Read lumasaaba Ezira 7 Bible Online

Ezira 7 - lumasaaba bible

Ezira 7

¹Lwanyuma lwa bino byoosi, nga umuyiinga Aritatsatsesi niye uwula Pasiya, Ezira umusooleli wa Sheraya, umusooleli wa Azariya, umusooleli wa Hilukiya,

²umusooleli wa Shalumu, umusooleli wa Zadoki, umusooleli wa Ahitubu,

³umusooleli wa Amariya, umusooleli wa Azariya, umusooleli wa Merayosi,

⁴umusooleli wa Zerahiya, umusooleli wa Uzi, umusooleli wa Buki,

⁵umusooleli wa Abishuwa, umusooleli wa Finehasi, umusooleli Eliyazaari, umusooleli Aroni, uwaba umusaayi umukhulu.

⁶Ezira waarurayo weetsa khukhwaama mu Babulooni. Niye aaba umumanyilifu naabi mu buleekeli bwe kamakaambila ka Musa, keesi Umukasya Wele wa Isiraeli aabawa. Umuyiinga aaba waabaweele byoosi byeesi baamuloomba, lwekhuuba kumukhono kw'Omukasya kwaba khu niye.

⁷Bayudaaya babaandi nabo beetsa, nga mulimo basaayi, ba Levi, babeembi be kimyeenya, baaliindi be Lisaayilo Likhulu, atweela ni babaakaanisi be mu Lisaayilo. Bano boosi baakobolaka mu Yerusalemu atweela ni Ezira, mu mwiiko kwe kumusaafu, kwe buwuli bwa Aritatsatsesi.

⁸Ne Ezira niye oolayo mu Yerusalemu mu mweesi kwe kharaano, kwe mu mwiiko kweene kwe kumusaafu.

⁹Khukhwaama i Babulooni, lukyeendo aarurakikha khu shifukhu shishinyoowa, she kumweesi kukuunyoowa, shaakila woola i Yerusalemu khu shifukhu shishinyoowa she kumweesi kwe kharaano. Bino byoosi byaba biryo lwekhuuba kumukhono kwe bubweela bwa Wele kwaba khu niye.

¹⁰Ezira aamenya buulamu bweewe bwoosi nga eyika, luundi nga aloondelela bibyaronebwa mu makaambila k'Omukasya, ate nga akaleekela babaandu ba Isiraeli babaandi.

¹¹Ezira, aaba umusaayi, luundi umusaani umuleekele naabi mu bye kamakaambila ni biilakilo byeesi Umukasya Wele aawa ba Isiraeli. Buno nibwo buurone bweesi umuyiinga Aritatsatsesi aakaanisa isi ali:

¹²Ise umuyiinga umukhulu Aritatsatsesi, ikhusheesa naabi iwe umusaayi Ezira, luundi umuleekeli we Kamakaambila ka Wele uwe likulu.

¹³Indusa shiilakilo ndi, umuundu yeesi mu baandu ba Isiraeli babaamenya mu buyiinga, oba umusaayi, namwe umu Levi, ukana khuukhwiilayo i Yerusalemu atweela ni nawe, anyala waatsya.

¹⁴Lwekhuuba ise atweela ni baawi baase be kamakyesi musaafu khwaafukiilisanile khuri, mutsye muweentselese bibiwaamba khu Yuda, ni Yerusalemu, ni bibiindu bibiwaamba khu makaambila ka Wele weenywe, khuubona muri mukaloondelela.

¹⁵Ne ndi ate nga mutsya, muli ni khuusutakho izaabu ni feetsa, byeesi ise umuyiinga atweela ni baawi baase be kamakyesi khuli khuwaanayo isi Wele wa Isiraeli, uuli ni Lisaayilo lyeewe Likhulu i Yerusalemu.

¹⁶Muli ni khuusuta izaabu ni feetsa, byeesi kane mube nga mwaabuusanisile khukhwaama mu bifwo byoosi bye mu Babulooni. Muyile ni biwaanwa bibiindi byoosi byeesi babaandu beenywe babeene, atweela ni basaayi baawaanayo nga beekanisa, lwe Lisaayilo Likhulu lya Wele weenywe liliili i Yerusalemu.

¹⁷Ngana muraambise tsinusu tsino buulayi, mutsye mukule tsiwuunwa tsitsifuura buulayi, kamamiiku, kamasheese kamasooleli, biilime bibyoomu, atweela ni viini. Lwanyuma mubiwaaneyo nga tsisaayilo khu sheeso shishiili khu Lisaayilo lya Wele Likhulu liliili i Yerusalemu.

¹⁸Ne siinga ibawo ifeetsa namwe izaabu bibinaramakho, iwe atweela ni Bayudaaya bashoowo, munyala mwaabiraambisa musaambo yoosi iyikhoyesa Wele weenywe.

¹⁹Muli ni khuuwayo isi Wele, bibiindu byoosi bibiwaanibwileyo lwe khuuraambisibwa mu khwiisaaya mu Lisaayilo Likhulu.

²⁰Ne siinga mubayo ni shishiindu shiindi shoosi sheesi mukana khuuraambisa khu Lisaayilo Likhulu, mutsya mufune tsinusu khukhwaama mu libiikhilo likhulu lye buyiinga.

²¹Ari ise umuyiinga Aritatsatsesi, indi khuulakila baabiikhi boosi babaali mu Shisiintsa she Bukwanyaanga we luluutsi Efurati, indi bawe umusaayi Ezira luundi umuleekeli we Kamakaambila ka Wele, bibiindu byoosi bibinakanibwa, akhali khuuwaanyiinyibwa ta.

²²Kane bafukiilisibwe khuukaba bukali bubwoolesa tsikilo bikana bitaru ni bitoondo bine (3,400) bye feetsa, tsikilo kumukaanda mutweela (10,000) kwe ŋaano, tsi lita bikana bibili (2,000) bye viini, tsi lita bikana bibili (2,000) bye kamafura ke ku oliveti, ni kumuunyu kwoosi kukunakanibwa.

²³Bibiindu byoosi byaakha khukholebwa khuusiintsiila khu bilakilo byeesi Wele we likulu aweele, nio alekhe khukhuukhalalila ise umuyiinga uliwo ari atweela ni basooleli baase babaalintsilila mu bikyele ta.

²⁴Naluundi ingana khuubamanyisa ndi mbaawo basaayi, namwe ba Levi, namwe babeembi be kimyeenya, namwe baaliindi, namwe babaakaanisi be mu Lisaayilo Likhulu, namwe baraambi babaandi boosi babaakane basasule kumusolo kwe saambo yoosi ta.

²⁵Ari ni nawe Ezira, ngana uraambise kamakhula keesi Wele aakhuwa iwe, urobore baaraangilisi ni baakayi khuuwula babaandu boosi babaali mu Shisiintsa she Bwaamanyaanga we luluutsi Yorudaani, babaaloondelela Kamakaambila ka Wele weenywe. Ne abo babaaba nga bashiili khuukamanya ta, iwe uli ni khuubaleekela.

²⁶Ne umuundu yeesi ukhakane aloondelele Kamakaambila ka Wele weenywe, ni shiilakilo sh'omuyiinga ta, mwaakha khuumuwa shiitaambiso she kamaani. Umuundu ufwaana aryo aakha khukhwiiribwa, namwe khuumuwoona arure mu shibala shino, namwe khuumurusakho bibiindu byoosi byeesi ali ni nabyo.

²⁷Lweebyo byoosi Ezira waaruuya Wele nga aloma ari: “Umukasya Wele we bakuuka beefwe aruuyibwe naabi! Lwekhuuba aara mu mwoyo kw'omuyiinga shiriiso she kamaani naabi isi Lisaayilo Likhulu ly'Omukasya liliili mu Yerusalemu.

²⁸Ni lwe shiisa sheewe shikali, Wele aalakila umuyiinga, ni baawi beewe be kamakyesi, ni baakhulu babaandi, khukhuumbirisa ise buulayi bari. Naluundi lwekhuuba kumukhono kw'Omukasya Wele kwanjeeta naabi, ise neelamwo kamaani, naanyalisa khuubuusanisa baaraangilisi baakali be ba Isiraeli, khukhwiitsa ni nase.”