Read lumasaaba 2 Bye Kimiboolo 21 Bible Online

2 Bye Kimiboolo 21 - lumasaaba bible

2 Bye Kimiboolo 21

¹Yehoshafati waafwa, baamusiikha andulo e bakuuka beewe mu shiriimba sha Dawudi Yerusalemu. Umusooleli weewe Yehoramu waamwiilila mu bikyele nga umuyiinga.

²Yehoramu, umusooleli wa Yehoshafati aaba ni babandaaye basesaba, nga nibo; Azariya, Yehiyeli, Zekariya, Azariya, Mikayili, ni Shefatiya.

³Isi bano boosi, paapa waabwe aabakabila biwaano bye feetsa, ni zaabu, ni khuutubakho bye buyiindifu bibiindi swa busa. Ndi waabalooselakho khuuba babaraangilila bitweela khu biriimba bye tsimako bye mu Yuda. Ne waaba nga waarobora Yehoramu khuuba nga niye umwiilila mu bikyele byeewe nga umuyiinga lwekhuuba niye uwaba umusooleli umukiboole.

⁴Aryo Yehoramu n'amala khuubona ari buyiinga bwa Yuda bwoosi buli aasi eewe, waakhoonyaka babandaaye tsana boosi, ni khuutubakho baaraangilisi babaandi babaaramile be mu Yuda.

⁵Yehoramu ekyela umuyiinga nga ali ni kye buukhulu kamakhumi kataru na kibili, lwanyuma waawulila mu Yerusalemu khuumala kimiiko shinaane.

⁶Ne Yehoramu waakhola bye bubwoonaki nga bayiinga babaaramile ba Isiraeli ni baakhola. Aryo waakhwa umukhaana wa Ahabu, waaloondelela she khuubonelakho she muungo umwo she bubwoonaki. Musaambo iyo, waaminyaalila Umukasya.

⁷Ne Umukasya s'akana khuuhesa luruungo lwa Dawudi ta, lwe ndakaano ni shisuubiso sheesi aawa Dawudi ari babetsukhulu beewe baliba baawuli mu Yuda, babe nga itaala iyaburukha biilo ni biilo.

⁸Mu biifukhu bya Yehoramu nga umuyiinga, babaandu be mu Edomu baaminyaalila buwuli bwa Yuda, beererawo umuyiinga uwaabwe.

⁹Aryo Yehoramu atweela ni liiye lyeewe lyoosi, ni kamakaali kaabwe, benyukha baatsya khukhwibwaakala Edomu. Ni boolayo, liiye lya Edomu lyaabariiya tsimbeka tsoosi. Ne niye ni liiye lyeewe baanyalisa khuubewomakho shiilo, baatitukha.

¹⁰Baryo ba Edomu baanyalisa khukhwiwula khukhwaama khu Yuda, khukhwoolesa ni shaleelo shino. Ne shiriimba sha Libuna nasho sheyawulakho khu Yuda khu mbuka nyene iyo. Bino byoosi byakholekha biryo lwekhuuba Yehoramu aarura khu Mukasya, Wele isi bakuuka beewe besaayatsaka.

¹¹Yehoramu weyombekhelayo ni bibyeeso bya busheele busa, iyo mu ngoongo tse mu Yuda, waakila ni babaandu boosi be mu Yuda boonakisa isi Umukasya, nga besaaya ba wele babaandi.

¹²Shifukhu shitweela, Yehoramu waafuna ibaluwa nga yaama wa Eliya umuŋoosi nga iloma ari: “Indi ni buurume khukhwaama isi Umukasya Wele isi kuukawo Dawudi esaayatsaka. Niye waamanya ari iwe waakhuuloondelela she khuubonelakho shilayi sha paapawo Yehoshafati, namwe sha kuukawo Asa ta.

¹³Ne khuurusakho ndi iwe waloondeleele she khuubonelakho she bubwoonaki she bayiinga ba Isiraeli. Iwe waakilile ni babaandu ba Yuda ni be mu Yerusalemu boosi besaaya bifwaani, baakamisa khukhwisaaya Umukasya, nga Ahabu n'amoyaanisaka ba Isiraeli khukhwoonaka. Naluundi iwe wakhoonyaka babandaayo babeene, babaaba basaani babaakhufuurakho iwe buulayi.

¹⁴Ni lwe lomo yino, Umukasya atsya khuwa babaandu be mu buyiinga bwoowo shitaambiso shikali, ni khuutubakho babaana boowo, ni bakhasi boowo, ni khuumalawo bye buyiindifu bwoowo byoosi.

¹⁵Iwe wamweene utsya khufuna buulwaale bwe mu byeenda byoowo, bubukane bube buubi naabi, utaambisibwe khukhwoolesa n'ukhaafwe.”

¹⁶Lwanyuma kila Umukasya asuuluusa ba Firisitiya ni ba Arabu, babaaba bamenya aambi ni ba Esiyopiya, bakana naabi khusoolanisa Yehoramu.

¹⁷Baryo baakhuumba beetsa bebwaakala Yuda, baafuniaakaka bye khukhwikhiinga byoosi, baanuula bibiindu byoosi bibyaba mu lubili lweewe, baayililamo ni basooleli beewe, atweela ni bakhasi beewe nga baabowe. Umusooleli weewe mutweela yenyene uwarama aba Ahaziya[4], nga niye uwaba ufuuramwo bukyeekhe.

¹⁸Bino nga byaweele khuukholekha biryo, Umukasya waasiindikhila Yehoramu buulwaale bwe byeenda bubukhawona ta.

¹⁹Lwanyuma lwe kimiiko nga kibili, buulwaale buno bwaaba burafu naabi, bwaakila ni byeenda byeewe byaasosomokha, aryo waafwa nga ali mu butsiina bukali naabi. Babaandu beewe sibamwaasila shisheeso she kumulilo lwe khuumwiisamo lukoosi nga ni baakholatsaka khu bakuuka beewe ta.

²⁰Yehoramu aaba ali ni kye buukhulu kamakhumi kataru na kibili, nga ni ekyela umuyiinga, aryo waawulila kimiiko shinaane nga asiintsiila i Yerusalemu. Abe akhaba nga aafwa, mbaawo umuundu na mutweela isi kumutaambo kwawaambakho ta. Baamusiikha mu shiriimba sha Dawudi mu Yerusalemu, ne akhuba mu ŋani tse bayiinga ta.