Read lumasaaba 2 Bye Kimiboolo 26 Bible Online

2 Bye Kimiboolo 26 - lumasaaba bible

2 Bye Kimiboolo 26

¹Babaandu boosi be mu Yuda beetsa atweela bekhasa Uziya umusooleli wa Amaziya, uwaba olesa kye bukhulu likhumi na kisesaba, khu shitsoloŋo nga umuyiinga, khukhwiila mu bikyele bya paapawe.

²Lwanyuma lwe khuufwa khwa paapawe, Uziya ombekha shiriimba sha Elati, lwanyuma washikoboselayo Yuda.

³Uziya aba nga olesa kimiiko likhumi na kisesaba, khu mbuka isi aarakikhila khuuwula nga umuyiinga. Lwanyuma waawula khuumala kimiiko kamakhumi karaano na kibili nga asiintsiila mu Yerusalemu. Lisiina lya maayi weewe aba bari Yeholiya, uwaba aama mu Yerusalemu mweene.

⁴Uziya waaba nga akhola bye bukwalaafu mu moni ts'Omukasya, nga aloondelela byoosi byeesi paapa weewe aakholatsaka.

⁵Uziya aaba ni Zekariya nga niye umuwi weewe uwe kamakyesi, uwamuleekela khukhwisaaya Wele. Ni nashiryo, mu biifukhu byoosi byeesi Zekariya aabeelawo nga mulamu, Uziya esaayatsaka Wele, ni Wele naye waamuwa tsikhabi ngali naabi.

⁶Nga Uziya ali umuyiinga, ekulawo buusoolo ni ba Filisitiya. Aryo waatsya waafuniaakaka kamatikiiyi ke biriimba bye Gaasi, Jabune, ni Ashidodi. Lwanyuma woombekhayo biriimba bishaakha mu shifwo she Ashidodi, ni mu bifwo bibiindi bye mu Filisitiya.

⁷Wele aamuyeeta naabi khuuwula mu busoolo bweesi aasoolana ni ba Filisitiya, ni ba Arabu babaaba bamenya mu Gurubaali, atweela ni ba Mewuni.

⁸Akhaba ni babaandu ba Amoni baasasulatsaka kumusolo isi Uziya. Aryo Uziya waaba umuundu uwe kamaani naabi, ni lubuyi lweewe lwaasalanila lwaatsya lwoola ni mu bibala nga Misiri.

⁹Mu Yerusalemu, Uziya wombekhamo kiminaala kikyabakho tsimako aambi ni Shilibwa sheesi balaanga bari Koona, ni Shilibwa she Mwitila, ni mu shifwo isi kuutikiiyi kwe shiriimba kwefunyila khukhwiila mukari.

¹⁰Aryo wombekhaka ni kiminaala kye khukhwiliinda mu mubiimbi. Waalimisa ni biitibo biikali bibyabamo kameetsi, lwekhuuba aaba waabaya bibyaayo biikali naabi, bibyaba byaayila mu ngoongo tse mu Yuda, atweela ni mu bifwo bye kimisaleela byeene. Naluundi niye aaba umuundu ukana naabi bye buulimi, isho shaakila waaba ni bilime biikali, ni babaandu baakali, babaaraambatsaka khu mikuunda kyeene, kyeesi aaba alimisa khu ndulo khwe tsingoongo, ni mu matila mweene, buli aandu aaba liiloba liilayi.

¹¹Uziya aaba ni liiye lilyaba liŋooneŋoone buulayi, nga lyaayirekekhela buusoolo buli mbuka. Liiye lino lyaba liraangililwa ni Yeyiyeli, nga niye umuroni walyo, n'umuro weewe aaba bari Maaseya. Bano boombi baaba bali aasi a Hananiya, uwaba mutweela khu baakhulu b'omuyiinga.

¹²Bukali bwe baaraangilisi be liiye lino, babaaba nga nibo bakhulila tsiingo tsaabwe, bwaba bwoola bikana bibili, ni bitoondo bisesaba (2,600).

¹³Liiye lyoosi lyaba lyoolesa baselikhale baŋooneŋoone buulayi baboola kimyeeka kitaru, bikana musaafu, ni bitoondo biraano (307,500). Baselikhale bano baaba nga baayirekekha khukhiinga umuyiinga isi umusiku yeesi.

¹⁴Uziya waawa liiye lyeewe tsingabo, kamafumo, tsikuutwa, bikwaaro bye shishuuma, buyiingo, ni kamabaale kakaaraambisibwa khuukholowa mu kholoto.

¹⁵Batweela khu baraambi ba Uziya baaba be bumanyilifu buukali naabi, nibo baakholayo bibyuuma abe bibinyala byaalasa buyiingo ni khuukholowa kamabaale ke mu kholoto. Uziya aarekekha bino byoosi nga bira mu Yerusalemu khu minaala, ni mu bifwo bibiindi bye khukhwiliinda khu kutikiiyi kwe shiriimba. Lubuyi lwa Uziya lwaamalatana buli aandu oosi mu shibala shoosi, lwekhuuba Umukasya amuyeeta naabi, luundi waamwikyelisa khuuba uwe kamaani kamakali.

¹⁶Ne Uziya n'amala khuuba uwe kamaani naabi aryo, weetsamwo shikili she khukhwiyiinga, shishamureerera khuhela. Shifukhu shitweela waaminyaalila Umukasya Wele weewe, waatsya mu Liisaayilo Liikhulu umweene khukhwoosha bubaane khu sheeso.

¹⁷Ne Azariya umusaayi ufuura bukhulu, atweela ni basaayi basheewe baamuloondakho mu Lisaayilo iyo.

¹⁸Kila bamulomela bari, “Sishaakha iwe nga umuyiinga Uziya, khuutsya khukhwoosha bubaane isi Umukasya ta. Kumulimo kuno kuli kwe basaayi bonyene, nibo babaali babetsukhulu ba Aroni, babarobolebwa khukhola kumulimo kuno. Aluno, waakha khurura utsye khukhwaama mu Lisaayilo lino, lwekhuuba iwe woonakisile isi Umukasya. Ni nashiryo Umukasya Wele singene akhuwe tsikhabi lwe lomo yino ta.”

¹⁹Khu nyaanga iyo, Uziya aaba nga weemikhile aambi ni isi booshela bubaane, lirima lyaamuniina. Ne naaba nga ashiirafuwanila ni basaayi abo iburaangisi we shisheeso mu Liisaayilo Liikhulu ly'Omukasya, buulwaale bwe bikeenge bwaamubalukhakho mu bweeni bweewe.

²⁰Ne Azariya umusaayi ufuura bukhulu, ni basaayi basheewe ni baabona shino, baamulomela khuurura khaangu khukhwaama mu Liisaayilo Liikhulu. Ne Uziya umweene waakhakakho khuurura khaangu ibulafu, lwekhuuba aashimanya ari Umukasya waamuweele shitaambiso.

²¹Aryo umuyiinga Uziya waaba ni buulwaale bwe bikeenge buulamu bweewe bwoosi, khukhwoolesa n'afwa. Shino shaakila waamenya mu ntsu isi aaba yenyene, waalekha khufukiilisibwakho mu Liisaayilo Liikhulu, namwe ni khuumenyakho mu lubili lweewe ta. Isho shaakila umusooleli weewe Yosamu waaba nga amenya mu lubili lweene, khuuwula mu shifwo sha paapawe.

²²Buuraambi bwa Uziya bwoosi khukhwaamila ilala makiboole khukhwoola ikhumaliilisa, bwaronebwa n'umuŋoosi Isaaya umusooleli wa Amozi.

²³Aryo Uziya n'afwa, baamusiikha aambi ni tsiŋani tse baakuuka beewe, ne iŋani yeewe yaba mu mukuunda kukuundi busa kukwaba kwe bayiinga, lwekhuuba niye aaba ni bikeenge. Lwanyuma umusooleli weewe Yosamu weelawo nga umuyiinga uwilakho.