Read lumasaaba Ezira 1 Bible Online

Ezira 1 - lumasaaba bible

Ezira 1

¹Mu mwiiko kukuunyoowa, nga Sayiraasi ali umuyiinga wa Pasiya, Umukasya woolelesa buuŋoosi bwa Yeremiya bweesi aaloma ari kane afukurise kumwoyo kwa Sayiraasi, khuubona ari olelesa buŋoosi buno nga abura mu buwaandiikhe, ni khuubwakaanisa buli aandu oosi mu buyiinga bweewe.

²“Lino lili likaambila khukhwaama isi ise umuyiinga Sayiraasi: Umukasya Wele we likulu waayifuumbasa ise buyiinga bwe khu shibala bwoosi, naluundi waayindobora ise khuumwoombekhela niye Liisaayilo Liikhulu mu Yerusalemu she mu Yuda.

³Inoomba ndi khali Wele abeele ni nanywe babaandu beewe mweesi. Buli mutweela khuusiinywe ali ni khuukobolayo i Yerusalemu, khuutsya khwoombekha bushaakha Lisaayilo ly'Omukasya, Wele wa Isiraeli, uuli Wele uwisaayibwa mu Yerusalemu.

⁴Nashiryo babaandu boosi babaali mu bifwo byoosi mweesi ba Isiraeli babaaramawo bamenya, bali ni khuubawa bibiindu bibinakanibwa nga ifeetsa, ni zaabu, atweela ni bibiindu bibiindi, ni bibyaayo, ni biwaanwa bibiindi bye khukhwoombekha bushaakha Liisaayilo Liikhulu lya Wele mu Yerusalemu.”

⁵Isho shaakila baaraangilisi be bukuuka bukyeekhe mu Yuda ni mu Benyamini, atweela ni basaayi ni ba Levi, na buli mutweela uwewulila ari Wele ali khuumutsuntsumilisa; boosi benyukha aasi beŋoonaŋoona khuutsya i Yerusalemu, khuutsya khwoombekha bushaakha Liisaayilo Liikhulu ly'Omukasya.

⁶Babaandu boosi babaaba babesanwa baabwe baabayeeta nga babawa bibiindu bye feetsa, i zaabu, ni bibiindu biindi biikali ni bibyaayo, nga baareerekho ni biwaanwa bye beeyi ingali, ni khuutubakho biwaanwa bye khuuwaanayo mu Liisaayilo Liikhulu.

⁷Umuyiinga Sayiraasi waakobosakayo ni bibiindu abe byeesi Nebukaduneeza aasuta khukhwaama mu Yerusalemu, waabireera waabira mu lisaayilo lye ba wele beewe.

⁸Sayiraasi aabyakaanisa isi Misiredaasi, uwaba nga akhulila libiikhilo lyeewe likhulu, naye waabibalilila buulayi, waabiwaanayo isi Sheshibazari, uwaba gafana wa Yuda.

⁹Buukali bwe bibiindu ibyo bwaba buri: Tsiselo tse zaabu kamakhumi kataru (30); tsiselo tse feetsa shikana shitweela (1,000) tsitsiindi kamakhumi kabili na syeenda (29),

¹⁰ni bibuumba bye zaabu kamakhumi kataru (30), bibuumba bye feetsa bitoondo bine ni likhumi (410), ni bibiraambisibwa bibiindi shikana shitweela (1,000).

¹¹Khuuyiilila atweela tsiselo ni bibuumba ni khuutubakho bibiraambisibwa bibiindi bye zaabu ni feetsa byaba bikana biraano ni bitoondo bine (5,400).