Read lumasaaba 2 Bye Kimiboolo 30 Bible Online

2 Bye Kimiboolo 30 - lumasaaba bible

2 Bye Kimiboolo 30

¹Umuyiinga Hezekiya waarumanisaka mu Isiraeli ni mu Yuda mwoosi, naluundi waarona buurone khuulaanga babaandu be mu Efurayimu, ni mu Manase mweene. Shino aashikhola khuubalaanga ari beetse khu Liisaayilo Liikhulu ly'Omukasya i Yerusalemu, beetubaasile atweela mu khwikhoya lwe kamayiiya ke Khuubirakho k'Omukasya Wele wa Isiraeli.

²Umuyiinga, baakhulu beewe atweela ni babaandu boosi be mu Yerusalemu baafukiilisana khukhwikhoyela kamayiiya kano mu mweesi kwe khabili.[6]

³Sibaanyalisa khuukekhoyela khu mbuka inyene ta, lwekhuuba basaayi baakali baaba nga bashiili khukhwipyeeluusa babeene ta, naluundi abe babaandu bashiili khubuusana mu Yerusalemu ta.

⁴Nashiryo iŋoonaŋoona yino iye khukhwikhoyela Kamayiiya ke Khuubirakho mu mweesi kwe khabili, yafuukiilisibwa isi buli mutweela.

⁵Baryo kila barumanisa shikuukuulo mu Isiraeli mwoosi, khukhwaamila ilala i Berisheba shishaba imwaalo, khukhwoolela ilala i Dani, shishaba ingaaki nga balaanga buli muundu khukhwiitsa i Yerusalemu, lwe Kamayiiya ke Khuubirakho kano. Babaandu baaba nga baayila imbuka indeeyi naabi nga sibekhoyelakho kamayiiya kano, nga Kamakaambila ni kaloma ta.

⁶Baarume ba Hezekiya baatsya buli aandu oosi mu Isiraeli ni mu Yuda, nga baasutile buurume bubuuloma buri: “Inywe babaandu ba Isiraeli mweesi, ari niyo imbuka, ni mushuukhe mukobole isi Umukasya Wele wa Iburayimu, ni Isaaka, ni Isiraeli, lwekhuuba bona niye waabayeetile, luundi waabawonesile khukhwibwakalibwa khwe bayiinga ba Asiriya.

⁷Mukhaloondelela she khuubonelakho she bakuuka beenywe ni babandaayeenywe ta. Nibo baarura khu Mukasya Wele, naye waabawa shitaambiso she kamaani luukali, nga mwabeene ni mubona ari.

⁸Mukhaba be shikili nga nibo ni baaba ta. Ne ni mukhalewo khuuba baawolu isi Umukasya Wele weefwe! Mwiitse mu Lisaayilo lyeewe Likhulu lyeesi umweene aarobora lwe khuumwisaayilamo biilo ni biilo. Ni mumwisaaye Umukasya Wele weenywe, nio manya waakamisa lirima lyeewe lirafu ili.

⁹Lwekhuuba ni muba nga mwaakoboole is'ali, kane akhole baasiku babaawaambaka baalebe beenywe ni babaana beenywe, khuubabirisa buulayi, lwanyuma babalekhuule bakobole ingo. Lwekhuuba Umukasya Wele ali uwe bubweela luundi okyesanisa shiisa shikali. Nashiryo, inywe siinga mukobola is'ali, naye aryo singene abakhupe luundi kumukoongo ta.”

¹⁰Baryo baarume bano baatimaka baatsya mu buli shiriimba mu Efurayimu ni mu Manase mweene, baatsya boola ni mu Zebuluni, shishaba shisiintsa she ngaaki. Ne babaandu beeyo baatsekhelela busa baarume bano, nga babatyaabila.

¹¹Ne aabawo babaandu bakyeekhe bari khukhwaama mu shikuuka sha Asheri, ni sha Manase, ni sha Zebuluni, babewosa, baatsya i Yerusalemu.

¹²Bunyali bw'Omukasya bwaaba khu buli mutweela khu baandu be mu Yuda boosi, baaba baawolu nga bakhola byoosi byeesi umuyiinga Hezekiya ni baakhulu beewe baabalomela.

¹³Babaandu baakali naabi baaba nga babuusanila mu Yerusalemu, mu mweesi kwe khabili khukhwikhoyela Kamayiiya ke Kumukaati kukukhalimo kamamela ta. Libungiitsi lye babaandu lyaba libiririfu naabi.

¹⁴Baryo baarakikha khuuraamba, baafuniaakaka bibyeeso bye bukafwiili bibyaba biraambisibwa mu Yerusalemu khukhwookhelakho bubaane, baabiyila, baabimwaata mu Litila Kiduroni.

¹⁵Khu shifukhu she likhumi na bine she kumweesi, ba Levi baakhoonyaka kamakheese ke Kamayiiya ke Khuubirakho. Ne baakali khu ba Levi ni basaayi babaakhaaba nga bepyeeluusile ta, baaswaala luukali naabi. Isho shaakila baanyoowa khukhwipyeeluusa babeene isi Umukasya, nio lwanyuma benjila mu Liisaayilo Liikhulu ly'Omukasya, khuuwaanayo tsisaayilo tsintsoshe.

¹⁶Lwanyuma buli batweela khu nibo, baayila biifwo byaabwe mu Lisaayilo Likhulu, nga basiintsiila khu makaambila ka Musa, uwaba umwakaanisi wa Wele. Ba Levi baaba nga batsaatilisa kamalasile khukhwaama mu bisolo bibyakhoonyebwa, baakareera isi basaayi, nabo basaayi baaba nga bakawaanyaka khu sheeso.

¹⁷Ne lwekhuuba ndi baakali khu baandu babaaba nga beetsile abo, baaba nga sibepyeeluusile ta, shaalekha khubanyalisisa khukhwikhoonyela kamakheese kaabwe babeene ta, shaareerera ba Levi khuubakhoonyakila ni khuubawaanilayo isi Umukasya.

¹⁸Ne baakali khu baandu babaama mu Efurayimu, ni mu Manase, ni mu Isakaari, ni mu Zebuluni, baalya kamayiiya ako nga sibepyeeluusile ta. Ne umuyiinga Hezekiya waaba nga waabaloombeele, shaakila bakalyaka baryo, abe yakhaba nga sishaba shiryo mu makaambila ta. Hezekiya abaloombela nga aloma ari, “Khali Umukasya uwe shiisa uyo, asaasiile abo

¹⁹babaakhalawo khuuloondelela Umukasya Wele we bakuuka baabwe, abe yakhaba nga sibepyeeluusile buulayi lwe kamayiiya kano ta.”

²⁰Aryo Umukasya wawulila khuuloomba khwa Hezekiya, walekha khubawa shitaambiso ta.

²¹Baryo babaandu ba Isiraeli babaabawo mu Yerusalemu, bekhoya lwe Kamayiiya kano ke Kumukaati kukukhaabamo kamamela ta, khuumala biifukhu musaafu. Buli shifukhu khwiibyo, ba Levi ni basaayi baaba nga beemba kimyeenya khuruuya Umukasya, nga bakhupa ni kamatuungu kaabwe.

²²Hezekiya waasiima naabi ba Levi lwe khuukhola kumulimo ukwo buulayi ni bumanyilifu bukali bweesi bokyesanisa. Baryo babaandu beloosela khukhwikhoya lwe Kamayiiya kano khuumala biifukhu musaafu, nga bawaanayo biwaanwa bye lukoosi, ni khuusiima Umukasya Wele we bakuuka baabwe.

²³Lwe kumwikhoyo kumukali, babaandu boosi baafukiilisana khukhwilooselayo ni Kamayiiya kano, khuumala biifukhu bibiindi musaafu.

²⁴Aryo Hezekiya waakabila babaandu tsiwuunwa shikana shitweela (1,000), ni kamasheese bikana musaafu (7,000), bye khuuwaanayo nga tsisaayilo. Ni baakhulu b'omuyiinga nabo baabakabila tsiwuunwa shikana shitweela (1,000), ni kamasheese kumukaanda mutweela (10,000). Bakali khu basaayi babaaba nga sibepyeeluusile ta, nabo baaba nga bepyeeluusa.

²⁵Lituuli lye babaandu boosi babeetsa khukhwaama mu Yuda baaba basangaafu naabi, ni khutubakho basaayi, ni ba Levi, ni babaandu boosi babaama mu Isiraeli, ni banaambo babaaba nga bamenya mu Yuda ni mu Isiraeli, boosi bekhoya luukali naabi.

²⁶Kano kaaba kamayiiya kakaareera kumwikhoyo kumukali naabi mu shiriimba, lwekhuuba abe mu Yerusalemu mwaakhubatsakamo kumwikhoyo nga kuno khukhwaama mu biifukhu bya Solomoni, umusooleli wa Dawudi ta.

²⁷Lwanyuma basaayi ni ba Levi beemikha khu ngaaki, baaloomba Wele khuuwa babaandu tsikhabi. Aryo Wele waawulila khuuloomba khwaabwe, nga ali iyo mu bumenyo bweewe bukhosefu bwe mwikulu.