Read lumasaaba She Lukyeendo 12 Bible Online

She Lukyeendo 12 - lumasaaba bible

She Lukyeendo 12

¹Lwanyuma nga imbuka yaabirirewo, Umukasya waalomela Musa ni Aroni ari,

²“Kumweesi kuno kukhaabatsake nikwo kukuunyoowa kwe ba Isiraeli, kukhaabatsake nikwo kukuunyoowa mu mwiiko kweenywe.

³Boolela lituuli lye ba Isiraeli muri khu shifukhu she likhumi she kumweesi kuno, buli umuraangilisi uwe muungo ali ni khuurobora lisheese lilyaana namwe imeeme iye imbusi, iye khukhwiira balye.

⁴Ni siinga nga intsu ibamo babaandu bafwiiti bari nga sibanyala khuumala lisheese lilyaana ilyo ta, babaandu be tsintsu tsibili bali ni khuukabanana litweela lyonyene.

⁵Muli ni khuurobora lisheese namwe imbusi, ne shishaayo isho shili ni khuuba nga shoolisa kumwiiko mutweela kwonyene kwe buukhulu. Ili ni khuuba indurume ikhalikho ni buuleme bwoosi ta.

⁶Shishaayo shino muli ni khushaayilisa khukhwoolisa angoloobe e shifukhu she kumweesi she likhumi na bine, imbuka isi lituuli lye ba Isiraeli boosi balikhoonyelakho bibyaayo bino.

⁷Bakhaabukulekho kamafuki ke shishaayo shishiriibwile, bakahakhe khu bisiindi bye kimilyango kyaabwe, ni kakaandi bakahakhe angaaki e kimilyango kye tsintsu mweesi baba baliliile bibyaayo ibyo.

⁸Mu shilo sheene isho, balilya tsinyama tsintsoshe, nga balya ni kimikaati kikikhalimo kamamela ta, naluundi baliilekho n'isuufwa.

⁹Ikhabawo ulyakho inyama imbisi, namwe isi batutubisile busa ta, ne akhali ndi balya intsoshe. Ikhaba kumurwe ni bileenge ni bye muunda byoosi, bali ni khuubilya nga bibyooshe.

¹⁰Mu shilo umwo, muli ni khuulya ingali nga ni munyala, ne iyo yoosi iba yaaramilekho, kumutikhinyi muli ni khuukyoosha ni kumulilo ilale iwewo.

¹¹Nga mulya, muli ni khuukilya musaambo yino, yibowa lukhoba muunda, mukwaare tsisapata mu bikele byeenywe, mu mukhono uwaamba imiimbo iye khukhwitiila, naluundi muli ni khuukilya mu khaangu naabi. Kano kali Kamayiiya ke Khuubirakho khw'Omukasya.

¹²Khulwekhuuba mu shilo sheene isho, ise ikhaabire mu shibala she ba Misiri, nga ikhoonyaka babaana besiinde baakiboole mu buli intsu, naluundi na buli shishaayo shiikiboole. Ise ndi niye Umukasya ni ba wele be ba Misiri boosi, kane ise imbawe shitaambiso.

¹³Kamafuki keesi kane muwakhe khu milyaango kye khu ntsu tseenywe, kane kabe nikho khaabonelo khakhantsokesa ise isi inywe mumenya. Nashiryo nga ise naboone kamafuki iko, inywe kane imbabirekho busa, nga mbaawo buwaangafu bubuubakwakho khusiinywe ta, nga indikho indeera kumutaambo mu Misiri.”

¹⁴Waalooselakho ari, “Inywe muli ni khuushebulilatsaka shifukhu shino, naluundi muli ni khuukholatsaka kamayiiya kano khulwekhuuba shili shifukhu sh'Omukasya. Lili likaambila lili, buli kumuboolo kuli ni khuukhola shino.”

¹⁵Khuumala biifukhu musaafu muli ni khuulya kimikaati kikikhalimo kamamela ta. Ni khu shifukhu shishinyoowa, muli ni khuuwaamba kamamela kakaali muntsu tseenywe mukaruse antsye. Khulwekhuuba umuundu yeesi waamala waalya khu shiindu shoosi sheesi bareeremo kamamela mu biifukhu bye kamayiiya bino, umuundu uyo singane abe nga abalikha khuuba umu Isiraeli luundi ta.

¹⁶Khu shifukhu shishinyoowa ni khu shifukhu she kumusaafu, muli ni khuubuusanila atweela mu khwisaaya. Mbaawo kumulimo kweesi umuundu yeesi akhila khuukhola khu biifukhu biibili ibyo ta, akhali khuuteekha biilyo shonyene.

¹⁷Muli ni khuukholatsaka Kamayiiya ke shifukhu she kimikaati kikikhalimo kamamela ta, nga mushebulila shifukhu sheesi ise nabarusilayo khukhwaama i Misiri. Shino muli ni khuushikhola buli kumwiiko.

¹⁸Mu khukhola kamayiiya kano, muli ni khuurakikha shangoloobe nio bushe biifukhu likhumi na bine, nga mulya kimikaati kikiikhalimo kamamela ta. Mwiloosele ni kamayiiya kano khukhwoolisa angoloobe e shifukhu shishikhola kabili na shitweela.

¹⁹Khuumala biifukhu musaafu bino, mbaawo intsu yoosi inyoolikhanamo kamamela ta, oba ili iye ba Isiraeli namwe ta. Khulwekhuuba umuundu yeesi ni kane alye shishiindu shishiilimo kamamela, umuundu uyo singane abalikhe nga mutweela khu lituuli lye ba Isiraeli ta.

²⁰Mbaawo umuundu uulya shishiindu shishiilimo kamamela ta, mu bumenyo bweenywe, muli ni khuulya kimikaati kikikhalimo kamamela ta.

²¹Lwanyuma kila Musa alaanga baaraangilisi be mu Isiraeli, waabalomela ari, “Buli muungo muli ni khuurobora likheese lilyaana, khuuloondekhana ni buukali bwe aango, mulisale khulwe Kamayiiya ke Khuubirakho.

²²Rukha shisusutsu she kamasaafu ke lufuufu, ushisanye mu mafuki ke shishaayo nga kashiili khu lweelo. Lwanyuma uwakhe kamafuki ako angaaki khu mulyaango, ni khu bisiindi biibili bye kumulyaango. Nga mwaakholile shino, mbaawo umuundu yeesi uuli ni khuurura ibulafu ta, khukhwoolisa ni busha kumutikhinyi.

²³Khulwekhuuba mu shilo isho, Umukasya kane abire mu Misiri, nga akhoonyaka babaana besiinde baakiboole be ba Misiri. Umukasya ni kane abone kamafuki kano angaaki e kimilyaango kyeenywe ni khu bisiindi biibili, kane abire busa khu mulyaango ukwo, alekhe khufukiilisa malayika weewe ureera khuufwa khukhwiingila mu ntsu umwo, khuukhoonya umwaana umusooleli umukiboole ta.

²⁴Inywe mwabeene ni lisaaye lyeenywe, muli ni khuuloondelela isaambo iye khuukhola kumukholo kuno nga likaambila ni liloma.

²⁵Naluundi nga mweetsile khukhwoola mu shibala sheesi Umukasya akhaabawe inywe, nga n'abalomela, muli ni khuukholatsaka kamayiiya kano.

²⁶Ne nyaanga babaana beenywe ni balibareeba bari, ‘Ne kamayiiya kano kamanyisa shiina?’

²⁷“Mubeelamo muri, ‘Khuuwaanayo isaayilo yino khuushebulila Khuubirakho khw'Omukasya. Bino khubikhola khulwekhuuba mu shilo isho khaalekho nga khuli mu Misiri, Umukasya aabirira busa angaaki khu ntsu tseefwe. Aatsya nga akhoonyaka babaana bakiboole basooleli be ba Misiri, ne babeefwe waalekha khubeera ta.’ ” Nga Musa waamalile khuukanikha, babaandu ba Isiraeli boosi baafukhamila aasi, besaaya Umukasya.

²⁸Ni nashiryo babaandu boosi baatsya baakhola nga Wele n'aba waababooleele she khuukhola, nga abirira mu Musa ni Aroni.

²⁹Mu shilo sheene isho, Umukasya waakhoonyaka bikiboole byoosi mu Misiri. Khukhwaamila ilala khu mukiboole uwa Faraawo, abe uuli umusikha weewe, ni baakiboole be baakulwa beewe, khukhwoolisila ilala ni bibyaayo biikiboole.

³⁰Kila Faraawo enyukha mu shilo umwo, niye atweela ni baraambi beewe, ni ba Misiri boosi, baarakikha khuukuukuula. Buli intsu mu Misiri yaaba nga yafwiisile umuundu. Aabawo luwuungu luukali naabi mu Misiri.

³¹Mu shilo umwo kila arumanisa baamulaangila Musa ni Aroni. Nga beetsile waabalomela ari, “Aamba babaandu beenywe mutsye, mukhururire mu shibala sheefwe. Ni mutsye mwisaaye Umukasya, nga ni mulomile.

³²Tsya ni bibyaayo byeenywe byoosi nga ni mulomile. Ne ni muloombe Wele weenywe nase aambe ikhabi.”

³³Ba Misiri baakhakakho naabi khuubona bari ba Isiraeli barura mu shibala shaabwe, batsye. Baabalomela bari, “Ni mutsye khaangu! Khulwekhuuba nga simwatsiile ta, ifwe fweesi khunafwa khuwewo.”

³⁴Ni nashiryo ba Isiraeli bakaanda buufu bwe khuukhola kimikaati khaangu, baabura mu bisefuluya. Ne baalekha khutubaasamo kamamela khuubukhola buyiimbe ta. Kila babowa bisefuluya mu ngubo baabisutila khu mayi kaabwe.

³⁵Naluundi abe ba Isiraeli bakholele nga Musa n'abalomela, abe baloombile ba Misiri khuubawa izaabu, ifeetsa, ni bikwaaro.

³⁶Abe Umukasya waakholile ba Misiri khuuba be kimyoyo kimilayi isi ba Isiraeli, nga babawa buli sheesi baabaloomba. Musaambo iyo, nga barura mu Misiri, baaba baanuulile bibiindu bye ba Misiri.

³⁷Ba Isiraeli baakyeenda khukhwaama mu shiriimba she Ramusesi khukhwoola mu she Sukosi. Nga waarusilekho babaana ni bakhasi, abe babaaramire boosi boola babaandu nga kimyeeka kisesaba (600,000).

³⁸Babaandu babaandi baakali swa busa baatsya ni nabo, nga bali ni tsikhaafu ni bibyaayo bibiindi biikali busa.

³⁹Nga barura mu Misiri, baatsya mu khaangu busa baalekha khunyalisa ni khuuteekha kimikaati ta, akhali buufu bweesi baaba nga baamalile khaale khuukaanda, ne nga sibulimo kamamela ta. Ni nashiryo bawaamba buufu ubwo, bateekhamo kimikaati kikikhalimo kamamela ta.

⁴⁰Imbuka isi ba Isiraeli baamala mu Misiri abe yoolela ilala kimiiko bitoondo bine ni kamakhumi kataru (430).

⁴¹Lwanyuma lwe kimiiko ikyo, babaandu ba Wele boosi beelayo iwaabwe khurura i Misiri.

⁴²Mu shilo isho Umukasya waakona nga abaliinda, ni nashiryo buli kumwiiko, ba Isiraeli nabo ni kimiboolo kyoosi, baakona meeso nga baliindilila Umukasya, nga bamwiisamo shiriifwa.

⁴³Lwanyuma Umukasya waalomela Musa ni Aroni ari, “Kano niko kamakaambila kakawaambakana ni Khuubirakho: Mbaawo umuundu ukuundi ulya khu mayiiya ke Khuubirakho ta, akhali ba Isiraeli bonyene.

⁴⁴Ne baakulwa beenywe banyala baalyakho, nga baamala khaale khukhwingila imbalu.

⁴⁵Mbaawo umuundu yeesi ubaraambira inywe ufukiilisibwa khuulyakho ta.

⁴⁶Kamayiiya koosi muli ni khuukaliila muntsu mukari, mbaawo usutakho inyama iye khu mayiiya waakirusa antsye ta. Mbaawo khuufunamo likuumba lye inyama iye kamayiiya kano ta.

⁴⁷Ba Isiraeli boosi bali ni khuulya khu mayiiya kano.

⁴⁸Umuundu ukhali umu Isiraeli ta n'akana khuulya khu kamayiiya kano atweela ni nanywe, buli uwesiinde muntsu yeewe bali ni khuunyoowa khuumukheba imbalu. Nio lwanyuma naye akabananile atweela ni ba Isiraeli khu mayiiya, abe busa nga umu Isiraeli. Mbaawo umuundu ukhengila imbalu uuli ni khuulya khu mayiiya kano ta.

⁴⁹Likaambila lino liwaamba khwiinywe mweesi, ba Isiraeli ni babaakhali ba Isiraeli ta, ne nga bamenya musi inywe.”

⁵⁰Ba Isiraeli boosi baaloondelela ibyo byoosi byeesi Umukasya aabalomela khuukhola, nga abirira mu Musa ni Aroni.

⁵¹Ni khu shifukhu isho, Umukasya waarusa ba Isiraeli ni be tsiingo tsaabwe, khuurura mu Misiri.