Read lumasaaba Ezira 5 Bible Online

Ezira 5 - lumasaaba bible

Ezira 5

¹Lwanyumakho baŋoosi babili Hagayi, ni Zekariya umusooleli wa Ido, baatsya baakanikha bye buŋoosi isi Bayudaaya babaaba mu Yuda ni mu Yerusalemu, mu lisiina lya Wele wa Isiraeli uwaba ali ni nabo.

²Baryo Zerubabeli umusooleli wa Sheyalityeli, ni Yeshuwa umusooleli wa Yozadaki, benyukhilamwo baatsya baakhupilisa kumulimo khu Liisaayilo Liikhulu lya Wele khuurakikha luundi mu Yerusalemu. Ni baŋoosi bano baabatsakawo nga bakhupilisa babaandu, luundi nga babayeeta.

³Khu mbuka nyene iyo, gafana Tatenayi uwe Bwaamanyaanga we Luluutsi Efurati, ni Shesari Bozenayi, atweela ni baakhulu bashaabwe babaandi, baatsya i Yerusalemu. Kila batsya isi babaandu babareeba bari, “Naanu uwabaweele inywe buunyala bwe khukhwoombekha bushaakha Lisaayilo lino Likhulu, ni khuukobosawo shishombekhe shino?”

⁴Baabareeba luundi bari babawe kamasiina ke baraambi babaaba nga bali khuuraamba kumulimo ukwo.

⁵Ne Wele umweene aaba nga niye uuli khuuliinda baaraangilisi be Bayudaaya. Isho shaakila gafana atweela ni baakhulu basheewe baalekha khwaakamisa kumulimo kwe khukhwoombekha Liisaayilo Liikhulu ta. Baaba baliinda bari kamakhuuwa kano katsye koole wa Dariyaasi, nio babone sheesi anyala waabeelamwo, ni kamakyesi keesi anyala wabawa.

⁶Gafana Tatenayi uwe bisiintsa bibyesaane ni Luluutsi Efurati, Shesari Bozenayi, atweela ni baawi baabwe be kamakyesi, baasiindikha kamakhuuwa kano isi Dariyaasi.

⁷Nga kaloma kari: Isi Umuyiinga Dariyaasi, khwaakhusheesile ni lukoosi luukali naabi!

⁸O Umuyiinga iwe n'ushimanye uri, ifwe khwatsya mu shisiintsa sha Yuda, khwoola isi Liisaayilo Liikhulu lya Wele uwe kamaani lilikho lyombekhebwa. Babaandu balikho boombekha Lisaayilo ilyo Likhulu, nga baraambisa kamabaale kamaboofu naabi, ni tsimbaawo nga batsira khu matikiiyi. Babaandu boosi balikho baraamba ni kamaani naabi, ni shishoombekhe shilikho shiniinaka khaangu naabi.

⁹Kila khutsya khureeba basaakhulu babaaba nga bakhulila kumulimo ukwo, khwaabareeba bakhuboolele naanu uwabawa luukusa khukhwoombekha bushaakha Liisaayilo Liikhulu.

¹⁰Naluundi khwaabareeba kamasiina ke baaraangilisi baabwe, nio nafwe khunyale khuukarona, khukaakaanise isi uli.

¹¹Nabo baakhwiilamwo bari, nibo bali busa babaakaanisi ba Wele, uwula likulu ni shibala. Naluundi baaloma bari balikho boombekha bushaakha Liisaayilo Liikhulu lilyoombekhebwa kimiiko kye khaale kimikali busa, n'umuyiinga umukhulu ufuura bukhulu mu Isiraeli

¹²Baakhuboolela bari bakuuka baabwe baakhalasa naabi Wele, uwula likulu, shaakila waabawaanayo mu mikhono kya Nebukaduneeza umu Kaludiyani, uwaba umuyiinga wa Babulooni, naye woonakisaka ni Liisaayilo Liikhulu lyoosi, waabayila nga baabowe mu Babulooni.

¹³Ne mu mwiiko kukuunyoowa kwa Sayiraasi, umuyiinga wa Babulooni, Sayiraasi mweene aarusa shiilakilo she khukhwoombekha bushaakha Liisaayilo Liikhulu.

¹⁴Ni bibiindu bye zaabu, ni bya feetsa bye mu Liisaayilo Liikhulu lya Wele, byeesi Nebukaduneeza aayila waara mu lisaayilo lya wele weewe i Babulooni, Sayiraasi aalakila baabikobosa baabiwaambisa Sheshibazari, isi aarobora khuuba gafana wa Yuda.

¹⁵Naluundi baakhuboolela bari, aalakila gafana yuno khuuyila bibiindu bino, abikobose mu Liisaayilo Liikhulu mu Yerusalemu, ni khuubona ari Lisaayilo lyeene Likhulu lyoombekhebwa bushaakha mu shifwo mweesi lyaba makiboole.

¹⁶Shiilakilo isho shaakila Sheshibazari waatsya i Yerusalemu, waarakikhisa khukhwoombekha kumusiingi kwe Liisaayilo Liikhulu, ni kumulimo kushiitsya mu moni.

¹⁷Nashiryo, O Umuyiinga, siinga shiba shibonekha buulayi isi uli, lakila baweentselese mu byaronebwa biikhale, babone oba nga ilala umuyiinga Sayiraasi aawa biilakilo bye khukhwoombekha luundi Lisaayilo lya Wele mu Yerusalemu. Nafwe kane khubone khuri khukhola shishinyalikha shoosi.