Read lumasaaba Ezira 3 Bible Online

Ezira 3 - lumasaaba bible

Ezira 3

¹Mu mweesi kukuukhola musaafu, babaandu ba Isiraeli baaba nga ari bamenya mu biriimba byaabwe. Lwanyuma beetsa atweela boosi mu Yerusalemu.

²Lwanyuma Yeshuwa umusooleli wa Yozadaki, nga ali atweela ni basaayi basheewe, ni Zelubabeli umusooleli wa Sheyalityeli, atweela ni baalebe beewe, baarakikha khukhwoombekha bushaakha shisheeso sha Wele wa Isiraeli. Isho shaakila shaabanyalisisa khuuwaanayo tsisaayilo khubweene khwo, nga baloondelela biilakilo bya Wele byeesi aawa Musa.

³Baryo boombekha shisheeso mu shifwo mweesi shaba makiboole, abe yakhaba nga aabawo khuurya khuukali lwe babaandu babaaba nga bamenyayo khaale mu bifwo ibyo. Nga shaweele khukhwoombakhibwa, booshatsakilakho biwaanwa isi Umukasya buli kumutikhinyi ni buli angoloobe.

⁴Belooselatsaka khukhwiikhoyela Kamayiiya ke Tsiweema, nga baloondelela bibyaronebwa, mu khuwaanatsakayo tsisaayilo tsitsaakhila khu buli shifukhu.

⁵Lwanyuma lweebyo, baaba nga bawaanatsakayo biwaanwa bya busheele, nga bye khushebulila Kumweesi Kumushaakha, ni biwaanwa bibiindi byeesi Umukasya aabalakila khukhwoosha. Baryo buli mutweela waaba nga areeratsaka biwaanwa isi Umukasya akhali khuuwaanyinyibwa ta.

⁶Khukhwaamila ilala khu shifukhu shishinyoowa mu mweesi kukhola musaafu, babaandu baarakikha khukhwooshatsaka biwaanwa isi Umukasya, abe yakhaba nga kumusiingi kwe Liisaayilo Liikhulu kwaba nga kushiili khuurakikhibwa ta.

⁷Lwanyuma baawa baboombakhi ni baabeetsi be tsimbaawo tsinusu, naluundi baawa babaandu be mu Sidoni, ni be mu Tuulo biilyo, ni bye khuunywa, ni kamafura ke khuuteekha, nio banyalise khuubareerera bikyeenga bye kimisaala kedari khukhwaama i Lebanooni khuukireera i Yopa. Bino byoosi baabikhola khuusiintsiila khu biilakilo byeesi umuyiinga Sayiraasi, uwa Pasiya aabawa.

⁸Baryo mu mweesi kwe khabili, kwe mu mwiiko kwe khabili, nga nio babaandu balikoboole i Yerusalemu, khukhwaama mu Babulooni, baarakikha kumulimo kwe khukhwoombekha Liisaayilo Liikhulu. Zelubabeli umusooleli wa Sheyalityeli, Yeshuwa umusooleli wa Yozadaki, atweela ni babandaayabwe basaayi, ni ba Levi, ni khuutubakho babaandu boosi babaakobola khukhwaama mu bubowe, baarakikha khuuraamba. Baaroboraka ni ba Levi abe baboolesa kimiiko kabili kye bukhulu ni khuuniina angaaki, khuuba nga nibo babaaloolelela mitweela khu milimo kikyakholebwa.

⁹Baryo ba Levi nga nibo Yeshuwa ni basooleli beewe, atweela ni baalebe beewe, ni khuutubakho Kadimiyeli ni basooleli beewe, atweela ni basooleli ba Henadadi ni basooleli baabwe ni babandaayabwe, ni ba Levi boosi, betubaasila atweela mu khuloolelela ni khuukhupilisa abo babaaba baraamba kimilimo.

¹⁰Baboombekhi ni baaba nga baamalile khukhwoombekha kumusiingi kwe Liisaayilo Liikhulu, basaayi bakwaara bikwaaro byaabwe, beetsa nga bafuura tsikhoombi, ni ba Levi, khukhwaama muungo mwa Asafu, baaruuya Umukasya nga basakayisa bibisakaya. Boosi baaba nga baloondelela biilakilo byeesi umuyiinga Dawudi aabalekhela.

¹¹Baryo baaba nga baruuya Umukasya, nga bamusiima, nga baalala bamala ne babaandi beelamwo bari: “Umukasya ali umulayi! Lwekhuuba khuukana khweewe sikhuwawo, naluundi sikhuweelela khu Isiraeli ta.” Baryo babaandu boosi baalookha ni kamaani keene, nga baaruuya Umukasya, khuumusiima lwe kumulimo kwe kumusiingi kukwaba nga kwaarakikhibwile.

¹²Ne baakali khu basaayi ni ba Levi, babaaba baasakhulu, atweela ni baaraangilisi be tsiingo, babaabonakho khu Liisaayilo Liikhulu lilyanyoowa, baalila luukali naabi, nga ni baabona kumusiingi kwe Lisaayilo lino Likhulu nga kwombekhebwa. Ne babaandu babaandi nibo baaba nga bakhupa liyoombo liikali ni kumwikhoyo kumukali.

¹³Liyoombo ilyo lyaba liikali naabi, nga mbaawo umuundu na mutweela unyala waawulawo liyoombo lye kumwikhoyo ni liyoombo lye kamasika ta. Lutiri lwabyo lwaba luwulilikhila aleeyi naabi.