Read lumasaaba She Lukyeendo 1 Bible Online

She Lukyeendo 1 - lumasaaba bible

She Lukyeendo 1

¹Yakobo n'atsya i Misiri, abe umwaana weewe Yusufu waamenyayo khaale. Kamasina ke babaana ba Yakobo beesi aatsya ni nabo i Misiri, nga buli mutweela atsya ni be muntsu yeewe niko kano:

²Rewubeni, Simoni, Levi ni Yuda,

³Isakaari, Zebuluni ni Benyamini,

⁴Dani, Nafutali, Gadi ni Asheri.

⁵Atweela baaba babaana ni babetsukhulu ni bisoni bya Yakobo, boola babaandu kamakhumi musaafu.

⁶Lwanyuma lwayo, Yusufu waafwa ni babandaaye beene boosi, ni babaandu babaaba mu muboolo ukwo nabo baafwa.

⁷Ne lisaaye lye ba Isiraeli lyaasaalana naluundi lyaabalaaha luukali, baryo baamalatana mu Misiri mwoosi.

⁸Lwanyuma lwe kimiiko kimikali, Misiri yaafuna umuyiinga umuyaakha, abe ukhaamanyakho ibyo byeesi Yusufu aakholela Misiri ta.

⁹Kila umuyiinga tsana alomela ba Misiri ari, “Bona ba Isiraeli bano baasaalanile naabi, naluundi balikho beekyela be kamaani naabi khuukhuminyisa ifwe.

¹⁰Ifwe ni khubalekha busa khuryo khwaalekha khubakholakho shiindu shoosi ta, banabalaaha naabi. Ne lwanyuma kane uri buusoolo bubalukhawo akari eefwe ni baasiku beefwe, banyala baatubaanila atweela ni baasiku beefwe, shiryo shibanyalise khukhwilukha khukhwaama khu liloba lyeefwe batsye.”

¹¹Ni nashiryo ba Misiri baarakho abo abe babaraambisa ba Isiraeli kimilimo kye buukulwa, khuubawa kimilimo kimisiro, nga bakana babamalemo kamaani. Baabamiinilisa khukhwoombekhela Faraawo biriimba bibili, nga nibyo Pisomu ni Ramusesi.

¹²Ne she khukhwiyaanga, indi ikhaba nga baabamiinilisa naabi baryo, ne ba Isiraeli beloosela busa khuubalaaha baasalanila ni mu bibala bibiindi. Ni khulwe ilomo yino, ba Misiri baabiyila naabi ba Isiraeli ni khuuminyisakho amataayi.

¹³Ni nashiryo baabalakila khuuraamba ni kamaani khuuminyisakho amataayi,

¹⁴waakila ni kumutaambo kwaabawaamba. Baabawaamba ni kamaani khuubuumba kamatofwaali, ni khuuroka buutosi, ni khuuraamba mu mikuunda kye ba Misiri.

¹⁵Ari kila umuyiinga alaanga bakhasi ba Misiri babasaalisa ba Isiraeli, nga babili khu bakhasi bano baaba nibo Shifura ni Puwa.

¹⁶Waabalomela ari, “Ni muba nga mulikho musaalisa bakhasi ba Isiraeli, ne mwaabona nga waasaalile umukhaana, mulekha atsowe, ne nga mwaaboone muri waasaalile umusiinde, uyo mwiira!”

¹⁷Ne bakhasi babasaalisa bano abe nibo bali babaandu babesaaya Wele, ni nashiryo baalekha khukhwiira babaana besiinde, nga umuyiinga abe n'abalakila ta.

¹⁸Kila umuyiinga abalaanga luundi waabareeba ari, “Shiina kila mukhakhola sheesi ise nabalomela khuukhola? Shiina kila mukhali khukhwiiraka babaana besiinde?”

¹⁹Kila bakhasi bano beelamo umuyiinga bari, “Bakhasi ba Isiraeli sibali nga bakhasi ba Misiri ta. Nibo basaala khaangu naabi, nashiryo ifwe nga khushiili khutsya khwoolayo isi bali ta, khunyoola nga basaalile khaale.”

²⁰Ni nashiryo Wele waawaambila bakhasi babasaalisa bano shiisa,

²¹aryo waabawa lisaaye lye babaana baakali. Ne ba Isiraeli beloosela busa mu bukali.

²²Khukhwoolela ilala ikhumaliilisa, umuyiinga wa Misiri waalakila babaandu beewe boosi ari, “Buli umwaana uwesiinde isi ba Isiraeli basaala, muli ni khuumuwaamba mumutuume mu luutsi Nayilo! Ne bekhaana mubalekhe batsowe.”