Read lumasaaba 2 Bye Kimiboolo 27 Bible Online

2 Bye Kimiboolo 27 - lumasaaba bible

2 Bye Kimiboolo 27

¹Yosamu aaba olesa kye bukhulu kamakhumi kabili na kiraano, khu mbuka isi ekyelela umuyiinga. Aryo waawula nga asiintsiila mu Yerusalemu khuumala kimiiko likhumi na kisesaba. Maayi weewe aba bari Yerusha umukhaana wa Zadoki.

²Yosamu waakhola bibiindu biilayi bibikhoyesa Umukasya. Niye aakhola bibiindu biilayi byoosi nga byeesi paapa weewe Uziya n'akhola, khurusakho ndi niye s'atsya khwoosha bubaane mu Liisaayilo Liikhulu ly'Omukasya ta. Ne babaandu ba Yuda nibo beeloosela nga bakhola bye bubwoonaki mu moni ts'Omukasya.

³Yosamu wombekha bushaakha shiilibwa she murwe we Liisaayilo Liikhulu ly'Omukasya. Waakholayo ni kumulimo kumukali kwe khukhwoombekha bushaakha liitikiiyi liliili aambi ni lukiingi Ofeli.

⁴Wombekhaka ni biriimba mu shibala she tsingoongo sha Yuda, ni khukhwoombekha tsimako ni kiminaala kye khukhwiliinda mu bisaali.

⁵Yosamu waatsya khusoolana ni ba Amoni, waabawula. Lwanyuma buli mwiiko khuumala kimiiko kitaru, waaba nga abafunakho kumusolo kukwoola tsikilo bikana bitaru ni bitoondo bine (3,400) tse feetsa, tsitani shikana shitweela (1,000) tse ŋaano, ni tsitani shikana shitweela tsa seyiri (1,000).

⁶Musaambo iyo, umuyiinga Yosamu waaba uwe kamaani naabi, lwekhuuba aaba umwitsiliilisi naabi khuubona ari aaba umwiyikinwa isi Umukasya Wele weewe.

⁷Bibiindu bibiindi byoosi byeesi Yosamu aakhola mu buwuli bweewe nga umuyiinga, khuuyililamo ni busoolo bweesi aasoolana, byaronebwa mu Shiitabo she Bibyaamayo bye Bayiinga ba Isiraeli ni Yuda.

⁸Niye ekyela umuyiinga nga ali ni kye bukhulu kamakhumi kabili na kiraano, lwanyuma waawula nga umuyiinga nga asiintsiila mu Yerusalemu khuumala kimiiko likhumi na kisesaba.

⁹Aryo n'amala khuufwa, baamusiikha mu shiriimba sha Dawudi Yerusalemu. Lwanyuma umusooleli weewe Ahazi waamwiilila mu bikyele byeewe nga umuyiinga.