Read lumasaaba Esiteri 2 Bible Online

Esiteri 2 - lumasaaba bible

Esiteri 2

¹Lwanyuma nga lirima ly'omuyiinga Ahasweero lyaamalile khuuweelela, waarama nga ashambaasa khu Vasuti ni neebyo byoosi byeesi aakhola, ni likaambila lyeesi aaba waamalile khuurusa lilimuwaambakho.

²Baryo babaakaanisi b'omuyiinga babaaba aambi naabi ni naye baamuloma bari, “O Umuyiinga, nibewo khuuweentselesa khwe bakhaana tsindungubaasi babaabonekha buulayi naabi.

³Ni nawe urobole baakhulu mu buli lisaza lye mu buyiinga bwoowo, babuusanise bakhaana bano tsindungubaasi, babaabonekha buulayi mu ntsu iye bakhasi mu shiriimba shino shikhulu Susa. Uryo iwe urewo Hegayi umwakaanisi woowo umwomole ukhola khu bye bakhasi, khuubalolelela. Baryo bakholebwekho nga bye bumiliwu byoosi ni biba.

⁴Lwanyuma lwayo umukhaana ukane afuure boosi isi kane usiime, ekyele nabakyelama mu shifwo sha Vasuti.” Umuyiinga waasiima kamakyesi kano kamalayi, aryo waakakholelakho.

⁵Ne mu shiriimba isho shikhulu Susa, mwabamo Umuyudaaya ulaangibwa Modekaayi, umwaana wa Yayiri, Yayiri umwaana wa Shimeyi, Shimeyi umwaana wa Kishi, uwe mu shikuuka sha Benyamini.

⁶Modekaayi yuno aaba mutweela khu baandu babaayilibwa mu bubowe khukhwaama i Yerusalemu, mu biseera byeesi umuyiinga Nebukaduneeza uwe Babulooni arekulilakho umuyiinga Yehoyakini, uwe Yuda waamusuta waamuyila mu bubowe.

⁷Modekaayi aaba n'umukhaana shaananyina sheewe, nga bamulaanga bari Esiteri, ne nga mu Luheburaniya bari Hadasa, isi aaba waatsowesa lwekhuuba s'aba ni paapa ni maayi ta. Umukhaana yuno aaba abonekha buulayi naabi mu byoosi. Ne basaali beewe ni baamala khuufwa, Modekaayi waamutsowesa nga umukhaana weewe umweene.

⁸Nga baamalile khuulaangilila likaambila ly'omuyiinga, bakhaana baakali baareerebwa mu shiriimba shikhulu Susa, baabara mu bunyala bwa Hegayi. Ni Esiteri naye n'areerebwa mu lubili lw'omuyiinga, aareebwa mu bunyala bwa Hegayi mweene, uwaba alolelela bye bakhasi.

⁹Hegayi waasiima naabi Esiteri, lwekhuuba aamwikhoyesa. Kila khaangukho arakikhilawo khuumumiliisa nga amuwa bye khukhwiyakha, ni khuumuwa biilyo bya buraawa. Hegayi waamuwa shiifwo sha buraawa, mu biseenge bibifuura buulayi, waamureerera bakhaana musaafu baarobole khukhwaama mu lubili lw'omuyiinga khuumwakaanisatsaka.

¹⁰Mbaawo umuundu isi Esiteri aaboolelakho linaambo lyeesi amamwo ta, namwe muungo mwaabwe ta, lwekhuuba Modekaayi aamuboolelela khuulekha khushikhola ta.

¹¹Abe buli shifukhu Modekaayi atsya ni etoloolela aambi ni siimba iyo iye bakhasi, lwekhuuba aakanatsaka naabi khuumanya nga Esiteri n'ali, ni isaambo isi bibiindu byaba bitsyamo.

¹²Nga imbuka ishiili khukhwoola iya buli mukhaana khuutsya isi umuyiinga Ahasweero khukhwiyokesana ta, aanyoowa khuumala kumwiiko kumubuufu nga bamumiliisa, nga likaambila liliwaamba khu bumiliwu bwe bakhasi nililoma: kimyeesi kisesaba nga bamuwakha kamafura keesi balaanga bari mira, ni kimyeesi kikiindi kisesaba nga bamuwakha kamafura kakawunya buulayi, ni bibiindi bibikhola khu bakhasi.

¹³Umukhaana yeesi n'aba nga atsya isi umuyiinga musaambo iyo, baamuwatsaka byoosi byeesi aakanatsaka nga aama mu siimba iye bakhasi khuutsya nasho.

¹⁴Abe umukhaana atsya isi umuyiinga angoloobe, ne kumutikhinyi kukwelakho ayilibwa mu siimba iye bakhasi ikiindi iyaba ili mu bunyala bw'omwomole w'omuyiinga Shasugaazi. Mbaawo umukhaana uweelayo isi umuyiinga luundi ta, khuurusakho nga abe umuyiinga waamusiimile, arumanisa baamulaanga.

¹⁵Ari imbuka iya Esiteri yoola iye khuutsya isi umuyiinga. Esiteri yuno uwaba umukhaana wa Abihayili, shaananyina sha Modekaayi, ne nga Modekaayi aamutsowesa nga Umukhaana weewe. Niye Esiteri mbaawo shishiindu shoositsana shishiindi sheesi aasaba ari bamuwe ta, khuurusakho ibyo byeesi Hegayi umwomole w'omuyiinga uwaba alolelela bye bakhasi aamulomela. Aryo Esiteri waasiimibwa naabi nabuli mutweela uwamubona.

¹⁶Aryo Esiteri waayilibwa mu moni ts'omuyiinga Ahasweero, nga ali mu lubili lweewe, mu mweesi kweesi baalaanga bari kwa Tebeti. Kuno kwaba nikwo kumwiiko kweewe kwe kumusaafu kwe buyiinga bwa Ahasweero.

¹⁷Aryo umuyiinga waakana naabi Esiteri khuuminyisakho bakhaana babaandi babaaramile boosi. Umuyiinga waamusiima naabi waamuyila niye nga ufuura boosi, kila amukwaarisa ikuutwa khu murwe kweewe, waamwikyelisilawo abweene awo khuuba nabakyelama weewe mu shifwo sha Vasuti.

¹⁸Umuyiinga waakabulila baakhulu beewe ni babaakaanisi beewe kamayiiya kamaboofu kameene, kakaakholebwa khulwa Esiteri. Walaangilila ari babaandu balekhe khuwa kumusolo ta, mu masaza ke mu buyiinga bweewe bwoosi, naluundi waakaba biwaanwa bibyoolana ni shiriifwa sh'omuyiinga.

¹⁹Mu mbuka isi bakhaana boosi baaba nga baabuusanile kumuluundi kwe khabili, Modekaayi naye, baaba baamuwa bunyala bwe khuuliinda khu shilibwa sh'omuyiinga.

²⁰Ne Esiteri aaba ashiliinda shimoonyo she linaambo lyeewe, lwekhuuba Modekaayi aaba waamuboolelela khuulekha khushikhola ta, ni naye nga amuwulila khukhwaamila ilala nga ashiili mukyeekhe.

²¹Mu biifukhu byeene ibyo mweesi Modekaayi aabeela uliinda khu shilibwa sh'omuyiinga, babili khu bomole b'omuyiinga nga nibo Bigitana ni Teresi, babaaba baliinda kimilyaango mweesi umuyiinga enjilila, baakhalala, kila bakhala luwomelo lwe khukhwiira umuyiinga.

²²Ne Modekaayi n'amanya khu luwomelo luno, waatsya waaboolela Esiteri amanyise umuyiinga khu luwomelo luno.

²³Baryo ni baaweentselesa baashinyoola nga shili shiryo, babomole babili bano baabatsangilila khu misaala. Umuyiinga waalakila ari bino byoosi babirone nga umweene abona mu shitabo sheebyo bibibawo nga bikhulu.