Read lumasaaba 2 Bye Kimiboolo 35 Bible Online

2 Bye Kimiboolo 35 - lumasaaba bible

2 Bye Kimiboolo 35

¹Yosiya walaangilila bye khukhwikhoyela Kamayiiya ke Khuubirakho mu Yerusalemu khulw'Omukasya. Shikila khu shifukhu she likhumi na bine, she kumweesi kukuunyoowa, bakhoonyaka kamasheese lwe Kamayiiya kano.

²Khu shifukhu khweene ukhwo, Yosiya waabonela ilala ari akabila basaayi kimilimo kyaabwe, naluundi waababoolelela khuukhola kumulimo kwaabwe buulayi mu Liisaayilo Liikhulu ly'Omukasya.

³Aryo walaanga atweela ba Levi babaakaanisatsaka Umukasya mu bukhosefu, naluundi nga baleekela babaandu kamakaambila keewe, waabalomela ari, “Ni mure Isanduuku iye Kamakaambila mu Liisaayilo Liikhulu lyeesi Solomoni, umusooleli wa Dawudi, umuyiinga wa Isiraeli ombekha. Inywe simwaakha khuukisutsatsaka luundi khu mayi keenywe khuukyaamisa mu shifwo shitweela khuukiyila mu shifwo shishiindi ta. Ari ngana mwibalaayise, mwakaanisatsake Umukasya atweela ni babaandu beewe.

⁴Ni mwirekekhe mwabeene, mutsye mukhole kumulimo kweesi Dawudi atweela ni Solomoni babaalakila khukholatsaka, khuuloondekhana ni bukuuka bweenywe bukyeekhe.

⁵Ni mwikhalemo kamatuuli, lwanyuma mwiyantse mu bifwo byeenywe khuuloondekhana ni tsiingo tsa buli mutweela, nio babaandu ba buli muungo banyale khuufuna khuyeetebwa khukhwaama isi muli, nga bareera biwaanwa byaabwe.

⁶Nga babaandu bareerire lisheese lye Khuubirakho, mwaakha mulikhoonye khukhwipyeeluusa mwabeene, mwiŋoonaŋoone khuuyeeta abo babaakane beetse. Mwaakha khuuloondelela bilakilo byoosi byeesi Umukasya aawa Musa.”

⁷Lwanyuma Yosiya wahaana khukhwaama khu biindu byeewe, kamasheese ni tsimbusi tsitsoola kimikaanda kitaru (30,000), waalooselakho ni tsikhaafu bikana bitaru (3,000), lwe babaandu khuuwaanayo Kamayiiya ke Khuubirakho.

⁸Ni baakhulu babaandi be mu buyiinga bwa Yosiya nabo bawaanayo khu byaayo byaabwe isi babaandu, basaayi, ni isi ba Levi khuuba tsisaayilo, nga mbaawo isi bawaanyiinya ta. Hilukiya, Zekariya, ni Yehiyeli, nibo baaba baakhulu babaaloolelela Liisaayilo Liikhulu, nabo bawaana isi basaayi kamakheese ni tsimbusi bibyoola bikana bibili ni bitoondo bisesaba (2,600), balooselakho tsiwuunwa bitoondo bitaru (300), byeesi baawaanayo khuuba biwaanwa bye kamayiiya ke Khuubirakho.

⁹Konaya, ni babandaaye babili Shemaya ni Nesanaeli, atweela ni Hashabiya, Yeyiyeli, ni Yozabadi, boosi baaba baaraangilisi be ba Levi, nabo baawaanayo kamasheese ni tsimbusi bibyoola bikana biraano (5,000), balooselakho tsikhaafu bitoondo biraano (500), lwe tsisaayilo tsintsoshe.

¹⁰Buli shiindu ni shaba nga shaamalile khaale khuurekekhebwa lwe Kamayiiya ke Khuubirakho, basaayi atweela ni ba Levi beemikha mu bifwo byeesi Yosiya aabalakila khuuraambilamo, khuuloondekhana ni kamatuuli kaabwe.

¹¹Lwanyuma ba Levi baasala kamasheese ke Khuubirakho, basuta kamalasile bakawa basaayi. Basaayi nabo bayila kamalasile kano bakawaanyaka khu sheeso, nga ba Levi nibo beeloosela ni khuubaaka.

¹²Baryo bakabananisamwo biwaanwa bye khukhwoosha isi babaandu khuuloondekhana ni tsiingo tsaabwe, lwanyuma nabo baabiwaanayo isi Umukasya, nga ni sharonebwa mu Shiitabo sha Musa. Baakhola shishiindu nisho shitweela khu khaafu natso.

¹³Lwanyuma boosha kamasheese ke Khuubirakho, nga baloondelela bilakilo bibyabaweebwa; ni biwaanwa bye tsinyama bibyarama, baatsiteekhela busa mu saatsi, tsibinikha, ni khu bifuruuya. Lwanyuma bareera inyama iyo khaangu ibulafu, baakikabila babaandu khuulya.

¹⁴Nga bibiindu byoosi biwa, ba Levi nabo baaba nga beŋoonaŋoonela babeene ni lwe basaayi, biwaanwa bye Khuubirakho, lwekhuuba basaayi, babaaba babetsukhulu ba Aroni, beyukaasa naabi khu shifukhu isho shoosi khuuwakho, nga boosha kiminaawa khu sheeso.

¹⁵Nga kamayiiya kano katsya mu moni, batweela khu Levi baaba nga baŋooŋoonele babeembi be kimyeenya ni baaliindi be khu bilibwa, biwaanwa bye Khuubirakho. Shino shanyalisa babeembi bano khuulekha khurura mu bifwo byaabwe khuuloondekhana ni biilakilo bibyaweebwa ni Dawudi, Asafu, Hemani ni Yedusuni, uwaba umuŋoosi. Ni baaliindi be khu bilibwa nabo baarama mu bifwo byaabwe nga baaliindiile ilala.

¹⁶Kuryo kumukholo kwe Kamayiiya ke Khuubirakho kuno lwe khukhwisaaya Umukasya, kwakholebwa khu shifukhu isho. Tsisaayilo tsintsoshe tsoosi tsokhebwela khu sheeso isi Umukasya, nga umuyiinga Yosiya n'alakila.

¹⁷Babaandu ba Isiraeli boosi babaabawo bekhoyela Kamayiiya kano ke Khuubirakho, atweela ni kamayiiya ke Kumukaati kukukhaabamo kamamela ta, khuumala biifukhu musaafu bibuufu.

¹⁸Abe khukhwaamila ilala khu biifukhu by'omuŋoosi Samweli, yaakhubatsakawo khukhwikhoya khwe Kamayiiya ke Khuubirakho nga kano ta! Mbaawo umuyiinga ukuundi mu Isiraeli uwakholakho Kamayiiya nga kano keesi Yosiya aakhola, nga atubaasa atweela basaayi ni ba Levi, ni babaandu be mu Yerusalemu ni Yuda boosi, atweela ni Isiraeli ta.

¹⁹Kamayiiya kano kaakholebwa mu mwiiko kwe likhumi na shinaane kwe buyiinga bwa Yosiya mu Yuda.

²⁰Lwanyumakho nga Yosiya waamalile khuumiliisa Liisaayilo Liikhulu, umuyiinga wa Misiri Neko waraangilila liiye lyeewe, waatsya khu shiriimba Karikyemishi shishaba khu ndulo khwe luluutsi Efurati khusoolana. Umuyiinga Yosiya naye waatsya ni baselikhale beewe khukhwakaanana ni ba Misiri mu busoolo.

²¹Ne umuyiinga Neko waarumanisa buurume buno isi umuyiinga Yosiya, nga buloma buri, “Shiina sheesi ulikho unganakho, iwe umuyiinga wa Yuda? Ise siindikho ni she khuulomana ni nawe ta. Ise ndi khuutsya khuusoolana ni linaambo liliindi, ni Wele waandakiile ari injubakekho naabi. Wele ali khu lubeka lwase, nashiryo iwe siinga ukhakakho khukhuundeesa, umweene kane akhuwe shitaambiso.”

²²Ne Yosiya niye waalekha khuwuliilisa khureewuula khwa Neko ta, ate nga khuureewula ukhwo khwaama isi Wele umweene! Ne shonyene ndi wakhalawo khukhwiitsisatsisa, waraangilila liiye lyeewe, wakhuumba waatsya mu busoolo khusoolana ni Neko khu musaleela kwa Megido.

²³Nga balikho basoolana, baselikhale be mu Misiri babalasa buyiingo, baalasa umuyiinga Yosiya ni khafumo. Kila alomela babaakaanisi beewe ari, “Nimuundusewo ano! Bandasile khaafumo.”

²⁴Baryo baasuta Yosiya baamurusa mu shikaari sheewe, baamuyila baamura mu shikaari sheewe shishiindi, baamwiisayo i Yerusalemu, isi aafwiila. Lwanyuma baamusiikha aambi ni tsiŋani tse bayiinga. Babaandu boosi be mu Yuda ni Yerusalemu, baalila naabi lwe khuufwa khweewe.

²⁵Umuŋoosi Yeremiya waaronayo kimyeenya kye kamasika khuushebulila Yosiya. Khukhwaamila abweenewo khukhwoolesa ni shaleelo shino, babaandu be mu Yuda ni baaba nga balila Yosiya, baashiraambisa kimyeenya ikyo. Kimyeenya kino kye kamasika baakirona mu Shiitabo she Khukhwiwunamila.

²⁶Bibiindu byoosi byeesi Yosiya aakhola nga ali umuyiinga, nga waareerekho ni buraambi bweewe khukhwiyikina Umukasya, nga aloondelela bibyaronebwa mu Makaambila k'Omukasya,

²⁷khukhwaamila ilala iburakikhilo khukhwoolesa ibwaakamilo, byaaronebwa mu Shiitabo she Bibyaamayo bye Bayiinga ba Isiraeli ni Yuda.