Read lumasaaba Nehemiya 9 Bible Online

Nehemiya 9 - lumasaaba bible

Nehemiya 9

¹Lwanyuma khu shifukhu shishikhola kabili na bine, she kumweesi mwene ukwo kwe kumusaafu, ba Isiraeli baabuusana, baakhalawo khuubuya intsala, baakwaara bikwaaro bye bukoongwe, naluundi batuumaka lifukhuulu mu matsuune kaabwe, khukhwookesa bari bali mu mutaambo.

²Ba Isiraeli bekhalakho babeene khukhwaama khu baandu babaaba be kamanaambo kakaandi, kila ba Isiraeli bebiiyisa bibyoonako byaabwe, ni bye bakuuka baabwe.

³Baamala tsisaawa tsitaru tsimbuufu, nga barekeeresa byeesi baabasomela khukhwaama mu Makaambila k'Omukasya, Wele waabwe. Nio tsisaawa tsitsyalooselakho tsitaru, babaandu bebiiyisa bibyoonako byaabwe naluundi besaaya Umukasya.

⁴Aabawo ba Levi babeemikha khu shikuusi abe sheesi bakholile sha buraawa, baloomba naluundi bakuukuula isi Umukasya Wele waabwe. Baaba nibo bano: Yeshuwa, Bani, Kadimiyeli, Shebananiya, Buni, Sherebiya, ni Chenani.

⁵Lwanyuma ba Levi Yeshuwa, ni Kadimiyeli, ni Bani, ni Hashabineniya, ni Sherebiya, ni Hodiyiya, ni Pesahiya, baloma bari: “Yinyukha khu ngaaki muruuye Umukasya Wele weenywe, uliwo biilo ni biilo. Khayo khusiime lisina lyeewe, liliili angaaki khuuminyisa, khuruuya khwoosi ni khusiima khwoosi.”

⁶Kila Ezira aloma ari: Iwe wenyene niye Umukasya, Umubuumbi we likulu ni tsinieniesi tsyoosi. Umubuumbi we shibala ni n'abo boosi babaashimenyamo. Umubuumbi we nyaantsa, ni bibiindu bibikimenyamo byoosi. Iwe niye isebele iye buulamu, iwe niye isi tsinieniesi tsitsyetsula mu ngaaki tsiruuya.

⁷Iwe uli Umukasya Wele weefwe, iwe niye uwarobora Iburamu waamwaamisa mu shibala she Uri, mu Babulooni, waamutwiikha uri Iburayimu.

⁸Khulwekhuuba aaba ali umuundu umwiyikinwa, iwe waakhola indakaano ni naye iye khuuwa lisaaye lyoowo shibala abe shishiilimo ba Kanani, ba Hiti, ba Amori ni ba Perizi ni ba Yebusi, ni ba Girigashi. Bona ari iwe wolelesele sheesi wamulomela niye, nga buli busheele iwe ni wolelesa byeesi uba walomele.

⁹Nga bakuuka beefwe bali mu Misiri, iwe wabona kumutaambo kweesi baabamo; ni baloomba isi iwe nga bali khu nyaantsa Imbesemu, iwe wabayeeta waabatiimiilila.

¹⁰Iwe waamanya uri umuyiinga uwa Misiri ni linaambo lyeewe ni baraangirisi beewe abe bamiinikhilisa babaandu boowo. Nashiryo iwe wakhola bye kamakaanga bibiriisa khu ba Misiri waakila baakhurya iwe naabi ni khukhwoolisa lwe shaleelo luno.

¹¹Iwe wakabananisamo inyaantsa khabili waakila babaandu boowo baabiramo nga bakyeendela khu liloba lilyoomu busa. Ne iwe wakholowa baasiku baabwe beekha nga kamabaale mu meetsi, kameetsi kaabamila.

¹²Abe buli kumuusi iwe uraangirira babaandu boowo nga uraambisa lifuumbi liikali, ne mu shilo waraambisa kusiindi kwe kumulilo khuubamulikhila babone intsila isi bakyeendelakho.

¹³Iwe weekha aasi khu lukiingi Sinaayi nga waama mwikulu waabakanikhayo, nio waakila iwe waawa babaandu boowo kamakaambila kamalayi ni biilakilo biilayi ni ndeekela indayi.

¹⁴Iwe wabaleekela nibo khukhwiisa lukoosi mu shifukhu shoowo shikhosefu sha Sabato, naluundi waalakila umwakaanisi woowo Musa khuubaleekela nibo kamakaambila koowo.

¹⁵Nga intsala ni yabalya, iwe wabawa biilyo khukhwaama mwikulu, naluundi buulesa ni bwabalya, iwe wabawa kameetsi khukhwaama mu lwaanda. Lwanyuma iwe waabalakila khuutsya khuwaamba shibala sheesi abe wamala khaale khukhwitsuba uri ukhaabawe nibo.

¹⁶Ne ndi bakuuka beefwe tsena abo baaba ni shikili shikali baalekha khuuloondelela kamakaambila koowo ta.

¹⁷Baalekha khurekeeresa bibyoowo ta, naluundi baalekha khushebulila bye kamakaanga byeesi iwe wakhola nga naabo baboone ta. Ne khulwe khuukhuminyaalila iwe beeroborera babeene umuraangirisi khuubamiinikhilisa nga ni baaba i Misiri. Ne iwe uli Wele uli mwirekefu khukhwiiyakhila, iwe uli uwe bubweela naluundi uwe shiisa, uwikhalilikha, naluundi uli ni khuukana khukhuukhakama ta. Nashiryo iwe walekha khubaantsukha nibo ta.

¹⁸Ikhaba nga nibo bebuumbila babeene shifwaani she moosi, bakhufwotsola iwe naabi, bashisaaya nga baloma bari, “Ba Isiraeli, uyuno niye Wele uwabarusa inywe mu khutaambisibwa i Misiri.”

¹⁹Khulwe shiisa shoowo shikali, iwe siwabaantsukha mu mubiimbi ta; siwabarusakho lifuumbi abe lilibaraangirira nibo kumuusi, namwe kumulilo abe kukubaraangirira mushilo khubokesa intsila khweesi bali ni khuutsya ta.

²⁰Iwe wabawa Umwoyo woowo umulayi khuubaraangirira nibo. Iwe siwaloba khuubawa nibo biilyo, namwe khuubawa kameetsi ta.

²¹Iwe wabaliindila nibo mu mubiimbi khuumala kimiiko kamakhumi kane; nga mbaawo sheesi bekoomba ta. Bikwaaro byaabwe sibyonuukha, namwe bikele byaabwe byasiila ta.

²²Iwe wabawa kamaani ke khuuwula bayiinga ni kamanaambo mu busoolo, waakila baabukula kamaswa ke babaandu abo. Bawaamba shibala sha Sihoni, umuyiinga wa Heshiboni, ni sha Ogo, umuyiinga uwa Bashani.

²³Iwe wabayila waabawa shibala sheesi abe wasubisa khuuwa bakuuka baabwe; wabawa tsikhabi tsye lisaaye liikali, baaba baakali khuuminyisa tsinieniesi tsye khwikulu.

²⁴Lisaaye lyaabwe lyatsya lyaawaamba shibala isho, beekela baawuli baasho. Iwe wabayeeta khuuwula mu busoolo bayiinga ni babaandu be mu Kanani, waalekha uri bakhole sheesi bakana khu baasiku baabwe.

²⁵Bawaamba biriimba byeesi bebotookhelesa kamatikiiyi, ni kimikuunda kikyaama biilyo biilayi. Beela muntsu abe tsitsiilimo bibiindu biilayi, baanywa kameetsi musebele tseesi nibo bakhaayaba ta. Baanyoola kimikuunda nga kilimo biilimwa biikali. Baalya biilyo bekura, naluundi baakhomela buulayi busa beekhoya khulwe tsiikhabi khukhwaama isi iwe.

²⁶Ne shitweela busa baakhuminyaalila iwe, naluundi baakhushukhakho khusiiwe. Baaminyaalila kamakaambila koowo, naluundi beera baŋoosi boowo beesi iwe wamweene waabasiindikhila khuubareewula, uri nio bakobole isi iwe. Baakhola bibiindu biikali bibikhukhomyaasa iwe.

²⁷Nashiryo iwe wabawaanayo mu makhono ke baasiku baabwe, waakila baababirisa buubi naabi. Ne mu khutaambisibwa khweesi baaba balimo, bakhulilila iwe bari ubayeete. Nga iwe uli mwikulu warekeeresa khuulila khwaabwe, wabawa sheesi baaloomba. Khulwe shiisa shoowo shikali, iwe wabasiindikhaatsakila baawonesi baabawonesatsaka khukhwaama khu baasiku baabwe.

²⁸Ne abe uli bafunakho luukoneele, baakhola bibyoonako luundi, nawe abe ndi luundi wabaantsukhila baasiku baabwe, khuubabirisa buubi. Abe uri bakobola isi iwe baloomba buyeeti, khulwe shiisa shoowo, iwe wabatimiilila khukhwaama mwikulu.

²⁹Iwe wabeelelela khuubareewula uri bakoboleyo khuuloondelela kamakaambila koowo. Ne shitweela busa beebirisa buubi, baalekha khuuloondelela kamakaambila koowo ta. Balekha khuuloondelela kamakaambila kakaareera buulamu ta, ne akhali baaba ni shikili beeloosela busa khukhuuminyaalila iwe.

³⁰Iwe wabekhaliilikha khuumala kimiiko kimikali naluundi waabareewula nga Umwoyo woowo abirira mu baŋoosi boowo. Ne shitweela busa baalekha khurekeeresa ta. Nashiryo iwe wabaantsukha mu makhono ke baasiku baabwe luundi.

³¹Ne shitweela busa, khulwekhuuba iwe uli Wele uwe shiisa shiikali naluundi uwiyakhila, waalekha khubahesa namwe khubaantsukha ta.

³² “Ni nashiryo, Wele weefwe, iwe uli uwe kamaani, umunyali uwa byoosi, iwe niye isi babaandu boosi barya, naluundi iwe uli umwiyikinwa mu ndakaano yoowo. Ukhabona bihangafu byeesi ifwe, ikhaba bayiinga beefwe, baraangirisi beefwe, baŋoosi beefwe, bakuuka beefwe, byeesi khubiriremo khukhwaama imbuka isi bayiinga ba Asiriya baakhuyilila ifwe mu bubowe khukhwoolisa anariha, nga shishiindu shifwiiti isi iwe ta.

³³Ilala, mwiibyo byoosi bibyamala khuukhukholikha khusiifwe, iwe warama nga uli uwaŋali mu byoosi. Iwe warama nga uli umwiyikinwa, n'efwe khwakhola bibyoonako.

³⁴Bayiinga beefwe, ni baraangirisi beefwe, ni basaayi beefwe, ni bakuuka beefwe, sibaloondelela kamakaambila koowo ta, namwe khureewula khweesi iwe wabawa ta.

³⁵Ikhaba nga iwe wabawa nibo buyiinga, ni bibiindu biilayi biikali naabi, ni liloba liikali naluundi liilayi, ne nibo baloba khukhwaantsukha bibyoonako byaabwe.

³⁶Bona ari ifwe khuli baakulwa, mu shibala sheesi iwe wawa bakuuka beefwe, uri balye bilimwa byamwo ni biwaanwa biilayi!

³⁷Likesa lyamwo liilayi lyoosi, liweela khu bayiinga beesi iwe warawo uri babe baawuli beefwe, khulwe bibyoonako byeefwe. Bakhwoolisa khusiifwe kumutaambo kumukali, bibyaayo byeefwe bayila nga ni bekanisa. Khuli mu mutaambo kumukali.”

³⁸Ni nashiryo, khulwe bibiindu bino byoosi, ifwe khulikho khukhola indakaano, khukirone. Baraangirisi beefwe, ni ba Levi beefwe, ni basaayi beefwe, boosi batsya khuukiisakho kimikhono kyaabwe.