Read lumasaaba 2 Bye Kimiboolo 3 Bible Online

2 Bye Kimiboolo 3 - lumasaaba bible

2 Bye Kimiboolo 3

¹Aryo Solomoni waarakikha khukhwombekha Liisaayilo Liikhulu mu Yerusalemu khu lukiingi Moriya. Khu lukiingi khweene khuno, nikhwo khweesi Umukasya abonekhela Dawudi, paapawe wa Solomoni. Lisaayilo lino Likhulu alyombekha khu lusha lulwaba abe lwa Orunani, umu Yebusi, nga nisho shiifwo sheesi Dawudi umweene arobora.

²Khukhwombekha khuno khwarakikha mu mweesi kwe khabili, mu mwiiko kwe khaane, kwe buwuli bwa Solomoni.

³Bipimo byeesi Solomoni aaraambisa byaba biri; kumusiingi kwe Liisaayilo Liikhulu kwaba tsifuuti kamakhumi syeenda buuleeyi, ni tsifuuti kamakhumi kataru buubalaayi.

⁴Khaseenge khe buraangisi khe bwinjililo we Liisaayilo Liikhulu khaaba khoolesa tsifuuti 30, nga khalekhaana ni buubalaayi bwoosi bwe Liisaayilo Liikhulu, ni khuuniina mu ngaaki nga khoolesa tsifuuti 30. Kamatikiiyi ke mukari koosi ke bwinjililo buno ni mu ngaaki mweene, baawakhamwo izaabu inyene.

⁵Ni shiseenge shamwo abe shishifuura buukhulu baakhupilakho tsimbaawo tsa kuusaala sayipuraasi, bamaalakakho ni zaabu, baaronakakho ni bifwaani bye kimisaala, ni bye kiminyololo.

⁶Khu matikiiyi ke Lisaayilo lyeene Likhulu, aarakakho bubuuma bwe buukusi bwe angaaki naabi, nio libonekhe buulayi, ni khuutubaasamwo ni zaabu inyene isi baareera khukhwaama mu shibala sha Parivayimu.

⁷Kamatikiiyi koosi, ni kimirongoolo kyoosi kye mu ngaaki, ni kimilyaango kyamwo kyeene, baamaalakakho ni zaabu. Solomoni walakila ni baraambi baaronaka bifwaani bye bakeruubi khu matikiiyi koosi.

⁸Ni shiifwo shishifuura bukhosefu mu Liisaayilo Liikhulu, aalikhola buubalaayi bwalyo tsifuuti kamakhumi kataru (30), nga bulekhaana ni bwe Liisaayilo Liikhulu lilyeene, ni buuleeyi khukhwiikha aasi nabwo bwaba tsifuuti kamakhumi kataru (30). Ni kamatikiiyi mukari aamaalilamwo ni zaabu inyene iyoola tsitani kamakhumi kabili na tsitaru (33).

⁹Busiro bwe kimisumaali bwaba bwoola buli mutweela tsiguramu 570 tse zaabu inyene.

¹⁰Solomoni waakholayo bifwaani bye bakerubi bibili, waabimaalilakho ni zaabu khu ngaaki. Aryo bifwaani bino waabira mu shifwo shishifuura bukhosefu.

¹¹Tsindaaha tse bakeruubi baabili tsaba tsoolesa buubalaayi atweela tsifuuti kamakhumi kataru. Lutaaha lwe shibuumbe shitweela lwaba lwoolesa buuleeyi tsifuuti 7 1/2, nga lutsya lwetiila khu litikiiyi lye Liisaayilo Liikhulu. Ni lutaaha luluundi nalwo lwaba lwoolesa tsifuuti 7 1/2, nga lutiilanakho ni tsindaaha tse shibuumbe she khabili.

¹²Ni musaambo niyo ndweela, keruubi yuno uwe khaabili aba ni lutaaha lutweela nga lwoolesa nalwo tsifuuti 7 1/2 nga nalwo lutsya lwetiila khu litikiiyi lye lubeka luluundi lwe Liisaayilo Liikhulu. Ni lutaaha luluundi nga nalwo lwolesa tsifuuti 7 1/2 buuleeyi, nga nalwo lutsya lwatiila khu lutaaha lwe shibuumbe shishinyoowa.

¹³Ni nashiryo buuleeyi bwe tsindaaha tsino atweela nga tsatiilanilekho abe tsoolesa tsifuuti kamakhumi kataru. Bakeruubi bano boombi abe baayimikha khu bikyele byaabwe, nga baalolelela luwaande lwe shiseenge shishifuura buukhulu mu Liisaayilo Liikhulu.

¹⁴Solomoni waakholayo ni ngubo isi batiimba mu shifwo isi benjilila mu shifwo shishifuura bukhosefu, nga ikholebwa khukhwaama mu bafuta indayi, iye raangi imbuusi, ni papo, ni imbesemu, nga baaronakakho ni bifwaani bye bakeruubi khu niyo.

¹⁵Iburaangisi we Liisaayilo Liikhulu Solomoni ombekhayo kimisiindi kibili, abe kikyoola buuleeyi khuuniina mu ngaaki tsifuuti 27. Khu buli kusiindi baabuumbilakho shikofwiila shishalooselakho buuleeyi bubuundi tsifuuti 7 1/2.

¹⁶Imurwe wa buli kusiindi baaronakakho tsinyilili tsitsibonekha nga kiminyololo kikibiranilemo, khuukila kibonekhe buulayi. Naluundi waakholayo buuronake bubuundi bwe kamatuunda buubeya bubwoola shitoondo shitweela, waabuwaambisakila khu minyololo.

¹⁷Waakholayo kimisiindi kibili iburaangisi we Liisaayilo Liikhulu. Kutweela waakura khu luwaande lwe mwaalo isi benjilila, ni kukuundi waakura ingaaki wayo. Kusiindi kukwaba khu luwaande lwe mwaalo waakutwiikha lisiina ari Jakini, ni kukwaba ingaaki waakutwiikha ari Bowazi.