Read lumasaaba Esiteri 3 Bible Online

Esiteri 3 - lumasaaba bible

Esiteri 3

¹Nga bibiindu bino byoosi byaweele, umuyiinga Ahasweero waatsowesa Hamani umwaana wa Hamedata, uwaamila mu shikuuka sha Agagi, waamuwa bukhulu khuuba angaaki e baakhulu babaandi babaaramile boosi.

²Babaakaanisi boosi babaaba khu shilibwa sh'omuyiinga, baaba bafukhamatsaka aasi khuuwa Hamani lukoosi, lwekhuuba umuyiinga aaba waalakila ari bakhole baryo. Boosi baashikholatsaka, khurusakho Modekaayi yenyene niye uwekaana khuushikhola.

³Shino shaakila babaakaanisi boosi babaaramile babaaba khu shilibwa sh'omuyiinga khureeba Modekaayi bari, “Iwe lwashiina uminyaalila likaambila ly'omuyiinga?”

⁴Nibo baamukanikhatsakayo baryo buli shifukhu, ne Modekaayi waalekha khubawuliilisa ta, lwekhuuba niye aba waababoolela ari niye ali Umuyudaaya, ukhanyala waafukhamilila Hamani ta. Kila batsya baboolela Hamani bibiindu bino, bari nio babone oba Modekaayi eloosela namwe ta.

⁵Ne Hamani n'ashimanyakho ari Modekaayi s'afukhama aasi, namwe khuumuwa lukoosi ta, lirima liikali naabi lyaamuniina.

⁶Naluundi nga Hamani n'ashimanyakho ari Modekaayi Umuyudaaya, waakhalawo khuulekha khumwiira niye yenyene ta. Shino shaakila waakhola tsiŋoonaŋoona tse khuuhesa Bayudaaya, babaaba babaandu ba Modekaayi boosi, mu masaza koosi ke mu buyiinga bwa Ahasweero.

⁷Mu mwiiko kwe likhumi na kibili kwe buwuli bwa Ahasweero, mu mweesi kukuunyoowa; nikwo kumweesi kwa Nisani, Hamani waalakila ari bakhupe khaakokha kheesi balaanga bari Puri, khuurobolawo shifukhu khweesi banyala booleleselakho luwomelo luno. Baakhupa khaakokha khano, ni shifukhu shishakhalibwawo shaba she likhumi na bitaru, mu mweesi kwe likhumi na kibili, nikwo kumweesi kwa Adari.

⁸Kila Hamani aloma umuyiinga Ahasweero ari, “Iliwo babaandu baalala baasalanila luundi baamalatana mu masaza koosi ke mu buyiinga bwoowo. Babaandu bano bali ni kamakaambila kakaakhafwaanana ni ke babaandu babaandi ta, naluundi sibaloondelela kamakaambila koowo ta. Nashiryo sishiyeeta umuyiinga khuubekhaliilikha ta.

⁹Ni nashiryo, n'uba nga waashisiimile, birisa likaambila lililoma liri boosi beeribwe. Shino iwe n'ukane ube nga waashikholile, ise indi mwirekefu khuuwaanayo mu libiikhilo lye buyiinga tsi talanta kumukaanda mutweela (100,000) kwe feetsa, intsiwaambise abo babaalolelela kimilimo ky'omuyiinga.”

¹⁰Aryo kila umuyiinga arusakho intsiyi iye khu lwaala lweewe iye bukhulu, isi baaraambisatsaka khuurakho khaabonelo khu bilaangililo bya buraawa, waakiwaambisa Hamani, umwaana wa Hamedata uwe mu shikuuka sha Agagi, uwaba umusiku umukhulu we Bayudaaya.

¹¹Kila umuyiinga alomela Hamani ari, “N'ubiikhe tsinusu, ni babaandu n'ubakholekho shoosi sheesi iwe ukana.”

¹²Khu shifukhu she likhumi na bitaru, mu mweesi kukuunyoowa, Hamani waalaanga baaroni b'omuyiinga boosi. Niye waabalakila barone likaambila lirusibwe isi buli shisiintsa, mu buli lulimi luluraambisibwa mu buyiinga, byaakaanisibwe isi babaami, ni ba gafana, ni baakhulu babaandi. Likaambila lino lyaarusibwa mu lisiina ly'omuyiinga Ahasweero umweene, lyaareebwakho ni khaabonelo khe ntsiyi yeewe.

¹³Buurone buno bwaatimisibwa mu khaangu naabi isi bisiintsa byoosi bye mu buyiinga, nga mulimo likaambila lililakila khuuhesa, ni khukhwiira, ni khuumalilawo ilala Bayudaaya boosi. Mu nibo nga mulimo baahele, ni baakhulu; bakhasi ni babaana baŋaalye, ni khuunuula bibiindu byaabwe byoosi. Bino byoosi nga babikholela khu shifukhu shitweela sheene, mu mweesi kwe likhumi na kibili, nga nikwo kumweesi kwa Adari.

¹⁴Bilomo bibyaba mu burone buno, byaba bye khuubirisibwa nga likaambila mu buli shisiintsa, babilaangilile isi babaandu boosi beŋoonaŋoonele shifukhu isho.

¹⁵Baarume baayila buurume buno mu khaangu naabi nga baloondelela likaambila ly'omuyiinga, ni likaambila lino lyasalanisibwa mu shiriimba shikhulu Susa. Lwanyuma umuyiinga ni Hamani bekhala aasi, baarakikha khuunywa, ne shiriimba Susa shoosi shaba nga shaayumbaalile busa naabi.