Read lumasaaba 2 Bye Kimiboolo 4 Bible Online

2 Bye Kimiboolo 4 - lumasaaba bible

2 Bye Kimiboolo 4

¹Umuyiinga Solomoni aakholesayo shisheeso sha buroonzi, nga shoolesa tsifuuti 30 buuleeyi, ni tsifuuti ndi 30 buubalaayi, ni tsitsiindi likhumi na tsiraano khuuniina mu ngaaki.

²Naluundi ndi waayabisayo inyaantsa, nga yoolesa buubalaayi khu minwa khu ngaaki tsifuuti 15. Baayaba aasi tsifuuti 7 1/2, ni buubalaayi bwe mukari tsifuuti 45.

³Khu minwa khwe nyaantsa tsana yino, bebotokhelesakho kimibya, nga kili mu bifwaani bibyafwaana nga tsiyeeyi, nga bili mu nyilili tsibili. Ne nga abe mu buli libaanga lye fuuti ndweela, mwabamo bifwaani bye tsiyeeyi tsisesaba. Tsino tsoositsana tsaba mu nyilili nga tsaayibotokhelelakho, nga baatsimaalila khu bweene.

⁴Inyaantsa yino baakyombekha yekhala khu mikoongo kye bifwaani bye tsiyeeyi tsa buroonzi likhumi na tsibili, nga tsaayimikha tsaalolelela ibulafu. Tsitaru khu tsino tsaba tsaalolelela lubeka lwe ngaaki, tsitaru tsalolelela ibukwanyaanga, tsitaru tsalolelela lubeka lwe mwaalo, ni tsitaru tsaaba nga tsaalolelela ibwaamanyaanga.

⁵Litikiiyi lye nyaantsa mu bubalaayi bwalyo lyaba tsi inkyi tsitaru, ni khu minwa khwayo khwafwaana nga khu minwa khwe shikhopo. Naluundi khwaaba nga khufwaanana ni shimuli shishimulikhile buulayi. Inyaantsa yino yaba yoolamo kameetsi kakoola tsi lita kimikaanda kisesaba (60,000).

⁶Solomoni aalakila ndi bakholayo bye khukhwisiingilamo likhumi, mweesi baasiingatsakila biwaanwa. Baakholayo biraano khu lubeka lwe mwaalo we nyaantsa, ni bibiindi biraano khu lubeka lwe ngaaki wayo mweesi babaandu baabusheele baasiingatsakila. Basaayi nibo baaraambisatsaka inyaantsa inyene, lwanyuma lwe khuuwaanayo tsisaayilo.

⁷ Baakholayo ni bye khukhwiimisakho tsitaala bibyoola likhumi bya zaabu khusiintsiila khu ŋoonaŋoona. Solomoni waabira mu Liisaayilo Liikhulu mukari. Biraano waabira khu lubeka lwe mwaalo, ni bibiindi biraano waabira khu lubeka lwe ngaaki.

⁸Lwanyuma ndi baakholayo tsimeetsa likhumi, natso baatsira mu Liisaayilo Liikhulu. Tsiraano baatsira khu lubeka lwe mwaalo, ni tsiraano tsitsiindi baatsira khu lubeka lwe ngaaki. Beelayo ndi baakholayo bye khukhwisiingilamo bya zaabu bibyoola shitoondo shitweela.

⁹Solomoni wombekhesayo lulwaanyi lulwaba lwe basaayi, ni lulwaanyi luluundi luboofu lwe bulafu. Weelayo wakholayo kimilyaango kye khukhwiinjililamo, khu ngaaki baamaalilakho ni buroonzi.

¹⁰Ari inyaantsa tsana bakyombekha aambi ni Liisaayilo Liikhulu, akari e bukwanyaanga ni mwaalo walyo.

¹¹Ndi luundi Huramu waakholayo kamayuungu, ni bye khuyoolela, ni bye khukhwisiingilamo. Aryo Huramu waamaliilisa kumulimo kweesi umuyiinga Solomoni aamulomela khuukhola khu Liisaayilo Liikhulu lya Wele:

¹²tsintseko tsibili, bikofwiila byeesi baara khu ngaaki khwe tsintseko, kiminyololo kyeesi baaronaka khuubonesa bikofwiila buulayi,

¹³kamatuunda buubeya bitoondo bine, baakakhola kaatsuungatsuunga khukhwaama khu minyololo kye khu bikofwiila, nga kali mu nyilili tsibili, naluundi kaaba nga kabiimbilila bikofwiila bibyaba bili khu ngaaki khwe tsintseko.

¹⁴Waakholayo ni bye khukhwiimikhakho nabyo, ni bupwaakhuli bukyeekhe,

¹⁵waatubaasakho ni nyaantsa, ni tsiyeeyi likhumi na tsibili aasi aayo.

¹⁶Huramu waakholayo ni tsinyuungu, ni bye khuuyoolela, ni byeesi basikakho tsinyama, ni bibiindi bibiraambisibwa musaambo yino. Huramu waakhola bibiindu bino byoosi khukhwaama mu buroonzi isi baamala khuupyeluusa buulayi.

¹⁷Umuyiinga aalakila bayeengulila buroonzi mu litila lya Yorudaani, mu liloba lye shibuumba lilyaba akari a Sukosi ni Zereda.

¹⁸Solomoni aaraambisa bibiindu bibyakholebwa khukhwaama mu buroonzi biikali naabi, yaalekha khubawo n'umuundu na mutweela uwamanya busiro bwa buroonzi mweene ta.

¹⁹Aryo Solomoni waakholesa bibiindu byoosi bye mu Liisaayilo Liikhulu nga nibyo; shisheeso she zaabu, ni tsimeetsa khweesi baarekekha kumukaati kumukwalaafu,

²⁰bisiindi bye khuurakho tsitaala, ni tsitaala tsinyene byakholebwa khukhwaama mu zaabu inyene, tsitsaba tse khukhwaburusila iburaangisi we Shiifwo Shishifuura bukhosefu, nga ni sharekekhebwa;

²¹bimuli, tsitaala, ni bitiiyo, atweela byoosi byakholebwa khukhwaama mu zaabu;

²²bibisimisa tsitaala, bye khukhwisiingilamo, bupwakhuli bwe khukhwiimisamo bubaane, ni bisefuruya; byoosi byakholebwa khukhwaama mu zaabu, ni khutubakho kimilyaango kye khukhwiinjila mu Shifwo Shishifuura Bukhosefu, ni mu shiseenge she mukari she mu Liisaayilo Liikhulu.