Read lumasaaba Nehemiya 1 Bible Online

Nehemiya 1 - lumasaaba bible

Nehemiya 1

¹Bino nibyo biilomo byeesi Nehemiya, umwaana uwa Hakaliya aaloma. Mu mweesi kwe sisyeenda[1], mu mwiiko kwe kamakhumi kabili nga khuli mu bubowe, ise naba nga ndi mu shiriimba shikhulu, Susa.

²Kila mutweela khu balebe baase, isi balaanga bari Hanani, weetsa isi ndi nga ali ni basaani babaandi khukhwaama mu Yuda. Kila ise imbareeba khukhuumboolela kamakhuuwa kakawaamba khu Bayudaaya babaarama ingo, nga sibaayilibwa mu bubowe ta, ni bibiwaamba khu Yerusalemu.

³Kila bamboolela bari, “Abo babaama mu bubowe baakobolayo ingo, bali mu bihangafu biikali, naluundi bamenya mu khuswaala khuukali naabi. Kuutikiiyi abe kukwebotookhelela Yerusalemu, kwaamala khaale khuukwa, ni biilibwa bye shiriimba babaandu babyoosha sibiliyo ta.”

⁴Ise nga ni nawulila biilomo bino, khulwe kumutaambo kumukali, nekhala aasi naantsuwa, nga ndila kamasika khuumala biifukhu biikali busa. Naabuya intsala, nga inoomba isi Wele uwe mwikulu.

⁵Naloomba ndi, “Umukasya Wele uwe mwikulu, iwe uli uwe angaaki naluundi babaandu bakhurya naabi. Iwe uloondelela bibiili mu ndakaano yoowo, naluundi iwe wokesanisa khuukana khukhuukhakama ta, isi abo babaaloondelela kamakaambila koowo.

⁶Ni wikule tsimoni tsyoowo ubone bibiili khuutsya mu moni, naluundi wikule kamaru koowo urekeerese khuuloomba khwase, umwakaanisi woowo. Bona indikho inoomba isi iwe kumuusi ni shiilo, nga inoombela babaandu boowo ba Isiraeli, babaamala khaale khuukhola bibyoonako isi iwe. Ikhaba ise samweene ni be muungo mwase, khuli baboonaki.

⁷Ifwe khwaayibirisa buubi mu moni tsyoowo, khulwekhuuba sikhwaloondelela kamakaambila koowo ta, ni biilakilo byoowo, n'indeekela yoowo, byeesi iwe wakhuwa ifwe khuubirira mu mwakaanisi woowo Musa ta.

⁸Mukasya, shebulila sheesi iwe wasuubisa Musa nga uloma uri, ‘Ni mulekha khuuba babeyikinwa isi ise, kane imbasalanise mu manaambo ke babaandu babaandi busa.

⁹Ne siinga mushuusakho mwaakhola byeesi ingana, abe ikhaba nga abo babaali mu bubowe bali aleeyi naabi, kane ise imbabuusase khukhwaama iyo, imbayile mu shifwo sheesi imalile khuurobora ndi bantsisaayilemo.’

¹⁰Mukasya, bano bali babaandu boowo, naluundi babaakaanisi boowo, beesi iwe wamweene wamusa nga uraambisa buunyala bwoowo ni kamaani koowo.

¹¹Mukasya, n'urekeerese khuuloomba khwase uuli umwakaanisi woowo, ni khuuloomba khwe babaakaanisi boowo babaandi, babesaaya lisina lyoowo ni kumwikhoyo. Lwe shaleelo nga ise ndikho naakaanisa umuyiinga iviini, n'umushuuse abe ni kumwooyo kumulayi, nio aambe sheesi ise inamuloomba.”