Read lumasaaba Ezira 6 Bible Online

Ezira 6 - lumasaaba bible

Ezira 6

¹Lwanyuma umuyiinga Dariyaasi waarusa shiilakilo ari baweentselese buulayi mu byaronebwa biikhale bibyaba byaabiikhibwa mu Babulooni.

²Mu shiriimba Ekibatana, shishaba shiriimba shikhulu mu shisiintsa sha Mediya, aabawo burone bubwanyoolekhana, nga buloma buri: “Buurone bwa buraawa bwokyesa buri,

³mu mwiiko kwa Sayiraasi kukuunyoowa, nga ali umuyiinga, aawa shiilakilo khukhwoombekha bushaakha Liisaayilo Liikhulu lya Wele mu Yerusalemu, mweesi bali ni khuuwaanilayo tsisaayilo ni biwaanwa bibiindi bye khukhwoosha. Lisaayilo lino Likhulu nga lili ni khukhwoolesa tsimita kamakhumi kabili na musaafu (27) buuleeyi khuuniina mu ngaaki, ni tsimita kamakhumi kabili na musaafu (27) buubalaayi,

⁴nga khulikho tsileeya tse kamabaale tsitaru, ni leeya ndweela iye tsimbaawo. Libiikhilo lye buyiinga nilyo liliili ni khuusasulila bibiindu bino.

⁵Lwanyuma mwiisakeyo bibiindu bye zaabu, ni bye feetsa byeesi Nebukaduneeza aareera i Babulooni khukhwaama mu Liisaayilo Liikhulu, mubibiikhe mu bifwo byabyo bibyeene.”

⁶Umuyiinga Dariyaasi waarumanisa buurume buno: “Isi Tatenayi, gafana we shisiintsa she bukwanyaanga wa Efurati, ni Shesari Bozenayi, atweela ni baawi beenywe be kamakyesi; mwaakha khuubona muri simuba aambi ni kumulimo kwe khukhwoombekha Liisaayilo Liikhulu ta.

⁷Mukhekhupila mu mulimo kuno kwe khukhwoombekha Lisaayilo lya Wele ta. Mulekha gafana we Bayudaaya, ni baasakhalu baabwe khukhwoombekha bushaakha Lisaayilo mu shifwo mweesi lyaba makiboole, mukhabakhaangabisa ta.

⁸Ni khuurakikhilawo, indusa shiilakilo ndi muyeete baaraangilisi bano mu khwoombekha bushaakha Lisaayilo lya Wele. Inywe mwaakha khuubasasulilawo tsinusu khukhwaama khu misolo kikibuusanisibwa khukhwaama i Bukwanyaanga wa Efurati, nio kumulimo kuno kulekhe khukyelewa ta.

⁹Ni bibiindu bibiindi bibikanibwa ni basaayi mu Yerusalemu lwe khuuwaanayo tsisaayilo isi Wele we mwikulu, nga nibyo: tsiwuunwa tsisooleli, kamamiiku, kamasheese, ni khuutubaasakho iŋaano, kumuunyu, iviini, ni kamafura ke kumusabibu; mwaakha khuubibaweelawo khaangu naabi.

¹⁰Ingana mubawe bibiindu bino byoosi, nio nabo banyalise khuuwaanayo tsisaayilo isi Wele we mwikulu, shibanyalisise khuukhunoombela ise umuyiinga ni muungo mwase.

¹¹Naluundi indusa shiilakilo shishiindi ndi, siinga ibawo umuundu yeesi ushuusakho likaambila lino, muli ni khukhwiinyusakho kumurongoolo khukhwaama khu ntsu yeewe, mukusongoole khu lubeka lutweela, mumuwune kumubiremo, atsuungatsuungekho. Ni lwe lomo nga yino, intsu yeewe yaakha khufuniaakibwa yikyele busa nga shibilikye busa.

¹²Inoomba Wele uwisaayibwa mu Yerusalemu arusilewo ilala umuyiinga yeesi, namwe linaambo lyoosi lilinyala lyashuusamo shiilakilo shino sheesi imbaweele, namwe uyo ukhakakho khufuniaaka Lisaayilo Likhulu ilyo luundi. Ise Dariyaasi samweene niye uubaweele biilakilo bino, naluundi isuubila ndi buli mutweela kane abiloondelele ni bubwiitsiliilisi buukali naabi.”

¹³Lwanyuma gafana Tatenaayi, Shesari Bozenayi, atweela ni baawi baabwe be kamakyesi, baakhola sheesi umuyiinga Dariyaasi aabalakila ni bubwiitsiliilisi bukali naabi.

¹⁴Baryo baaraangilisi be Bayudaaya beeloosela buulayi naabi khuukhola kumulimo kwe khukhwoombekha bushaakha Liisaayilo Liikhulu, nga umuŋoosi Hagayi ni Zekariya umusooleli wa Ido babaabeesamwo kamaani ni biilomo bye buŋoosi. Baryo baamaliilisa kumulimo kwe khukhwoombekha Liisaayilo Liikhulu, nga baloondelela liikaambila lya Wele, ni biilakilo bya Sayiraasi, Dariyaasi, atweela ni Aritatsatsesi umuyiinga wa Pasiya.

¹⁵Kuryo kumulimo kwe khukhwoombekha Liisaayilo Liikhulu kwaamaliilisibwa khu shifukhu she khataru, mu mweesi kwa Adari, mu mwiiko kwe khasesaba, kwe buwuli bw'omuyiinga Dariyaasi.

¹⁶Baryo babaandu ba Isiraeli boosi, nga mulimo basaayi, ba Levi, na buli mutweela yeesi uwakobola khukhwaama mu bubowe, baaba nga betsuule kumwiikhoyo, nga bekhoyela kumukholo kwe khuuwaanayo Lisaayilo lya Wele Likhulu.

¹⁷Khu mukholo kuno kwe khuuwaanayo Lisaayilo Liikhulu, baawaanayo tsiwuunwa shitoondo shitweela (100), kamasheese bitoondo bibili (200), kamasheese kamasooleli bitoondo bine (400), nga tsisaayilo. Naluundi baawaanayo ni tsindurume likhumi na tsibili nga tsisaayilo tse bibyoonako bye bikuuka likhumi na bibili bye ba Isiraeli.

¹⁸Baryo beesawo basaayi be ba Levi, khuukhola kimilimo kyaabwe kya buraawa mu Yerusalemu, nga baloondelela biilakilo byeesi Musa aabaronela.

¹⁹Khu shifukhu she likhumi na bine, mu mweesi kukuunyoowa, babaandu boosi babaakobolaka khukhwaama mu bubowe, bekhoyela kamayiiya ke Khuubirakho.

²⁰Lwekhuuba basaayi atweela ni ba Levi baaba nga bekhosesele, nga ari abe baakhila khuuraangilila khukhwiisaaya. Baryo baalala khu nibo baakhoonya Kamasheese ke Khuubirakho khulwe babaandu babaakobolaka, ni basaayi bashaabwe babaandi, ni khuyililamwo babeene.

²¹Babaandu ba Isiraeli babeene babaakobolaka khukhwaama mu bubowe baalya tsisaayilo tsino, atweela ni babesanwa baabwe, babaaba nga baalekha tsisaambo tsaabwe tse kamanaambo kakaandi, nio banyalise khukhwiisaaya Umukasya Wele wa Isiraeli.

²²Baryo khuumala biifukhu musaafu bibuufu, baaba nga beekhoyela Kamayiiya ke Kumukaati kukuukhasiila ta. Babaandu boosi baaba ni kumwikhoyo kumukali lwekhuuba Umukasya Wele wa Isiraeli aashuusa kumwoyo kw'omuyiinga wa Asiriya, waabawaambila shiisa nga abayeeta khukhwoombekha Lisaayilo Likhulu.