Read lumasaaba 2 Bye Kimiboolo 6 Bible Online

2 Bye Kimiboolo 6 - lumasaaba bible

2 Bye Kimiboolo 6

¹Lwanyuma Solomoni waaloomba ari, “O Umukasya, iwe waloma uri, kane umenyatsake mu namufweeli umumali ti.

²Ne ari bona ise nakhwombekheele Liisaayilo Liikhulu lye kamaani mweesi kane umenyatsake biilo ni biilo.”

³Lwanyuma umuyiinga waashuukha isi babaandu ba Isiraeli boosi, babaaba nga beemikhile iburaangisi weewe. Aryo wabaloombela nga abawa tsikhabi.

⁴Waaloma ari, “Aruuyibwe naabi Umukasya Wele wa Isiraeli! Niye waliinda shisuubiso sheewe sheesi akholela paapa wase Dawudi. Lwekhuuba niye umweene alomela paapa wase ari,

⁵‘Khukhwaama khu shifukhu khweesi narusila babaandu baase khukhwaama mu shibala she Misiri, abe ise naakhuroboratsakakho shiriimba shoosi mu bikuuka byoosi bya Isiraeli, khuuba shiifwo mweesi Liisaayilo Liikhulu linyala lyombekhebwa, lwe khukhwiisaaya lisiina lyase ta. Naluundi abe ise naakhuroboratsakakho umuundu yeesi, khuuba umuyiinga we babaandu baase ba Isiraeli ta.

⁶Ne ari bona sholeleele, neroboreere Yerusalemu khuuba shiriimba she khukhuuntsisaayilamo, naluundi narobora Dawudi khuuba umuyiinga we babaandu baase ba Isiraeli.’ ”

⁷Solomoni weloosela nga aloma ari, “Paapa wase Dawudi aakana naabi khukhwoombekha Liisaayilo Liikhulu, lye khukhwisaayilamo Umukasya Wele wa Isiraeli.

⁸Ne Umukasya umweene waamulomela ari, ‘Shili shiilayi shiri iwe ukanile naabi khukhwoombekha Liisaayilo Liikhulu, lwe khukhwisaayilamo Umukasya Wele wa Isiraeli;

⁹ne shonyene ndi, singene ibe iwe niye unashikhola ta. Ne umwaana woowo niye ulyoombekha Liisaayilo Liikhulu.’

¹⁰“Ni aluno ari, bona Umukasya woolelesile shisuubiso sheewe sheesi aakhola. Bona ari ise nekyelile umuyiinga wa Isiraeli, khukhwiila mu bikyele bya paapa wase Dawudi. Naluundi bona ise nombakhile Liisaayilo Liikhulu lye khukhwisaayilamo Umukasya Wele wa Isiraeli.

¹¹Mukari mwalyo naareeremo Isanduuku iye Kamakaambila, ate nga nimwo mumuuli Indakaano isi Umukasya akhola ni babaandu ba Isiraeli.”

¹²Lwanyuma Solomoni weemikha iburaangisi we shisheeso sh'Omukasya, nga babaandu ba Isiraeli boosi babusaane, wenyusa kamakhono keewe mu ngaaki.

¹³Biba biryo abe Solomoni waamalile khubuumbayo shituuti sha buroonzi, nga shoolesa buuleeyi tsifuuti 7 1/2, ni buubalaayi nabwo tsifuuti 7 1/2, ni buuleeyi khuuniina mu ngaaki tsifuuti 4 1/2. Shituuti shino ashoombekha akari khu lwaanyi lwe Liisaayilo Liikhulu lwe bulafu. Kila waaniina khu shituuti sheene, iburaangisi we babaandu ba Isiraeli boosi, waafukhamilakho, wenyusa kamakhono keewe mu ngaaki,

¹⁴waaloomba ari, “O Umukasya Wele wa Isiraeli, mbaawo wele ukuundi mwikulu lyoosi, namwe khu shibala, uuli nga iwe ta! Iwe woolelesa bisuubiso byoowo byeesi wakhola isi babaandu boowo, naluundi wookesanisa khuukana khwoowo khukhukhaakama ta, isi babaakaanisi boowo babaakhuwulila iwe, luundi babaali babeyikinwa nga bakhola byeesi iwe ukana.

¹⁵Iwe woolelesile shisuubiso sheesi wakholela paapa wase Dawudi. Iwe wamulomela, ne bona shaleelo shino waashitabusakile.

¹⁶Ni aluno ari, O Umukasya Wele wa Isiraeli, iwe n'ukhole sheesi wasuubisa paapa wase Dawudi, umwakaanisi woowo. Lwekhuuba wamweene wamulomela uri, ilibatsakawo mutweela khukhwaama mu baana beewe khuuba umuyiinga wa Isiraeli, siinga baaba nga baloondelela kamakaambila koowo nga Dawudi umweene n'akhola.

¹⁷Shaleelo shino, O Umukasya Wele wa Isiraeli, niwolelesile ilala khusuubisa khuno khweesi wakholela umwakaanisi woowo Dawudi.

¹⁸“Ne ilala iwe, O Wele, unyala waamenya khu shibala ni babaandu? Ne ari isi likulu lyoosi liikali liryo likhanyaliile khuukhubisa iwe ta, Lisaayilo lino Likhulu lyeesi ise noombakhile linanyalisa liryeena!

¹⁹Ne ikhuloomba iwe uwuliilise khuuloomba khwase khuno, O Umukasya Wele wase. Wulila khuulila khwase ni khuuloomba khuno khweesi ise, umwakaanisi woowo indi khuureera isi iwe.

²⁰Lino lili Liisaayilo Liikhulu lyeesi wiroboreere uri babaandu bakhwisaayilemo iwe. Ari ikhuloomba ndi wamweene ulilolelele buulayi, shiilo ni kumuusi. Naluundi ikhuloomba ndi uwuliilisatsaka buulayi, nga weemikhile iyo mwikulu lyoowo, buli lweesi khukhuloombela. Ne nga waawuliile, wiyakhilatsaka bibyoonako byeefwe.

²¹Ikhuloomba ndi uwuliilisatsake buli lweesi ise umwakaanisi woowo, atweela ni babaandu boowo ba Isiraeli boosi, ni khuba nga khwaakhuloombile nga khweemikhile mu shifwo shino. Ilala uwuliilisatsaka nga uli iyo mwikulu lyoowo isi umenya. Ne nga waawuliile, wiyakhilatsaka bibyoonako byeefwe.

²²“Siinga ibawo umuundu yeesi uwoonakisa isi uwashe, ne shaamwaakhila khukhwiitsa akhole shishitsubo iburaangisi we shisheeso shino shishiili mu Lisaayilo lino Likhulu, nga aloma ari s'ali ni kumusaango ta,

²³ikhuloomba uwulilatsake nga uli iyo mwikulu, ukhalewo shishiili shaŋali akari e babaandu boowo. Nio lwanyuma uwe shitaambiso uyo isi kumusaango kufuura, ne uyo ukhalikho musaango, alekhuulibwe atsye lwe bukwalaafu bweewe.

²⁴“Siinga babaandu boowo ba Isiraeli baatsya mu busoolo ne baawulibwa ni baasiku baabwe, lwekhuuba boonakile is'uli, ne nga bakoboole, beetsile khukuukuula lisiina lyoowo, luundi baloomba is'uli khuubeyakhila mu Lisaayilo lino Likhosefu,

²⁵ubawulilatsaka nga uli iyo mwikulu, wiyakhile bibyoonako byaabwe. Lwanyuma ubakobose mu shibala shino shishiili shishaabwe sheesi wawa baakuuka baabwe.

²⁶“Siinga likulu liyiikala, waalekha khubawa ifula ta, lwekhuuba babaandu boowo boonakisile is'uli. Ne siinga beetsa baakuukuula lisiina lyoowo, nga bebiiyisa bibyoonako byaabwe mu Liisaayilo Liikhulu lino, baaloomba mu lisiina lyoowo,

²⁷ubawulilatsaka nga uli iyo mwikulu, wiyakhile bibyoonako byaabwe. Babaandu ba Isiraeli bali babaakaanisi boowo, nashiryo n'ubaleekele isaambo iye khuumenya mu bukwalaafu. Lwanyuma ubasiindikhile ifula khu shibala shino, sheesi wabawa khuuba shishaabwe.

²⁸“Ne siinga intsala ikwawo mu shibala, namwe buulwaale bwe baakali, namwe buulwaale bwe biilime, namwe nga tsiisike tsakwiile tseetsa tsoonakisa biilime, namwe nga baasiku beetsile khukhwibwakaala babaandu boowo mu biriimba byaabwe, namwe babaandu boowo baafunile buulwaale bwe saambo tsoosi.

²⁹Ne siinga babaandu boowo bawaanayo khuuloomba khwaabwe lwe bukosi buno bubuubakwiilekho, namwe kumutaambo kwaabwe, nga beenyusa kamakhono kaabwe mu ngaaki, khulolelela Lisaayilo lino Likhulu,

³⁰ikhuloomba uwulile khuloomba khuno nga uli iyo mwikulu isi umenya. Iwe wenyene niye uwamanya bibyambaaso bibiili mu mwoyo kwa buli muundu. Nashiryo ikhuloomba ukabilatsake babaandu boowo, khusiintsiila khu byeesi bakhola, ni byeesi bambaasa mu myoyo kyaabwe.

³¹Isho kane shikile babaandu boowo bakhwiisaaye, luundi bakyeende nga iwe n'ukana, imbuka yoosi isi kane bamenye mu shibala shino sheesi wakabila baakuuka baabwe.

³²“Siinga babaandu banaambo bawulila bibikhuwaamba khwiiwe, ni khu buraambi bwoowo bwe kamakaanga, ne beetsa khukhwaama mu manaambo ke aleeyi ako, khukhwiisaaya iwe, mu Lisaayilo lino Likhulu,

³³ikhuloomba ndi ubawuliilise nga uli mwikulu lyoowo mweesi umenya, ubeelemo khuuloomba khwaabwe. Isho shikhaakyile babaandu boosi be khu shibala bakhumanye luundi bakhwiisaaye iwe, nga babaandu boowo ba Isiraeli ni bakhola. Naluundi isho shikhaakyile nibo bamanye lwashiina ise nombakhile Lisaayilo lino Likhulu lwe khukhuweelamo iwe shiriifwa.

³⁴“Indi siinga ulakila babaandu boowo khuutsya khusoolanisa baasiku baabwe, ne siinga beemikha baloolelela Lisaayilo lino Likhulu lyeesi ise ikhwombakhiile iwe, liliili mu shiriimba shino sheesi wamweene weeroborera, baakhwiisaaya iwe,

³⁵ubawuliilisatsaka nga uli mu likulu lyoowo iyo isi umenya, ubawe khuuwula baasiku baabwe.

³⁶“Buli muundu oneka. Ne siinga babaandu boowo boonakisa isi uli, ni nawe uryo waabakhalila naabi waalekha baasiku baabwe baabayila mu bubowe mu shibala she aleeyi.

³⁷Ne ni baba nga bali mu shibala isho, baashuukha baakobola isi uli, nga bebiiyisa, nga baloomba khuubeyakhila, nga baloma bari, ‘Khwayooneka, khwakhola buubi naabi.’

³⁸Nibo ni baba nga baashuukhiile ilala ni kumwoyo kwaabwe kwoosi, ni buulamu bwaabwe bwoosi, ne baalosa tsimoni tsaabwe isi shibala shaabwe shino sheesi wawa bakuuka baabwe, ni isi shiriimba shino sheesi wamweene weroborera, ni isi Lisaayilo lino Likhulu lyeesi nombakhile lwe khuukhwiisaayilamo iwe,

³⁹ikhuloomba ndi uwulilatsake khuuloomba khwaabwe nga uli iyo mwikulu lyoowo iyo isi umenya. Ubawulilatsaka khukhwiilootsa khwaabwe, ubeyakhile babaandu boowo babaaba nga boonakisile isi iwe.

⁴⁰“Ni na ari, O Umukasya Wele, rekeeresa buulayi, uwulile khuuloomba khweefwe khweesi khuli khuwaanayo mu Lisaayilo lino Likhulu.

⁴¹Naluundi ari, O Umukasya Wele, yinyukha winjile mu shifwo shoowo shino she khuwolelamo, mweesi khumalile khuura Isaanduuku yoowo ikhosefu, iyokesanisa kamaani koowo. Inoomba ndi khali basaayi boowo, O Umukasya Wele, beetsile nga baakwaarisibwile ni buwonesi bwe khuwonesa babaandu boowo. Khayo abo babaali bakhosefu bekhoyele mu biilayi byeesi ubakholeele.

⁴²O Umukasya Wele, n'ushebulilatsake umurobore woowo! N'ushebulilatsake khuukana khwoowo khukhuukhawawo ta, khweesi waba nakhwo isi umwakaanisi woowo Dawudi.”