Read lumasaaba Ezira 9 Bible Online

Ezira 9 - lumasaaba bible

Ezira 9

¹Lwanyuma lwe bibiindu byoosi khuukholikha, baaraangilisi be Bayudaaya, beetsa isi ndi baanomela bari, “Babaandu baakali ba Isiraeli, nga waayililemo ni basaayi ni ba Levi beene, bali khuumenyaka busa nga babaandu babaandi babaabesaanewo. Baakhwiyawulakho khu baandu be kamanaambo kakaandi nga nibo ba Kanaani, ba Hiiti, ba Perizi, ba Yebusi, ba Amoni, ba Mowaabu, ba Misiri, ni ba Amori ta. Baayitubaasa ni nabo mu bye bunyaalu byeesi bakhola.

²Lwekhuuba batweela khu basaani ba Isiraeli baayiyilila bakhasi khukhwaama mu manaambo ako, naluundi baalomela basooleli baabwe khuukhola shishiindu nisho shitweela sheene. Baryo babaandu ba Wele ba Isiraeli ari baayinyaalutaka busa lwe khukhwitubaasa mu shoonako nga shino. Ne baaraangilisi beefwe babeene nibo babaashinyoowa khuushikhola.”

³Ne ni nawulila shishiindu shino, kumutaambo kwamaamba luukali naabi, nonuulaka bikwaaro byase, naakusaka ni litsuune khukhwaama khu murwe kwase, ni bunwaanwa. Lwanyuma nekhala aasi nga neyaangile naabi.

⁴Baryo nabo batweela khu baandu beefwe beesi kumutaambo kwawaamba lwe biilomo bya Wele wa Isiraeli, beetsa baabuusana, baantsibotokhelela, lwe lomo iye babaandu babaakobolaka khukhwaama mu bubowe khuulekha khuba babeyikinwa ta. Ise narama nga nekhaale abweene awo mu khwiyaanga khuukali, khukhwoolesa khu mbuka iye khukhwoosha isaayilo iye angoloobe.

⁵Tsinyaanga ni tsoola tse khukhwoosha isaayilo iye angoloobe, ise naaba nga ishikhala aasi mu mutaambo kumukali, mu bikwaaro byaase bitabukhake ibyo. Indyo naakwa aasi naafukhamila, lwanyuma nenyusa kimikhono kyase mu ngaaki naaloomba,

⁶nga inoma ndi: “O Wele wase, ise naswaalile naabi, khukhwiinyusa tsimoni tsase is'uli. Lwekhuuba bibyoonako byeefwe ni buubi bweefwe, byaakhubiririirekho luukali naabi, byaaniinile byoolile ni neeyo mwikulu.

⁷Khukhwaamila ilala mu biseela bye bakuuka beefwe khukhwoolisa ni shaleelo shino, khwaayoneka luukali naabi. Nashiryo, khulweefwe fwabeene, ni bayiinga beefwe, ni basaayi beene, khwaakwa mu mikhono kye bayiinga be kamanaambo. Balala khuusiifwe khwaayiribwa, bakhuwaambaka, baakhunuulakakho bibiindu byeefwe, baakhuswaatsa naabi, nga ni khuli khuubonekha shaleelo khuri.

⁸Ne ari khu mbuka yino, O Umukasya Wele weefwe, iwe waakhwookesanisile ifwe shiisa shikali naabi. Waakhuramisilewo baalala khusiifwe khuumenya mu shifwo shino shikhosefu, ni khuubonakho lukoneele mu bubowe buno.

⁹Abe yakhaba nga khuli baabowe, ne iwe Wele weefwe waakhukhulekhela awo busa uryo ta. Ne bona waakhwookesanisile bubweela bwoowo mu mikhono kye bayiinga ba Pasiya. Waakhuyeetile ifwe khuunyalisa khukhwombekha bushaakha Lisaayilo lyoowo Likhulu, ni khukhwiilayo khwamenya mu lukoosi mu Yuda ni mu Yerusalemu.

¹⁰Ne aluno ari, O Wele weefwe, ifwe khulome khuri shiina lwanyuma lwa bino byoosi? Ifwe khwaayoneka, khwaamiinyaalila kamakaambila koowo

¹¹keesi wakhuwa ifwe nga ubirira mu bakaanisi boowo baŋoosi. Nibo baakhuboolela ifwe bari shibala sheesi khutsya khukhwiinjilamwo she bumoyaani naluundi lwekhuuba babaandu baamwo baaba baboonaki babeloosela busa khuukhola bye bubwoonaki bukali.

¹²Baakhuboolela ifwe bari sikhuli ni khuuwaanayo babaana beefwe bekhaana namwe besiinde khuuyilana ni nabo ta. Naluundi baakhureewula bari khukhakholakho ni nabo ikwangwaani yoosi, namwe khwaabalekha baamenya mu lukoosi ta. Iwe wakhukanisa ifwe khuuba ni kamaani, ni khuulya bibiindu biilayi bye mu shibala, lwanyuma khubilekhele ni babaana beefwe be kimiboolo kikiilakho, khuuba buusikha bubuukhawawo ta.

¹³Bino byoosi byakhukholikhakho lwe buraambi bweefwe bwe bubwoonaki buukali. Ne iwe, Wele weefwe, siwakhuweele ifwe shitaambiso shishilekhaana ni buubi bweefwe ta, bona waakhureerire waakhukobosile ingo nga khuli baalamu.

¹⁴Ari shiina ndi shishinakila ndi khwiileyo luundi khufuniaake kamakaambila koowo, nga khufukiilisa babaana beefwe besiinde ni bekhaana khuuyilana ni babaandu bano? Ifwe siinga khushikhola luundi, kane shikhukhalase iwe luukali naabi, ukhuwese khuwewo, ilekhe khuramawo umuundu na mutweela umulamu ta.

¹⁵O Umukasya Wele wa Isiraeli, iwe uli uwaŋali, lwekhuuba bona waakhulekhilewo ifwe babaaramilewo nga baalamu, khukhwoola khu shifukhu shino. Ne ifwe khuli ano mu bwoonaki bweefwe, mbaawo na mutweela khuusiifwe unyala weetsa weemikha mu moni tsoowo lwa shino ta.”