Read lumasaaba 2 Bye Kimiboolo 31 Bible Online

2 Bye Kimiboolo 31 - lumasaaba bible

2 Bye Kimiboolo 31

¹Nga kamayiiya kano kaweele, babaandu ba Isiraeli boosi babaabawo, beelakayo nga buli mutweela elayo mu shiriimba she waabwe mu Yuda, mu Benyamini, mu Efurayimu, ni mu Manase. Baatsya baafuniaakaka bifwaani bye kamabaale bye ba wele be kamanaambo, baaremakaka kimisiindi kya wele umukhasi Ashera. Baafuniaakaka buuyu bwe khukhwisaayilamo ni bibyeeso byamwo. Lwanyuma lwa bino byoosi, buli mutweela weelayo ingo weewe.

²Hezekiya waawulakamwo basaayi ni ba Levi mu matuuli, nga asiintsiila khu milimo kyaabwe. Lwanyuma waabakabila kimilimo kye khuuwaanayo tsisaayilo isi Umukasya. Waaroborayo ni babaandu babaandi khuuba nga baakaanisa khu Liisaayilo Liikhulu, ni khukhweemba kimyeenya khu bilibwa bye Lisaayilo lyeene.

³Umuyiinga naye umweene wawaanayo khu byaayo byeewe umweene, khuubiraambisa mu khuwaanayo tsisaayilo kumutikhinyi ni angoloobe, ni tsisaayilo tse Kamayiiya ka Sabato, ni Kumweesi Kumushaakha, ni khu mayiiya kakaandi ka buli mwiiko, nga ni sharonebwa mu Makaambila k'Omukasya.

⁴Naluundi waalakila babaandu babaamenyatsaka mu Yerusalemu khuureera biwaanwa bibyaba bye khuuwaanayo isi basaayi ni ba Levi, nio banyalise khuuba ni mbuka imalila ilala khukhwakaanisatsaka Umukasya.

⁵Babaandu boosi ni baawulila shilakilo shino khukhwaama isi umuyiinga, bareeraka shitweela she likhumi khukhwaama khu bibiindu byaabwe byeesi baaba nabyo. Mu byeene ibyo baareereramwo biilyo bibyoomu, iviini, kamafura ke kuusaala ku olivu, bubuukhi bwe ntsukhi, ni biilime bibiindi.

⁶Ni babaandu babaaba nga baayitsa khukhwaama mu Isiraeli khuumenya mu biriimba bye mu Yuda, atweela ni babaandu be mu Yuda mubweene, boosi buli mutweela waareera shitweela shaabwe she likhumi. Bino baabireera khuubyaamisa khu biindu byaabwe nga tsikhaafu, ni kamasheese, ni khukhwaama khu biindu bibiindi bibyaba nga byaawaanibwayo isi Umukasya Wele waabwe. Bino byoosi baabireera baabira mu biyuuyi.

⁷Baarakikha khuubuusila bibiindu byoosi atweela mu Yerusalemu mu mweesi kwe khataru. Khuubuusilisa khuno baakhukhola khukhwoolela ilala kumweesi kukuukhola musaafu.

⁸Ne Hezekiya atweela ni baakhulu beesi aaba ni nabo ni beetsa baabona biwaanwa bino byoosi, basiima naabi Umukasya, atweela ni babaandu ba Isiraeli.

⁹Kila Hezekiya areeba basaayi ni ba Levi bibiwaamba khu biwaanwa biikali bibyoola biryo.

¹⁰Aryo Azariya umusaayi ufuura bukhulu uwaba nga aama mu luruungo lwa Zadoki waamwiilamo ari, “Khukhwaama nga babaandu ni baarakikha khureeraka biwaanwa bino mu Liisaayilo Liikhulu ly'Omukasya, ifwe khwaafuna bye khuulya bibikhumala, lwanyuma byaaramakho biikali naabi. Ilala Umukasya waaweele babaandu beewe tsikhabi tsingali naabi! Bonakho bino byoosi nibyo bibiramilekho!”

¹¹Lwanyuma kila Hezekiya alakila ari baŋoonaŋoone birara bye mu Liisaayilo Liikhulu. Baryo ni baamala khuubiŋoonaŋoona,

¹²babaandu buli mutweela waareeraka shitweela she likhumi ni biwaanwa bibiindi mu Liisaayilo Liikhulu. Hezekiya ni Azariya baarobora Konaniya uwaba umu Levi, khuuba nga niye ubilolelela, nga ayeetebwakho ni wandaaye Shimeyi.

¹³Ni baloleleli babaandi babaaba aasi aabwe baaba nibo Yehiyeli, Azaziya, Nahati, Asaheli, Yerimosi, Yozabadi, Eliyeli, Isimakiya, Mahati, ni Benaaya. Khuurobora babaandu bano khwakholebwa ni Hezekiya atweela ni Azariya, uwaba alolelela byoosi bibyaba mu Liisaayilo Liikhulu lya Wele.

¹⁴Kore umusooleli wa Imuna, uwaba nga aliinda khu shilibwa she Bwaamanyaanga, niye isi baarakho khukhwakaanila biwaanwa byeesi babaandu baareera akhali khuwaanyinyibwa ta isi Wele, ni khuubikabananisamwo isi basaayi ni ba Levi.

¹⁵Kore yuno aaba ni bayeeti babeyikinwa nga nibo bano; Edeni, Miyanimu, Yeshuwa, Shemaaya, Amariya, ni Shekaniya. Bayeeti bano baaba babeyikinwa nga nibo babaakabananisa biwaanwa muungo mwa buli mutweela khu basaayi, mu biriimba byaabwe nga batsya shisiintsa khu shisiintsa she mu shiriimba. Biwaanwa bino baabikabananisa nga sibaawulawo umukhulu namwe umwaana ta.

¹⁶Baakabananisamwo biwaanwa bino isi basaayi ni ba Levi boosi, babaaba boolesa kimiiko kataru ni khuufuurisawo, ne akhuba khusiintsiila khu luruungo lwa buli mutweela ta. Ne baaba bali ni khuuba nga baraamba buli shifukhu mu Liisaayilo Liikhulu, khusiintsiila khu buraambi bweesi buli mutweela aakholatsaka.

¹⁷Basaayi nibo baabawa buuraambi nga basiintsiila khu burone bubwabawo bubwokyesanisa bikuuka byaabwe. Ne ba Levi babaaba nga boolesa kimiiko kabili namwe ni khuufuurisakho awo, baaweebwa kimilimo khusiintsiila khu matuuli keesi baaraambilamo.

¹⁸Buurone bubwabawo bubwokyesanisa bikuuka bye basaayi bwokyesanisa ni baakyelama baabwe atweela ni babaana beene boosi, lwekhuuba nabo baaba nga bali babeyikinwa mu khwiliinda babeene mu bukwalaafu.

¹⁹Hezekiya waaroborayo basaani babaandi, khuuyilaka biilyo ni bibiindu bibiindi bibikanibwa isi basaayi ni ba Levi, babaaba nga bamenya iyo mu maayilo kakebotokhelela biriimba bye mu Yuda. Ne shonyene ndi basaayi bano baaba bali ni khuuba nga bali babetsukhulu ba Aroni, ni ba Levi nabo baaba bali ni khuuba nga bali mu burone bubumanyikhaane.

²⁰Musaambo yino Hezekiya waanyalisa khuukabananisa bibiindu bino mu Yuda mwoosi, waaba nga akhola bibiindu biilayi, luundi bibyaakhila mu moni ts'Omukasya Wele weewe.

²¹Aryo mu buraambi bweewe bwoosi bweesi aakhola mu Liisaayilo Liikhulu lya Wele, ni mu khukhakakho khukhwoolelesa kamakaambila ka Wele, Hezekiya ewaanilayo ilala ni kumwoyo kweewe kwoosi. Lweesho shaakila waaba nga aweebwa tsikhabi mu byeesi akhola byoosi.