni, balaangilila busoolo khu Yehoshafati.

²Aabawo baarume babeetsa baboolela Yehoshafati bari, “Iliwo liiye lye kamaani lilyeene khukhwaama mu Edomu, she bukwanyaanga we Nyaantsa. Liiye lino lilikhukhwiitsa khukhwiibwaakala shibala sheefwe, ni na ari baabusaniile i Hazazoni-Tamari” (Lisiina lye shiifwo shino liliindi bari Engedi).

³Shino shaakila Yehoshafati waarya luukali naabi, kila atsya khukhwiireebakho isi Umukasya shiina she khuukhola. Aryo walaangilila khuubuya intsala mu shibala sha Yuda shoosi, khukhwookesanisa kumutaambo.

⁴Lubaluba, babaandu boosi baarurakayo mu biriimba byaabwe, baatsya baabuusanila mu Yerusalemu, khuuloomba buyeeti khukhwaama isi Umukasya.

⁵Awo nga buli muundu yeesi uwe mu Yuda ni mu Yerusalemu woolile khu Liisaayilo Liikhulu ly'Omukasya, Yehoshafati weetsa wemikha iburaangisi waabwe mu lwaanyi lushaakha.

⁶Lwanyuma kila aloomba ari, “O Umukasya Wele we bakuuka beefwe, iwe wenyene niye uli ni khukhwisaayibwa, naluundi iwe umenya iyo mwikulu nga uwula kamanaambo koosi ke mu shibala. Iwe uli uwe kamaani kamakali naabi, mbaawo unyala wemikha khuukhuwula iwe ta.

⁷Iwe Wele weefwe, wamweene watimisa kamanaambo kakaaba kamenya mu shibala shino, nga babaandu boowo ba Isiraeli bashiili khwoola ano ta. Uryo liiswa lino walikabila babetsukhulu b'omusaale woowo Iburayimu, khuuba lilyaabwe biilo ni biilo.

⁸Bakuuka beefwe beetsa baafuna bubwikhalo muno, lwanyuma baakhwoombekhela Lisaayilo lino Likhulu, khuukhwisaayilamo lisiina lyoowo.

⁹Baashifukiilisila ilala bari nga yaabeelewo bukosi bwoosi bubuuli nga busoolo, namwe buulwaale, namwe intsala, nga byaabeetsiile, banyala beetsa baakhuloombela iwe khu Lisaayilo lino Likhulu, ni nawe uryo waabawulila khuuloomba khwaabwe, lwanyuma waabawonesa khukhwaama mu bukosi bwoosi.

¹⁰“Ne ari bona kamaye ke ba Amoni, ni Mowaabu, ni Edomu (be khu lukiingi lwa Seya) balikho beetsa khukhwibwaakala! Ate nga ako niko kamanaambo keesi iwe ukhaafukiilisa bakuuka beefwe khukebwaakala nga baama mu Misiri ta. Nisho shishakila baatsya nga bakabirirakho busa khu ndulo, baalekha khukahesa ta.

¹¹Ari bona isaambo isi balikho bakhwiliyasamo ifwe! Lwekhuuba balikho bakana khuukhutuuma ifwe ibulafu we liiswa lyeesi iwe wamweene wakhuwaambisa ifwe nga buusikha bweefwe.

¹²O Wele weefwe, iwe singene ubasoolanise ta? Ifwe sikhuli ni kamaani kakaanyala khuusoolanisa liiye lino lye kamaani lilikana khukhwibwaakala ifwe ta. Naluundi sikhwaamanyile shiina she khuukhola ta, ne shonyene ndi, ifwe khweyikinile iwe khuukhuyeeta.”

¹³Biba biryo babaandu ba Yuda baaba beemikhile iburaangisi we Liisaayilo Liikhulu atweela ni babaana baabwe bafwiiti, ni bakhasi baabwe, ni babaana beene.

¹⁴Lubaluba, Umwoyo w'Omukasya weekha khu musaani mutweela uwe khu basooleli ba Asafu, uwe mu shikuuka sha Levi isi baalaanga bari Jahaziyeli, umusooleli wa Zekariya, umusooleli wa Benaaya, umusooleli wa Jeyieli, umusooleli wa Mataniya.

¹⁵Kila Jahaziyeli yuno aloma ari, “O umuyiinga Yehoshafati, ni nanywe babaandu be Yuda ni Yerusalemu mweesi, Umukasya ali khuuloma ari mukhabakho ni khuurya khwoosi, namwe liiye lino lye kamaani likhabeyembelesa ta. Lwekhuuba busoolo buno sibuli bubweenywe ta, ne Wele niye utsya khuubasoolanila.

¹⁶Kumukaamba mwaakha mukhuumbe mutsye khukhwakaanana ni nabo. Mukhabaanyoole nga nabo balikho bekhilila kumwiikha kwa Zizi, ibwaakamilo we litila liliili aambi ni kumubiimbi kukwibotokheleele shiriimba Jerueli.

¹⁷Ne sishili ndi inywe nibo babaakhaasoolane mu busoolo ubwo ta. Muli ni khukhwiimikha busa mu bifwo byeenywe, nio mubone nga Umukasya umweene n'abasoolanila khuubawonesa khukhwaama isi baasiku beenywe. Baandu ba Yuda ni be mu Yerusalemu, mukharya namwe mwawamo kamaani ta, lwekhuuba Wele umweene ali nanywe. Kumukaamba inywe ni mwinyukhe busa mutsye khuubakaanana, Umukasya umweene ali ni nanywe.”

¹⁸Isho shaakila umuyiinga Yehoshafati wenamisa kumurwe kweewe aasi khwiloba, ni babaandu boosi ba Yuda ni Yerusalemu nabo baakhola baryo, nga besaaya Umukasya.

¹⁹Lwanyuma ba Levi khukhwaama mu bikuuka bya Kohasi ni Kora, benyukha angaaki, belwaatsa liyoombo liikali lilyeene lye khuruuya Umukasya Wele wa Isiraeli.

²⁰Kumutikhinyi kwe shifukhu shisheelakho, liiye lya Yuda lyaakhuumba lyaatsya mu mubiimbi kwe Tekowa. Ne nga bali mu ntsila batsya, Yehoshafati wenyukha waalomela babaandu ari, “Ni mundekeerese inywe babaandu be mu Yuda, ni be mu Yerusalemu! Ni mufukiilise mu Wele weenywe, ni nanywe kane muwaandalale buulayi. Naluundi mufukiilise byeesi baŋoosi beewe bakhubooleele, muryo kane muwule.”

²¹Aryo nga waamalile khuukanikhanamwo ni babaandu, umuyiinga waaroborayo babaandu babanyala khukhwiimbila Umukasya, lwe kamaani keewe kamakhosefu. Baryo baatsya ibweeni we liiye nga beemba bari: “Ni muruuye Umukasya, Khuukana khweewe khubawo biilo ni biilo.”

²²Baryo ni baarakikha khukhweemba kimyeenya kye khuuruuya, Umukasya waayumbaasa liiye lya ba Amoni, ni Mowaabu, ni be khu Lukiingi Seya.

²³Karyo kamaye kano ke ba Amoni ni Mowaabu, kebwaakala luundi kahesela ilala liiye lya Edomu (be khu Lukiingi lwa Seya). Lwanyuma babeene ndi bashuukhanakho bonyene na bonyene, berana, khukhwoolesa ni baamalibwawo ilala.

²⁴Liiye lya Yuda khuutsya khwoolayo khu munaala kukuulolelaniile ni kumubiimbi, uri balola bari, baabona kimilaambo kye baselikhale nga kyalaambiile khwiloba buli aandu, nga mbaawo na mutweela uwatitukhakho ta.

²⁵Aryo Yehoshafati ni liiye lyeewe ni boola mu kaambi iyabali, baatsya na buli shiindu shoosi shishabamo kumukaso. Baanyoolayo tsikhaafu mu bukali, bibiindu bibiraambisibwa, ni bikwaaro nabyo mu bukali. Khusutaka bibiindu bino byoosi, shabayilila biifukhu bitaru bibuufu, balekha khuunyalisa luundi ta.

²⁶Nio lwanyuma khu shifukhu sha she khaane, babaandu boosi babuusanila Mwitila lya Beraka[3], beemba kimyeenya khuruuya Umukasya. Shiifwo shino shishilaangikha Litila lye Khuruuya, khukhwoolesa ni shaleelo shino.

²⁷Aryo Yehoshafati waraangilila liiye lyeewe beelayo mu Yerusalemu, nga beetsuule kumwikhoyo, lwekhuuba Umukasya aaba nga waabaweele khuuwula baasiku baabwe.

²⁸Baryo baakhuumba nga bakhupa kamatuungu, baafuura kimilele, ni tsikhoombi, baatsya boola i Yerusalemu mu Liisaayilo Liikhulu ly'Omukasya.

²⁹Ne kamanaambo kakaabebotokheleele ni kaawulila bari Umukasya umweene waasoolanisile baasiku ba Isiraeli, buuri bwaabawaamba boosi.

³⁰Buryo buyiinga bwa Yehoshafati bwaaba mu lukoosi, lwekhuuba Wele niye uwabawa lukoosi luno khu buli lubeka lwoosi.

³¹Musaambo iyo, Yehoshafati waawula Yuda. Ekyela umuyiinga wa Yuda nga ali ni kimiiko kamakhumi kataru na kiraano (35), aryo waawulila mu Yerusalemu khuumala kimiiko kabili na kiraano. Maayi weewe aaba bari Azuba, umukhaana wa Shilukhi.

³²Yehoshafati waaba nga atsiila khu makaambila k'Omukasya, nga paapawe Asa naye n'akholatsaka.

³³Ne khuurusakho ndi, bibyeeso bye khukhwisaayilakho ba wele babaandi, niye s'abihesa waabimalilawo ilala ta. Shino shaakila babaandu baalala baarama nga bashisaaya ba wele be kamanaambo kakaandi, mu shifwo she khukhwakaanisatsaka Wele isi bakuuka baabwe besaayatsaka.

³⁴Bibiindu bibiindi bibiramile byeesi Yehoshafati aakhola nga ali umuyiinga, khukhwaamila ilala iburakikhilo khukhwoolela ilala ibumaliiliso, byaronebwa mu shitabo sha Yehu, umusooleli wa Hanani, bibyaba nga nibyo bitweela khu Byaamayo bye Bayiinga ba Isiraeli.

³⁵Mu mbuka isi Yehoshafati aabeela nga ali umuyiinga wa Yuda, aakhola indakaano iye khuukholakana ni Ahaziya, umuyiinga wa Isiraeli, uwakhola bibiindu bye bumoyaani biikali naabi.

³⁶Boombi atweela baafukiilisana khukhwoombekha tsimeeri tse khu nyaantsa tsingalikho busa i Eziyoni Geberi, nga nitso tsitsatsyatsaka i Tarushishi.

³⁷Ne umuŋoosi Eliyezari umusooleli wa Dodavahu, khukhwaama mu shiriimba she Mareshi wareewula Yehoshafati, nga aloma ari, “Iwe lwekhuuba wakhola indakaano n'umuyiinga Ahaziya, Umukasya naye aryo woonakisa byoosi byeesi ombekha byoosi.” Isho shaakila tsimeeri tsaatomela tsaafuniaakikhaka tsoosi, tsaalekha khukhwiilamo luundi khuuraamba ta.