Read lumasaaba Ezira 8 Bible Online

Ezira 8 - lumasaaba bible

Ezira 8

¹Luno nilwo luruungo lwe baakhulu be bukuuka bukyeekhe, bubwaba buli mu bubowe mu Babulooni. Nibo beesi Ezira aaraangilila khuukobola i Yerusalemu, nga Aritatsatsesi niye umuyiinga.

²Mu betsukhulu ba Finehasi mwaamamwo Geroshomu; mu betsukhulu ba Isamari, mwaamamwo Danieli; mu betsukhulu ba Dawudi, mwaamamwo Hatushi

³uwaba umusooleli wa Shekaniya; mu betsukhulu ba Paroshi, mwaamamwo Zekariya, atweela ni basaani baboola shitoondo shitweela ni kamakhumi karaano (150) babaaronebwa;

⁴mu betsukhulu ba Pahasi-Mowaabu mwaamamwo Eliyehoyenayi, umwaana wa Zekariya uwaba ni basaani baboola bitoondo bibili (200);

⁵mu betsukhulu ba Zatu, mwaamamwo Shekaniya umusooleli wa Yahaziyeli, uwaba ni basaani baboola bitoondo bitaru (300);

⁶mu betsukhulu ba Adini, mwaamamwo Ebedi umusooleli wa Yonasani, uwaba ni basaani baboola kamakhumi karaano (50);

⁷mu betsukhulu ba Elamu, mwaamamwo Yeshaya umusooleli wa Ataliya, uwaba ni basaani baboola kamakhumi musaafu (70);

⁸mu betsukhulu ba Shefatiya, mwaamamwo Zebadiya umusooleli wa Mikayili, uwaba ni basaani baboola kamakhumi shinaane (80);

⁹mu betsukhulu ba Yowabu, mwaamamwo Yehiyeli, uwaba ni basaani baboola bitoondo bibili ni likhumi na shinaane (218);

¹⁰mu betsukhulu ba Bani mwaamamwo Shelomisi umusooleli wa Yosifiya, uwaba ni basaani baboola shitoondo shitweela ni kamakhumi kasesaba (160);

¹¹mu betsukhulu ba Bebayi, mwaamamwo Zekariya umusooleli wa Bebayi, uwaba ni basaani baboola kamakhumi kabili na shinaane (28).

¹²Mu betsukhulu ba Azigadi mwaamamwo Yohanani umusooleli wa Hakatani, uwaba ni basaani baboola shitoondo shitweela ni likhumi (110).

¹³Mu betsukhulu ba Adonikamu, nimwo mumwaamamwo babaakamayo, ni kamasiina kaabwe kaaba nibo Elifeleti, Yewuweli, ni Shemayiya, nga bali ni basaani baboola kamakhumi kasesaba (60).

¹⁴Mu betsukhulu ba Bigivayi mwaamamwo Usayi ni Zakuri, nabo baaba bali ni basaani baboola kamakhumi musaafu (70).

¹⁵Nabuusanisa babaandu bano boosi aambi ni luluutsi lulubirira mu shiriimba sha Ahava, khwaaba ibweene iyo mu kaambi khuumala biifukhu bitaru. Ne ni naweentselesa mu baandu babaabawo boosi, sinanyoolamwo n'umu Levi na mutweela ta.

¹⁶Isho shaakila naarumanisa basaani babaaba baaraangilisi nga nibo; Eliyazaari, Ariyeli, Shemayiya, Elunasani, Yaribu, Elunasani, Nasani, Zekariya, ni Meshulamu. Neelayo luundi naarumanisa Yoyaribu ni Elunasani, babaaba basaani be kamakhula.

¹⁷Lwanyuma ndi naarumanisa Ido, uwaba umuraangilisi mu Kasifiya. Naabalomela bamuloombe niye ni basheewe, atweela ni baraambi be mu lisaayilo, banyalise khukhwakaanisayo babaandu beetse khukhwakaanisa mu Lisaayilo lya Wele.

¹⁸Ni lwe bubweela bwa Wele buukali bubwaba khusiifwe, baakhusiindikhila Sherebiya, uwaba umusaani uwe kamakhula, uwe muungo mwa Mahili, umwaana wa Levi, uwaba umwaana wa Isiraeli. Sherebiya eetsa ni basooleli beewe atweela ni baalebe beewe baboola likhumi na shinaane.

¹⁹Khukhwiilakho baakhurumanisila Hashabiya ni Yeshaya, babaaba be muungo mwa Merari. Bano beetsila atweela ni baalebe baabwe baboola buukali kamakhumi kabili.

²⁰Baalooselakho babaakaanisi babaandi baboola bitoondo bibili ni kamakhumi labili (220), babaareebwawo n'umuyiinga Dawudi atweela ni baakhulu basheewe babaandi lwe khuuyeeta ba Levi. Babaandu bano boosi baaronebwa kamasiina buli mutweela.

²¹Iyo isi khwaba aambi ni luluutsi Ahava, nawa shiilakilo ndi babaandu babuye ntsala, bewunamile mu moni tsa Wele, bamuloombe khuukhuraangilila ifwe khu lukyeendo lweefwe, ifwe atweela ni babaana beefwe, nga khuli ni bye buyiindifu byeefwe.

²²Ise kamaŋaanyu kamaamba khuutsya inoombe umuyiinga khuukhuwa baselikhale khuukhukhiinga mu ntsila. Lwekhuuba ise naba naaboolela khaale umuyiinga ndi Wele weefwe niye ukhiinga buli muundu yeesi uumwisaaya mu ŋali, ne lirima lyeewe litindiima khulwooyo uumwantsukha.

²³Nashiryo, ifwe khwaabuya ntsala, khwaaba nga khwikoontselela Wela umweene khuukhukhiinga ifwe. Aryo weelamwo khuuloomba khweefwe.

²⁴Lwanyuma naaroborayo basaayi baaraangilisi likhumi na babili, nga nibo Sherebiya, ni Hashabiya, atweela ni babandayaabwe likhumi.

²⁵Neelayo naapimaka biwaanwa bye feetsa ni bye zaabu, ni bibiindu bibiindi, byeesi umuyiinga, baawi beewe be kamakyesi, baaraangilisi babaandi atweela ni babaandu ba Isiraeli boosi babaaba nga baliwo, byeesi baawaanayo khuuraambisibwa mu Lisaayilo Likhulu lya Wele weefwe. Lwanyuma naabiwa basaayi.

²⁶Busiro bwe bibiindu byeesi napiima bwoola buri: Ifeetsa tsitani kamakhumi kabili na tsibili (22). Bibiindu bye feetsa shitoondo shitweela (100), bibyoolamo tsikilo kamakhumi musaafu (70). Izaabu tsikilo bikana bitaru ni bitoondo bine (3,400).

²⁷Bipwakhuli bye zaabu kamakhumi kabili bibyoolamwo aambi tsikilo shinaane ni shisiintsa (8.5). Ni buroonzi umupyeeluuse buulayi, uwaba ni kumukaso abe kukulekhaana ni zaabu.

²⁸Nakyelawo naababoolela ndi “Inywe muli bakwalaafu b'Omukasya, Wele we bakuuka beenywe, nga bibiindu bye feetsa ni zaabu bino ni bili bikhosefu. Biwaanwa bino byawaanibwileyo isi Umukasya akhali khuuwaanyiinyibwa ta.

²⁹Nashiryo imbakhupilisa ndi mubiliinde luundi mubiloleleele buulayi, khukhwoolesa ni muli bipimila i Yerusalemu, khu Lisaayilo Likhulu, mu moni tse basaayi babaafuura bukhulu, ni ba Levi, atweela ni baaraangilisi be tsiingo mu Isiraeli.”

³⁰Baryo basaayi ni ba Levi baayila bibiindu bye feetsa ni zaabu ni bibiindu bibiindi bikhosefu bibyaba byaamalile khuupimibwa, baabiliinda nio bitsye byoolesebwe mu Lisaayilo Likhulu lya Wele mu Yerusalemu.

³¹Khu shifukhu she likhumi na bibili, she mu mweesi kukuunyoowa, khwasiimbula khukhwaama khu luutsi Ahava, khwaarakikha lukyeendo lwe khuutsya i Yerusalemu. Kumukhono kwa Wele weefwe kwe kamaani kwakhubakho nga ni khwakyeenda, nga Wele akhukhiinga ifwe, baasiku beefwe balekhe khukhwiibwakala ta.

³²Khuryo ni khwoola i Yerusalemu, khwaawolakho khuumala biifukhu bitaru.

³³Lwanyuma khu shifukhu she khaane khwaatsya khwenjila mu Lisaayilo lya Wele. Mu bweene umwo, ifeetsa tsana ni zaabu, ni bibiindu bibiindi bikwalaafu byapiimiibwa, byaweebwa isi Meremosi, umwaana wa Uriya. Ni babaandi babaaba ni naye baaba nibo Eliyazaari, umwaana wa Finehasi, ni ba Levi babili nga nibo Yozabadi, umwaana wa Yeshuwa, ni Nowadiya, umwaana wa Binuyi.

³⁴Bibiindu byoosi byabalibwa luundi byaapimibwa, lwanyuma byaruungikhibwa buulayi mu burone.

³⁵Abo boosi babaakobola khukhwaama mu bubowe baawaanayo tsisaayilo tsintsoshe khu sheeso isi Wele wa Isiraeli. Baawaanayo tsiwuunwa likhumi na tsibili khulwe ba Isiraeli boosi, kamamiiku kamakhumi syeenda na kasesaba, ni kamasheese kamasooleli kamakhumi musaafu na musaafu kamaseetsa, nako kaawaanibwayo khu sheeso. Baryo bawaanayo ni tsiindurume likhumi na tsibili lwe bibyoonako bye babaandu.

³⁶Babaandu beene abo baareera buurume bw'omuyiinga, baabuyila isi ba gafana, ni baaraangilisi babaandi be Bukwanyaanga we Luluutsi Efurati. Shishakila baaraangilisi beene bano baanyalisa khuuwa buuyeeti lwe babaandu ba Isiraeli, ni lwe Lisaayilo Likhulu lya Wele.