Read lumasaaba Esiteri 7 Bible Online

Esiteri 7 - lumasaaba bible

Esiteri 7

¹Baryo Hamani n'umuyiinga baatsya khu mayiiya wa nabakyelama Esiteri.

²Ndi luundi nga ni baaba balikho banywa iviini khu mushiimba kuno, umuyiinga waareeba nabakyelama Esiteri ari, “Nabakyelama Esiteri, shiina sheesi ukana? N'umboolele sheesi ukana, ni nase kane ishikhuwe aba ikhaba khuukhuwa shisiintsa she buyiinga bwase.”

³Nabakyelama Esiteri welamo ari, “O umuyiinga, iwe n'uba nga wamaambiile ise shiisa, luundi n'uba nga waasiimile, sheesi inoomba nikhwo khuwonesa buulamu bwase, ni khuwonesa buulamu bwe babaandu baase balekha khukhwiiribwa ta.

⁴Lwekhuuba buulamu bwase ni bwe babaandu baase bwaakulisibwile khuutsya khukhwiiribwa luundi khumalibwilewo ilala. Ne shiba busa shiri khuukulisibwa nga baakulwa be seetsa ni bekhasi, ise khali sinenaanileyo khuukhutaambisa iwe ndyo ta, lwekhuuba khali mbaawo kumutaambo kukwaandintsolesele is'uli ta.”

⁵Kila umuyiinga Ahasweero areeba nabakyelama Esiteri ari, “Naanu niye uli khuutsya khukhola shishiindu shishifwaana nga isho? Naluundi umuundu uyo ali waheena?”

⁶Esiteri welamo ari, “Umusiku weefwe uuli khuukhukubyeenga ifwe, niye umusaani umubi yuno, Hamani!” Aryo Hamani shireesa shaamuwaamba nga ali mu moni ts'omuyiinga ni nabakyelama.

⁷Isho shaakila umuyiinga wenyukhawo nga wetsuule lirima, waarurawo isi aba ali khunyweela, waatsya ibulafu mu mikuunda kye lubili. Ne Hamani n'ashibona ari umuyiinga abe waakhalilewo khaale shiina she khuumukholela, waaramawo nga ekoontselela nabakyelama Esiteri amuyeete khuuwonesa buulamu bweewe.

⁸Umuyiinga n'aba nga akobola mukari khukhwaama ibulafu mu mikuunda kye lubili, waanyoola Hamani nga waakwiile khu shiindu shishiili nga shitaanda isi Esiteri aaba weyalisile. Kila umuyiinga aloma ari, “Umusaani uyu akana khufwakhila nabakyelama wase ni naano mu moni tsase, mu lubili lwase lulweene!” Umuyiinga n'amala khuuloma aryo, babomole b'omuyiinga baabiimbilila Hamani mu moni.

⁹Aryo mutweela khu bomole b'omuyiinga abe ulaangibwa Haribona waaloma ari, “Hamani yuno abeele waasimikhile khaale kuusaala kukwoolesa tsifuuti kamakhumi musaafu na tsiraano mu muungo mweewe, abe kwe khuutsaangililakho Modekaayi, ate nga niye uwawonesa buulamu bw'omuyiinga.” Shikila umuyiinga alakila ari, “Ni mumutsaangilile khu kuusaala kweewe kweene ukwo.”

¹⁰Abweene ni abweene, baatsangilila Hamani khu kuusaala kweesi aaba waaŋoonaŋooneele Modekaayi. Liryo lirima ly'omuyiinga lyaaweelela.