Read lumasaaba 2 Bye Kimiboolo 36 Bible Online

2 Bye Kimiboolo 36 - lumasaaba bible

2 Bye Kimiboolo 36

¹Lwanyuma lwa Yosiya Khuufwa, babaandu ba Yuda baakhola umusooleli weewe Yehoahazi khukhwiila mu bikyele byeewe nga umuyiinga.

²Niye aaba nga oolesa kye bukhulu kamakhumi kabili na kitaru khu mbuka iyo, lwanyuma waawula khuumala kimyeesi kitaru kyonyene, nga asiintsiila mu Yerusalemu.

³Lwanyuma umuyiinga Neko uwa Misiri weetsa waawaamba Yehoahazi, waalakila ari Yuda imusasule kumusolo kukwoola tsikilo bikana bitaru ni bitoondo bine tse feetsa (3,400), ni tsikilo kataru na tsine (34) tse zaabu.

⁴Aryo umuyiinga wa Misiri uyo waarobora wandaaye wa Yehoahazi isi baalaanga bari Eliyakimu, waamwikyelisa umuyiinga wa Yuda, waashuusa lisiina lyeewe lya Eliyakimu waamulaanga ari Yehoyakimu. Lwanyuma Neko waasuta Yehoahazi waamuyila i Misiri nga umubowe weewe.

⁵Yehoyakimu ekyela umuyiinga nga olesa kye bukhulu kamakhumi kabili na kiraano, lwanyuma waawula nga umuyiinga khuumala kimiiko likhumi na mutweela nga asiintsiila i Yerusalemu. Yehoyakimu waaminyaalila Umukasya Wele weewe, nga akhola bye bubwoonaki biikali mu moni tseewe.

⁶Lwanyuma umuyiinga Nebukaduneeza uwe Babulooni weetsa weebwakala Yuda. Aryo wafwaakhila Yehoyakimu, waamubowa kiminyololo, waamuyila i Babulooni.

⁷Nebukaduneeza waasutaka ni bye buyiindifu biikali bibyaba mu Liisaayilo Liikhulu ly'Omukasya, waabiyila waabira mu lubili lweewe i Babulooni.

⁸Bibiindu bibiindi byoosi byeesi Yehoyakimu aakhola nga ali umuyiinga, ni khuuyililamo bibiindu biibi ni bye bubwoonaki byeewe byoosi, byaronebwa mu Shiitabo she Bayiinga ba Isiraeli ni ba Yuda. Umusooleli weewe Yehoyakini waamwilila mu bikyele byeewe nga umuyiinga.

⁹Yehoyakini ekyela umuyiinga nga ali ni kye bukhulu likhumi na shinaane[7], lwanyuma waawula nga umuyiinga khuumala kimyeesi kitaru ni biifukhu likhumi byonyene, nga asiintsiila i Yerusalemu. Yehoyakini waaminyaalila Umukasya nga akhola bye bubwoonaki buukali mu moni tseewe.

¹⁰Kumwiiko nga kuwakho, umuyiinga Nebukaduneeza wa Babulooni, waarumanisa baatsya baamuwaambila Yehoyakini, baamureera i Babulooni, atweela ni bye buyiindifu bibiindi bibyaba mu Liisaayilo Liikhulu. Lwanyuma Nebukaduneeza waarobora wandaaye Zedekiya, waamwikyelisa niye khuuba umuyiinga.

¹¹Zedekiya ekyela umuyiinga nga olesa kye bukhulu kabili na mutweela, lwanyuma waawula nga umuyiinga khuumala kimiiko likhumi na mutweela nga asiintsiila i Yerusalemu.

¹²Naye waaminyaalila Umukasya Wele weewe, nga akhola bye bubwoonaki buukali mu moni tseewe. Ekaanila ilala khushuusakho tsisaambo tseewe tse bubwoonaki, abe yakhaba nga umuŋoosi w'Omukasya Yeremiya aamureewula.

¹³Zedekiya waaminyaalila ni Nebukaduneeza umuyiinga wa Babulooni, akhaba nga aamuwaanyiinya khuukhola shishitsubo mu lisiina lya Wele, she khuuba uwulila. Musaambo iyo, Zedekiya waaba ni shikili, waaloba khushuukha khukhwiila isi Wele wa Isiraeli, naluundi waaminyaalila ni Nebukaduneeza naye.

¹⁴Musaambo niyo ndweela, ni basaayi babaaba baaraangilisi, atweela ni babaandu ba Yuda boosi, boonekhela ilala, baalekha khuba babeyikinwa ta. Baryo baaba nga baloondelela tsisaambo tse kamanaambo kakaabebotokhelela, banyaalutaka Lisaayilo ly'Omukasya, lyaalekha khwaakhila ni khukhwisaayilamo ta.

¹⁵Ne Umukasya Wele we baakuuka baabwe wawaambila babaandu beewe shiisa, atweela ni Lisaayilo lyeewe Likhosefu, waaba nga abarumanila baŋoosi beewe, khuutsyatsaka kimiluundi mikali, nga babareewula lwe bibyoonako byaabwe.

¹⁶Ne babaandu baaba nga batsekhelela luundi nga baatyaabila baŋoosi tsana abo, nga balekelesaka bilomo byaabwe. Musaambo iyo baaba nga balekelesa byeesi Umukasya Wele waabwe, aaba nga ali khuubaboolela, khukhwoolesa khu mbuka isi lirima lyeewe lyamuniinila, waakhalawo khuuwa Yuda ni Yerusalemu shitaambiso.

¹⁷Umukasya waareera umuyiinga wa Babulooni[8], khukhwiitsa khwiibwakala Yerusalemu. Nebukaduneeza waakhoonyaka baahele boosi, nga mbaawo na mutweela isi alekha ta, oba umusaani, oba umukhasi, oba umwaana, oba umukhulu. Musaambo iyo, Umukasya waaba nga abawaanayo boosi mu mukhono kwa Nebukaduneeza, waabeeraka boosi.

¹⁸Lwanyuma waalakila baasutaka bibiindu byoosi bibyaba mu Liisaayilo Liikhulu, baanuulaka bye buyiindifu byoosi bibyaba mu lubili lw'omuyiinga ni baakhulu beewe babaandi. Bino byoosi waabiyaaya, waabiyila i Babulooni.

¹⁹Liiye lya Nebukaduneeza lyoosha Liisaayilo Liikhulu lya Wele, baafuniaakaka ni kutikiiyi kwa Yerusalemu, boosha na buli shombekhe shoosi shishaba mu shiriimba, ni bibiindu bye buyiindifu byoosi.

²⁰Babaandu babaawona baabasuta baabayila i Babulooni nga baabowe, khuuba nga babaakaanisi b'omuyiinga ni basooleli beewe. Byaba biryo khukhwoolesa Pasiya nalyo nilyekyela linaambo lye kamaani.

²¹Biryo bilomo bya Yeremiya umuŋoosi byoolela. Shibala sha Yuda shoosi shekyela shishoomu busa nga shiwolakho. Shiryo shaaba nga ari shoolelesa khuuwola khwe tsisabato tseesi baalyaakhana. Bifukhu byeesi shibala shino shamala nga shili shiryo, byoolesa kimiiko musaafu, nga shoolelesa tsisabato.

²²Mu mwiiko kukuunyoowa kwa Sayiraasi, nga umuyiinga wa Pasiya, Umukasya woolelesa buŋoosi bweesi Yeremiya aakanikha. Umukasya waakhupilisa Sayiraasi, waakhola shikuukuulo, waashira mu burone, waalakila khuushiyila mu buyiinga bweewe bwoosi.

²³Shikuukuulo shino shaloma shiri, “Ise ndi umuyiinga Sayiraasi, uwa Pasiya. Umukasya Wele we likulu, wakholile ise khuuba umuwuli wa buli linaambo lyoosi khu shibala. Waandoboore ise khuumwombekhela Liisaayilo Liikhulu mu Yerusalemu, shishiili mu Yuda. Buli mutweela khusiinywe mweesi uli w'Omukasya, anyala watsyayo mu Yuda khukhola kumulimo kuno. N'Umukasya Wele umweene, kane abe ni nanywe!”