Read lumasaaba She Lukyeendo 13 Bible Online

She Lukyeendo 13 - lumasaaba bible

She Lukyeendo 13

¹Umukasya waalomela Musa ari,

²“Buli umwaana uwesiinde umukiboole yeesi nga waasaalikhile, muli ni khuumuwaanayo musaambo iya buraawa isi ise, ikhaba shishaayo shiikiboole muli ni khuushiwaanayo isi ise. Biikiboole bye seetsa ibyo bili bibyase.”

³Nio Musa waalomela babaandu ari, “Ni mushebulilatsake shifukhu shino. Shino shili shifukhu khweesi Umukasya aaraambisa kamaani keewe, waabarusa inywe mu bubowe i Misiri, waabareera mu shifwo shino. Ni nashiryo khu shifukhu shino, mukhalya shishiindu shoosi shishiilimo kamamela ta.

⁴Lwe shaleelo khu shifukhu shino she mu mweesi kwa Abibu, muli ni khukhwinyukha ino mutsye.

⁵Ne nga Umukasya weetsile khubayila inywe waaboolisa khu liloba lyeesi aalomela bakuuka beenywe, nga aluno ari limenyamo ba Kanani, ni ba Hiiti, ni ba Amori, ni ba Hiivi, ni ba Yebusi, mu shibala shishiilimo liiloba liilayi naabi, lilyaama biilyo biikali, inywe muli ni khuukholatsaka kamayiiya ke bibiindu bino musaambo yino:

⁶Muli ni khuumala biifukhu musaafu nga mulya kimikaati kikikhalimo kamamela ta. Ne khu shifukhu she kumusaafu, muli ni khuulya kamayiiya nga mwikhoya khulw'Omukasya.

⁷Mu bifukhu musaafu ibyo, mbaawo umuundu khusiinywe uulya kumukaati kukuulimo kamamela ta, namwe mbaawo umuundu uuli ni khuunyoolikhana ni kamamela nga kali aambi ni isi amenya ta.

⁸Lwanyuma khu shifukhu she kumusaafu, muli ni khuusontsoola babaana beenywe muri mukhola shino, khulwe khuushebulila shifukhu sheesi Umukasya aabarusila inywe mu khutaambisibwa i Misiri.

⁹Kamayiiya kano kane kabe busa nga khaabonelo kheesi mukwaara khu mikhono kyeenywe, namwe kheesi mubowa mu bweeni mweenywe. Khulwekhuuba mu khuukhola shino, kane mube mulikho muleekela babaandi indeekela y'Omukasya, uwaraambisa kamaani keewe khuubarusa inywe i Misiri.

¹⁰Ni nashiryo buli kumwiiko, muli ni khuulya kamayiiya kano khu shifukhu nisho shitweela.”

¹¹Ne nga Umukasya waamalile khuubawa inywe liiloba lyeesi abalomela inywe ni bakuuka beenywe, aluno ari lilimenyamo ba Kanani,

¹²khukhwaamila abweene awo, muli ni khuumuwa musaambo iya buraawa buli shishisaalikha nga shiikiboole, oba umwaana uwesiinde, namwe shishaayo shiseetsa. Bino muli ni khuubiwaanayo isi Umukasya.

¹³Mu shifwo she khuuwaanayo isikilya ingiboole iseetsa, unyala waawaanayo lisheese lilyaana. Ne noola sishili shiryo ta, isikilya iyo muli ni khuukifuna likosi. Ikhaba buli mwaana umusiinde umukiboole, muli ni khuuwaanayo shishiindu isi Umukasya nio akile mumwikobosele isi mwabeene.

¹⁴Ne nyaanga babaana beenywe ni balibareeba bari kamayiiya kano kamanyisa shiina, mulibeelamo muri, khukhola shino khuushebulila nga Umukasya n'araambisa kamaani keewe, wakhurusa ifwe mu khutaambisibwa nga ni khwaba i Misiri.

¹⁵Khulwekhuuba Faraawo nga n'akhunisa kumwoyo kweewe, waalekha khukhulekhuula ifwe khuurula mu Misiri ta, Umukasya aakhoonya buli shiikiboole shoosi mu Misiri. Shino Umukasya aashikhola khu baana baakiboole besiinde, ni khu byaayo byeene. Shino nisho shishikila ise nawaanayo isi Umukasya buli shiikiboole shoosi shiseetsa khukhwaama mu byaayo. Ne buli mwaana uwesiinde umukiboole, khuli ni khuuwaanayo shishiindu isi Umukasya nio akile ifwe fabeene khumwikobosele.

¹⁶Kamayiiya kano kane kabe busa nga khaabonelo kheesi mukwaara khu mikhono namwe kheesi mubowa mu bweeni mweenywe. Khulwekhuuba mu khukhola shino, kane mube mulikho muleekela babaandi indeekela y'Omukasya, uwaraambisa kamaani keewe khuubarusa inywe i Misiri.

¹⁷Nga Faraawo waamalile khuulekhuula ba Isiraeli ari batsye, Wele waalekha khubaraangilila khuutsiila khu mukhoosi kukubirira mu ba Filisitiya ta, ikhaba nga nikwo kwaba abe kumwiimbi. Khulwekhuuba Wele aamanya ari babaandu bano ni aabawo baasiku babaabebwakala, banyala baakhalawo khukhwiilayo i Misiri.

¹⁸Nashiryo Wele waabaraangilila waabayila, baatsya baatalaanda nga babirira mu mubiimbi, khukhwoolisa khu nyaantsa Imbesemu.[1] Ba Isiraeli baarura mu Misiri nga berekekheele busoolo.

¹⁹Musa waalomela babaandu baashukhuluula kamakuumba ka Yusufu, baatsya ni nako. Khulwekhuuba nga Yusufu ashiili khufwa ta, aalekha shilaamo ari, “Wele aliitsa khuubarusa mu Misiri. Ne nga weetsile, muli ni khuushukhuluula kamakuumba kaase mutsye ni nako.”

²⁰Nashiryo beloosela khukhwaama i Sukosi, baatsya baakonela i Esamu, shishiili khu ndulo khwa Misiri, aambi ni kumubiimbi.

²¹Kumuusi abe Umukasya umweene abaraangilila nga araambisa kamafuumbi kakebuusile atweela. Ne mu shilo abe Umukasya umweene abaraangilila nga wekelile kuulilo kuukali kukwibuusile atweela. Shino shaabanyalisa khukyeenda kumuusi ni mu shilo.

²²Abe kamafuumbi kakebuusile atweela ni kuulilo abe kukwibuusile atweela, nibyo bibyaraangilila babaandu buli esi baatsyaka.