Read lumasaaba Nehemiya 7 Bible Online

Nehemiya 7 - lumasaaba bible

Nehemiya 7

¹Lwanyuma lwe khukhwoombakha bushaakha litikiiyi, khwaramo kimilyaango, naluundi khwaarawo baaliindi khu Lisaayilo Likhulu, ni babeembi be kimyeenya, naluundi ba Levi babaandi bawaambisibwa buuraambi bwaabwe.

²Ise nawaamba wandaayase bari Hanani, khuuba umuwuli mu Yerusalemu, atweela ni Hananiya, umuraangirisi uwe liiye lye mu lumako. Khulwekhuuba abe Hananiya ali umwiyikinwa, naluundi abe arya Wele khuuminyisa babaandu babafuura buukali.

³Baabili bano nabalomela ndi, “Mukhalekha bekulawo kimilyaango kye shiriimba Yerusalemu ta, khukhwoolisa nga kumuumu kwaabiliile ilala. Bona muri bekalawo bakhomekhele ilala, nga bashiili khurura khu mulimo kwe khuliinda ta. Robora baaliindi khukhwaama mu bekhali be mu Yerusalemu, nga buli mutweela ali ni shiifwo shisheewe, nga shili aambi ni ingo weewe.”

⁴Ikhaba nga Yerusalemu imbalaayi, ne babaandu babaamenyamo abe bali bakyeekhe bari, naluundi abe mbaawo tsintsu tsimbyaakha tsyeesi baamala khukhwoombakhamo ta.

⁵Nashiryo Wele waamba shishambaaso she khuubuusa be muungo mw'omuyiinga, ni baraangirisi, ni babaandu ba busheele, imbarone aasi khuuloondekhana ni luruungo lwe khuusaalikha khwa buli mutweela. Nanyoola shitabo shishiilimo luruungo lwaabo babaanyoowa khuukobola khukhwaama mu bubowe. Bano nibo beesi nanyoolamo.

⁶Nga babaandu bano nibo babaakobola khukhwaama mu bubowe bweesi Nabukaduneza umuyiinga wa Babulooni aabayilila, ne nga ari abe bamenya mu shisiintsa shino, sha Yuda ni Yerusalemu. Buli mutweela abe amenya mu shiriimba she waabwe.

⁷Beetsa ni Zerubabeli, Yeshuwa, Nehemiya, Azariya, Ramiya, Nahamani, Modekaayi, Bilishani, Misiperesi, Bikifayi, Nehumu, ni Banaha. Mu basaani ba Isiraeli, abe buli muungo boola bari:

⁸be lisaaye lya Parosi, bikana bibili, shitoondo shitweela ni kamakhumi musaafu na babili (2,172).

⁹Be lisaaye lya Shefatiya, abe boola bitoondo bitaru ni kamakhumi musaafu na babili (372),

¹⁰be lisaaye lya Ara, abe boola bitoondo bisesaba ni kamakhumi karaano na babili (652)

¹¹be lisaaye lya Pahasi Mowabu, khubirira muunda iya Yeshuwa ni ya Yowabu, abe boola bikana bibili, bitoondo shinaane ni likhumi na shinaane (2,818),

¹²be lisaaye lya Elamu, abe boola shikana shitweela, bitoondo bibili ni kamakhumi karaano na bane (1,254),

¹³be lisaaye lya Zatu, abe boola bitoondo shinaane ni kamakhumi kane na baraano (845)

¹⁴be lisaaye lya Zakayi, abe boola bitoondo musaafu ni kamakhumi kasesaba (760)

¹⁵be lisaaaye lya Binuyi, abe boola bitoondo bisesaba ni kamakhumi kane na shinaane (648)

¹⁶be lisaaye lya Bebayi, abe boola bitoondo bisesaba ni kamakhumi kabili na shinaane (628)

¹⁷be lisaaye lya Azagadi, abe boola bikana bibili, bitoondo bitaru ni kamakhumi kabili na babili (2,322),

¹⁸be lisaaye lya Adonikamu, abe boola bitoondo bisesaba ni kamakhumi kasesaba na musaafu (667),

¹⁹be lisaaye lya Bigifayi, abe boola bikana bibili ni kamakhumi kasesaba na musaafu (2,067),

²⁰be lisaaye lya Adini, abe boola bitoondo bisesaba ni kamakhumi karaano na baraano (655),

²¹be lisaaye lya Ateri, khubirira munda iya Hezekiya, kamakhumi syeenda na shinaane (98),

²²be lisaaye lya Hashumu, bitoondo bitaru ni kamakhumi kabili na shinaane (328),

²³be lisaaye lya Bezayi, abe boola bitoondo bitaru ni kamakhumi kabili na bane (324)

²⁴be lisaaye lya Harifu, shitoondo shitweela ni likhumi na babili (112)

²⁵be lisaaye lya Gibiyoni, kamakhumi syeenda na baraano (95).

²⁶Be lisaaye lilyaama i Beselehemu ni Netofa, abe boola shitoondo shitweela ni kamakhumi shinaane na shinaane (188),

²⁷khukhwaama mu shiriimba she Anasosi, shitoondo shitweela ni kamakhumi kabili na shinaane (128),

²⁸khukhwaama mu shiriimba she Besi Azimafesi, abe boola kamakhumi kane na babili (42)

²⁹khukhwaama mu Kiriyasi Yearimu, Kefira ni Berosi, bitoondo musaafu ni kamakhumi kane na bataru (743),

³⁰khukhwaama i Rama, bitoondo bisesaba ni kamakhumi kabili na mutweela (621),

³¹khukhwaama i Mikamasi, shitoondo shitweela ni kamakhumi kabili na babili (122),

³²khukhwaama i Beseli ni Ayi, shitoondo shitweela ni kamakhumi kabili na bataru (123),

³³khukhwaama mu shiriimba she Nebo shishiindi, kamakhumi karaano na babili (52),

³⁴khukhwaama mu Elamu, shikana shitweela, bitoondo bibili ni kamakhumi karaano na bane (1,254),

³⁵khukhwaama mu Harimu, abe boola bitoondo bitaru ni kamakhumi kabili (320),

³⁶khukhwaama i Yeriko, bitoondo bitaru ni kamakhumi kane na baraano (345),

³⁷khukhwaama i Lodi, Hadidi, ni Ono, bitoondo musaafu ni kamakhumi kabili na mutweela (721),

³⁸khukhwaama i Senaha, bikana bitaru, bitoondo syeenda ni kamakhumi kataru (3,930).

³⁹Basaayi babaakobola baaba boola bari: khukhwaama mwisaaye lya Yedayiya, nga nimwo mumuuli be nda iya Yeshuwa, abe boola bitoondo syeenda ni kamakhumi musaafu na bataru (973),

⁴⁰be lisaaye lya Imeri, shikana shitweela ni kamakhumi karaano na babili (1,052)

⁴¹be lisaaye lya Pashuri, abe boola shikana shitweela, bitoondo bibili ni kamakhumi kane na musaafu (1,247),

⁴²be lisaaye lya Harimu, abe boola shikana shitweela ni likhumi na musaafu (1,017).

⁴³Ba Levi babaakobola, nga bali be lisaaye lya Yeshuwa, khuubirira muunda iya Kadimiyeli, ni Hodafiya, abe boola kamakhumi musaafu na bane (74),

⁴⁴Babeembi be kimyeenya, be lisaaye lya Asafu, abe boola shitoondo shitweela ni kamakhumi kane na shinaane (148).

⁴⁵Babaliinda khu bilibwa: be lisaaye lya Shalumu, lisaaye lya Talumoni, lisaaye lya Akubu, lisaaye lya Hatita, lisaaye lya Shobayi, atweela abe boola shitoondo shitweela ni kamakhumi kataru na shinaane (138).

⁴⁶Babaraamba mu Lisaayilo Likhulu nga nibo: be lisaaye lya Ziha, lisaaye lya Hasufa, lisaaye lya Tabawosi,

⁴⁷be lisaaye lya Kerosi, lya Siya, lya Padoni,

⁴⁸be lisaaye lya Lebana, lya Hagaba, lya Shalumayi,

⁴⁹be lisaaye lya Hanani, lya Gideli, lya Gahari,

⁵⁰be lisaaye lya Reyayiya, lya Rezini, lya Nekoda,

⁵¹be lisaaye lya Gazamu, lya Uza, lya Paseya,

⁵²be lisaaye lya Besayi, Meyunimu, lya Nefusimu,

⁵³be lisaaye lya Bakabuku, lya Hakufa, lya Harihuri,

⁵⁴be lisaaye lya Bazilusa, lya Mehida, lya Harasha,

⁵⁵be lisaaye lya Barakosi, lya Sisera, lya Tema,

⁵⁶be lisaaye lya Neziya, ni lya Hatifa.

⁵⁷Abo babaakobola khukhwaama mu baraambi ba Solomoni baaba nibo bano: be lisaaye lya Sotayi, lya Soferesi, lya Perida,

⁵⁸be lisaaye lya Yala, lya Darukoni, lya Gideli,

⁵⁹be lisaaye lya Shefatiya, lya Hatili, lya Pokeresi Hazebayimu, ni lya Amoni.

⁶⁰Khukhwaama khu buli lisaaye lyaabo abe babaraamba mu Lisaayilo Likhulu ni n'abo abe babaaba baraambi ba Solomoni, atweela abe boola bitoondo bitaru ni kamakhumi syeenda na babili (392).

⁶¹Babeelakho bano, abe baama mu biriimba bino: Teli Malaha, Teli Harasha, Kerubu, Adoni, ni Imeri. Ne abo bakhaasikhana isaambo iye khushihandalasa bari tsiingo tsyaabwe tsili tsye lisaaye lye ba Isiraeli, nibo bano:

⁶²lisaaye lya Delayiya, lya Tobiya, lya Nekoda, nga bali bitoondo bisesaba ni kamakhumi kane na babili (642).

⁶³Basaayi khukhwaama mu beene abo baaba nibo: be lisaaye lya Hobayiya, lisaaye lya Hakozi, lisaaye lya Barizilayi (uyuno ayila umukhaana uwa Barizilayi, khukhwaama i Gileyadi, waakila baamuwa ni lisina ilyo).

⁶⁴Be lisaaye lya Hobayiya, ni lya Hakozi, ni lya Barizilayi, baaweentsa luruungo luluwaamba khu lisaaye lyaabwe, ne baalekha khunyoola ta. Nashiryo, baabarusa khu kwe busaayi, khulwekhuuba abe bali be mbikho.

⁶⁵Shino shaakila gafana waabalobela khuukabananila atweela ni babaandu babaandi khu bilyo bikhosefu, khukhwoolisa nga umusaayi ukhola buŋoosi nga araambisa Urimu ni Sumimu, nga waabonekhile.

⁶⁶Basaayi babaakobola abe boolisa babaandu kimikaanda kine, bikana bibili, bitoondo bitaru, ni kamakhumi kasesaba (42,360),

⁶⁷baraambi baabwe abe boola bikana musaafu, bitoondo bitaru, ni kamakhumi kataru na musaafu (7,337); ni babeembi be kimyeenya, basaani ni baakhasi, nga boola bitoondo bibili ni kamakhumi kane na baraano (245).

⁶⁸Abe bali ni tsiŋwaaŋwa bitoondo musaafu ni kamakhumi kataru na basesaba (736), tsinyuumbu bitoondo bibili ni kamakhumi kane na baraano (245),

⁶⁹tsiŋamiya bitoondo bine ni kamakhumi kataru na baraano (435), ni tsisikilya bikana bisesaba, bitoondo musaafu ni kamakhumi kabili (6,720).

⁷⁰Batweela khu baraangirisi be tsiingo tsyaabwe baawayo biwaanwa, mu khuyeeta khukhwoombakha Lisaayilo Likhulu bushaakha. Gafana umweene aawaanayo izaabu iyoola tsikilo shinaane ni shisiintsa, bipwakhuli bibiraambisibwa mu Lisaayilo Likhulu kamakhumi karaano, ni bikwaaro bye basaayi bibyoola bitoondo biraano ni kamakhumi kataru (530).

⁷¹Batweela khu baraangirisi be tsiingo baawaanayo mu libiikhilo izaabu iyoola tsikilo shitoondo shitweela ni kamakhumi kasesaba na shinaane (168), n'ifeetsa iyoola tsikilo shikana shitweela, bitoondo bibili ni kamakhumi karaano (1,250).

⁷²Babaandu babaaramire boosi baawaanayo bibiindu bibyoola tsikilo shitoondo shitweela ni kamakhumi kasesaba na shinaane (168) tsy'ezaabu, ni tsikilo shitoondo shitweela ni kamakhumi kane (140) sh'efeetsa, ni bikwaaro bye basaayi kamakhumi kasesaba na musaafu (67).

⁷³Nashiryo basaayi, ba Levi, babaliinda khu bilibwa, babeembi be kimyeenya, ni baraambi be mu Lisaayilo Likhulu, ni ba Isiraeli boosi, abe buli mutweela amenya mu shiriimba she waabwe.