Read lumasaaba 2 Bye Kimiboolo 29 Bible Online

2 Bye Kimiboolo 29 - lumasaaba bible

2 Bye Kimiboolo 29

¹Hezekiya ekyela umuyiinga wa Yuda nga ali ni kimiiko kamakhumi kabili na kiraano kye bukhulu. Lwanyuma waaba umuyiinga nga awula khuumala kimiiko kabili na syeenda, nga asiintsiila mu Yerusalemu. Maayi weewe aba bamulaanga bari Abiya, umukhaana wa Zekariya.

²Aryo Hezekiya waakhola bibiindu bibikhoyesa Umukasya, nga kuukawe Dawudi n'akholatsaka.

³Mu mweesi kweewe kukuunyoowela ilala kwe buwuli bweewe, Hezekiya wekulakawo kimilyaango kye Liisaayilo Liikhulu ly'Omukasya, waalakila baakiŋoona bushaakha.

⁴Lwanyuma walaanga atweela basaayi ni ba Levi, khukhwiitsa khuumwakaanana mu lwaanyi lwe bwaamanyaanga we Liisaayilo Liikhulu,

⁵kila abalomela ari, “Ni mundekeerese buulayi inywe ba Levi! Inywe mwaakha mwipyeluuse mwabeene khuunyoowa, nio lwanyuma mupyeluuse Liisaayilo Liikhulu ly'Omukasya, Wele we bakuuka beenywe. Muryo mutsye musutake bibiindu bye bunyaalu, bibikhaakhila ta, mubiruse khukhwaama mu shifwo shikhosefu.

⁶Batweela khu bakuuka beefwe baaba babaakhali babeyikinwa ta, baakhola bibiindu bibikhaaba biilayi mu moni ts'Omukasya, Wele weefwe. Baryo baamwaantsukha, baakhupa Umukasya kumukoongo, baalekha ni khukhwiinaanayo isi Lisaayilo lyeewe Likhulu ta.

⁷Beelooselayo beekalakawo kimilyaango kye Liisaayilo Liikhulu, baasimisaka ni tsitaala tsamwo, baakamisa ni khukhwoosha bubaane, ni khuuwaanayo biwaanwa bibyooshe mu shifwo shikhosefu sha Wele wa Isiraeli.

⁸Isho shaakila lirima lyawaamba Umukasya khulwe babaandu ba Yuda ni be mu Yerusalemu. Aryo waabakhola bekyela shishiindu she khukhwiyaanga, she khukhwinyinyala, naluundi khuukhoma, nga nanywe ni mubona ni tsimoni tseenywe.

⁹Lwe lomo yino, bakuuka beefwe beeribwila mu busoolo, ni khuutubakho ni basooleli ni bakhaana beefwe beene, ni baakyelama nabo baawaambibwa, baayilibwa nga baabowe.

¹⁰Ni nashiryo ise naakhalilewo khuukhola indakaano n'Umukasya Wele wa Isiraeli. Shino manya shinyala shaakila waakamisa khuukhuwaambila ifwe lirima liikali lino.

¹¹Basaale baase, mukhoonakisakho imbuka yoosi ta. Inywe nibo beesi Umukasya aarobola khukhwiimikha mu moni tseewe, khuumwakaanisatsaka nga basaayi, khuuraangilila babaandu beewe mu khwisaaya ni khuuwaanayo biwaanwa is'ali.”

¹²Aryo Hezekiya n'amala khuukanikha, ba Levi babenyukha baatsya baarakikha khuuraamba, nga nibo bano: Khukhwaama mu shikuuka sha Kohasi baaba Mahati umusooleli wa Amasayi, ni Yoweeli umusooleli wa Azariya. Khukhwaama mu shikuuka sha Merari, baaba Kishi umusooleli wa Abudi, ni Azariya umusooleli wa Yehaleli. Khukhwaama mu shikuuka sha Gerishoni baaba Yowa umusooleli wa Zima, ni Edeni umusooleli wa Yowa.

¹³Khukhwaama mu shikuuka sha Elizafani baaba Shimuri ni Yewuweli. Ni khukhwaama mu shikuuka sha Asafu baaba Zekariya ni Mataniya.

¹⁴Khukhwaama mu shikuuka sha Yedusuni baaba Shemaya ni Uziyeli.

¹⁵Ba Levi bano baabuusanisa atweela ba Levi bashaabwe boosi, baakholela atweela kumukholo kwe khukhwipyeeluusa babeene. Lwanyuma lwayo, baarakikha khuupyeeluusa Liisaayilo Liikhulu, nga baloondelela Kamakaambila k'Omukasya, nga umuyiinga umweene n'abalomela khuukhola.

¹⁶Basaayi benjila mu shifwo she mukari she mu Liisaayilo Liikhulu khushipyeeluusa. Baarusaka ibulafu bibiindu byoosi byeesi baanyoolamo nga bili binyaalu, baabira khu lwaanyi. Ni khukhwaama khu lwaanyi luno, ba Levi baabisutaka, baabiyila ibulafu we shiriimba mu Litila Kidironi.

¹⁷Baryo basaayi atweela ni ba Levi baarakikha khuuraamba khu shifukhu shishinyoowa she kumweesi. Shaabayilila nibo i sabiiti imbuufu khuupyeeluusa tsintsanyi tse Liisaayilo Liikhulu, ni sabiiti ikiindi imbuufu khuupyeeluusa Lisaayilo Likhulu lilyeene. Nashiryo kumulimo kwoosi kwawa mu biifukhu likhumi na bisesaba.

¹⁸Lwanyuma ba Levi tsana baatsya isi umuyiinga Hezekiya, bamuboolela byeesi baaba nga baamalile khukhola. Baloma bari, “Ifwe khwaamalile khukhola kumulimo kwoosi. Khwaamalile khupyeeluusa Liisaayilo Liikhulu luundi, ni khutubakho shisheeso she khukhwookhelakho biwaanwa ni bibiindu byakhwo bibiraambisibwa, ni khutubakho imeetsa ibakho Kumukaati kumukwalaafu, ni bibiindu byoosi bibiraambisibwakho.

¹⁹Khuryo khwaakobosakilewo bibiindu byoosi, byeesi umuyiinga Ahazi aatuumaka ibulafu khukhwaama mu Liisaayilo Liikhulu, khu mbuka isi aabeela ukhali umwiyikinwa isi Umukasya ta. Khubipyeeluusile byoosi, khwaabikobosayo khu sheeso sh'Omukasya.”

²⁰Lwanyuma antsye ni bwasha kumutikhinyi, umuyiinga Hezekiya wenyukhilamo atweela ni baakhulu be mu shiriimba, baatsya mu Liisaayilo Liikhulu ly'Omukasya.

²¹Bareera tsiwuunwa musaafu, ni kamamiiku musaafu, ni kamasheese kamaanakhe musaafu, nga nibyo bye khuuwaanayo nga tsisaayilo tsintsoshe. Baatubaasakho ni tsindurume musaafu tse khuuwaanayo lwe bibyoonako bye buyiinga, ni lwe Liisaayilo Liikhulu, ni lwe babaandu ba Yuda. Lwanyuma Hezekiya waalomela basaayi, nga nibo babaaba be inda ya Aroni ari batsye boshele bisolo bye tsisaayilo khu sheeso.

²²Baryo baakhoonya tsiwuunwa, kamamiiku, ni kamasheese kamaanakhe, lwanyuma bawaanyaka kamalasile kaatso tsoosi khu sheeso.

²³Lwanyuma tsindurume natso batsireera isi Hezekiya ni lituuli lye babaandu lyoosi, batsirakho kamakhono kaabwe.

²⁴Lwanyuma basaayi batsikhoonya khuuba shiwaanwa she bibyoonako, bawaanyaka kamalasile kaatso khu sheeso, lwe khurusawo bibyoonako bye ba Isiraeli byoosi, lwekhuuba Hezekiya aba nga walakiile ari biwaanwa bino bikholebwe lwe babaandu ba Isiraeli boosi.

²⁵Shisheelakho, Hezekiya waawa ba Levi biifwo byaabwe bye khuuraambilamo mu Liisaayilo Liikhulu. Lwanyuma waabawaka bibisakaya ni tsiindingiti, ni kamatuungu kakaandi, khuusiintsiila khu bilakilo by'Omukasya byeesi aawa Umuyiinga Dawudi, atweela ni baŋoosi baabili Gadi ni Nasani.

²⁶Ba Levi baaba beemikhile nga beerekekhile khuukhupa kamatuungu ako, kakaaba ka Dawudi, ni basaayi nabo baaba nga beerekekhile khuufuura tsikhoombi.

²⁷Lwanyuma Hezekiya waalakila ari babukule biwaanwa bye khukhwoosha babire khu sheeso. Nga ni baamala khuura biwaanwa khu sheeso bari, babeembi be kimyeenya baarakikha khukhweemba nga baruuya Umukasya, nga bafuura tsikhoombi, naluundi nga bakhupa ni kamatuungu kaabwe, kakaabakho ka Dawudi, uwabakho umuyiinga wa Isiraeli.

²⁸Lituuli lye babaandu besaaya Umukasya, nga nabo babeembi be kimyeenya beemba, ni babafuura tsifuluumbeti nabo nga bafuura, khukhwoolesa biwaanwa bye khukhwoosha byoosi ni byawa khukhwookhebwa.

²⁹Lwanyuma lwa bino byoosi, Hezekiya atweela ni babaandu boosi baafukhama aasi besaaya Umukasya.

³⁰Umuyiinga Hezekiya ni baakhulu beewe babaandi balakila ba Levi khukhweemba kimyeenya kye khuruuya Umukasya, kyeesi Dawudi n'umuŋoosi Asafu baaba barona. Baryo beenamisa kimirwe kyaabwe aasi, baaba nga beemba ni kumwikhoyo kumukali naabi nga baruuya Umukasya.

³¹Lwanyuma Hezekiya waalakila babaandu boosi ari, “Bona ari mwaamalile khukhwipyeeluusa mwabeene isi Umukasya. Nashiryo ni mureerere tsisaayilo tseenywe, ni biwaanwa bye khuusiima mu Liisaayilo Liikhulu ly'Omukasya.” Baryo babaandu boosi baashikhola, ne babaandi khu nibo baaba nga balooselakho ni khuureera bisolo bye khukhwoosha nabyo, nga mbaawo umuundu ubawanyiinya ta.

³²Babaandu baareera tsiwuunwa tsitsoola kamakhumi musaafu (70), ni kamamiiku shitoondo shitweela (100), ni kamasheese kamaanakhe bitoondo bibili (200), nga bino byoosi bili biwaanwa bye khukhwoosha busa.

³³Beelayo ndi baareera tsiwuunwa bitoondo bisesaba (600), ni kamasheese bikana bitaru (3,000), nga nibyo biwaanwa bibyawaanibwawo lwe khuuloomba tsikhabi khukhwaama isi Umukasya.

³⁴Ne buukali bwe basaayi baaba bakyeekhe naabi, baalekha khunyalisa khuukhola kumulimo kuno kwe khukhwoosha biwaanwa khuukumala ta. Shino shaakila babandaayabwe ba Levi beetsa baabayeetakho, khukhwoolesa basaayi babaandi ni baamala nabo khukhwipyeeluusa. Lwekhuuba basaayi baalala bano baaba nga sibenaanileyo khuuwaanayo imbuka khukhwipyeeluusa ta. Ba Levi nibo baaba babetsiliilisi naabi mu bilomo bye khukhwipyeeluusa khuufuura basaayi baakali.

³⁵Khuuyilila atweela abawo tsisaayilo ngali naabi tseesi booshela khu sheeso, ni khuutubakho kiminaawa khukhwaama mu bisolo bibiindi byeesi baawaanayo, atweela ni biwaanwa bye viini byeesi baatsukhaka khu sheeso. Musaambo iyo, Liisaayilo Liikhulu ly'Omukasya baalipyeeluusa khukhwiilamo luundi khusaayilamo Umukasya.

³⁶Aryo Hezekiya atweela ni babaandu boosi bekhoya luukali, lwe bibiindu byoosi byeesi Wele aaba waabayeetile khuukhola mu mbuka ifwiiti naabi iryo.