Read lumasaaba She Lukyeendo 14 Bible Online

She Lukyeendo 14 - lumasaaba bible

She Lukyeendo 14

¹Nga boolile mu shifwo shishilaangibwa shiri Esamu, Umukasya waalomela Musa ari,

²“Lomela ba Isiraeli mushuusekho intsila, mwiikotemo mwiileyo mutsye mwibuusaase aambi ni shiriimba shishilaangibwa shiri Pihahirosi, shishiili akari a Migidoli n'inyaantsa Imbesemu, naluundi shili aambi ni Balasefoni.

³Khulwekhuuba kane shino shikile Faraawo ambaase ari ba Isiraeli balikho bayiyaana busa, baariire khuukhalisa kumubiimbi, nashiryo balikho baweentsa kumukhoosi kukuundi kwe khuutsiilakho.

⁴Kane ise samweene ikhole Faraawo abe ni kumwoyo kwe shikili, abaloondekho nga akana khuubawaamba abeeseyo mu Misiri. Ne kane ise samweene imusoolanise, naluundi noonakise liiye lya Faraawo. Shino kane shikile ise ifune khuuruuyibwa, ni ba Misiri nabo kane bamanye bari ise ilala indi Umukasya.” Ni nashiryo ba Isiraeli baaloondelela byeesi Umukasya aabalomela, baatsya baabuusana mu shifwo sheesi aabalakila.

⁵Umuyiinga wa Misiri n'awulila bari ba Isiraeli benyukhile baatsiile khuurura mu Misiri, niye umweene atweela ni naabo abe babaali baawuli mu buyiinga bweewe, baashuusakho shishambaaso. Baaloma bari, “Shiina kila ifwe khukholile shishiindu nga shino shiri? Shiina kila khulekhile ba Isiraeli abe babaakhuraambila ifwe nga baakulwa khuutsya?”

⁶Ni nashiryo umuyiinga waalakila baabusaasa kamakaali ke basilikhale, ni liiye lyeewe lyoosi atweela, nga beerekekhela buusoolo.

⁷Waalakila baaraangilisi be basilikhale khuuyila liiye lye babaandu, ni kamakaali bitoondo bisesaba (600), ni basilikhale babaakyeendela khu makaari babaandi, khuuloonda khu ba Isiraeli.

⁸Ikhaba nga ba Isiraeli nibo beloosela busa khuutsya, ne Umukasya waakhola kumwoyo kwa Faraawo khuuba ni shikili waakila waabaloondakho.

⁹Ne liiye lya Faraawo nga lilimo tsiŋwaaŋwa tsyeewe ni kamakaali ni basilikhale babaakyeendela khu bikele busa, baanyoola ba Isiraeli nga babusaane mu shifwo shishilaangibwa Piyarosi, shishiili akari a Balasefoni n'inyaantsa Imbesemu.

¹⁰Ba Isiraeli ni beenyusa tsimoni baabona umuyiinga ni liiye lyeewe nga lyaabembiyisile, baaba ni khuurya khuukali naabi. Nashiryo baaloomba isi Umukasya bari abayeete.

¹¹Kila babaandu beŋuluŋuunya isi Musa nga baloma bari, “Shiina kila ukhukholile shishiindu nga shino shiri? Shiina kila iwe wakhurusile ifwe mu Misiri? Abe mu Misiri mbaamo liloba lye khuukhusiikhamo ifwe ta, kila wakhureerire uri ifwe khufwiile ano mu mubiimbi muno?

¹²Ni khwaba nga khushiili i Misiri, ifwe sikhwakhulomela iwe khuri khulekhe khube khukhole buukulwa mu Misiri ta? Khulwekhuuba abe shimiinyisakho ifwe khuukhola buukulwa mu Misiri, khufuurisa ni khufwiila mu mubiimbi muno.”

¹³Ne Musa waabakobolamo ari, “Inywe mukheyembelela ta. Ni mube banyindaalifu. Shaleelo kane mwabeene mwibonelekho kamaani k'Omukasya nga ni kanabawonesa inywe. Ba Misiri beesi mulikho mubona abo boosi banahela, simulibabonakho luundi ta.

¹⁴Umukasya umweene anabasoolanila, inywe muli ni khukhwiimikha muloleelele busa.”

¹⁵Kila Umukasya areeba Musa ari, “Shiina kila ulikho untsikoontselela ise uri imbayeete? Lomela ba Isiraeli belooseleyo ni lukyeendo.

¹⁶Iwe aamba imiimbo yoowo mukhono, ukisute angaaki nga waakyokeseleele khu nyaantsa. Kameetsi kameene kane keekabananisemo khabili, nio babaandu banyalise khuukyeendela khu liloba lilyoomu busa.

¹⁷Kane ise ikhole ba Misiri babe ni kimyoyo kye shikili, baryo kane babaloondekho. Shishikane shikholikhe khu muyiinga ni kamakaali keewe, ni liiye lyeewe lyoosi, kane shikile babaandu baambe ise shiriifwa.

¹⁸Nga ise naamalile khuufuna shiriifwa khulwe khuuwula Faraawo ni liiye lyeewe mu busoolo, nio ba Misiri bamanye bari ise ndi niye Umukasya.”

¹⁹Khu mbuka yino, malayika wa Wele abe uuli ibweeni we liiye lye ba Isiraeli, waashuusa shiifwo waabakobola imukoongo waabwe. Ni kamafuumbi kakebuusile atweela abe kakaabali ibweeni waabwe, nako kaakobola kaaba inyuma waabwe.

²⁰Keetsa kaaba akari e ba Misiri ni ba Isiraeli. Kamafuumbi kano kaarama nga kamulikhila ba Isiraeli buwaanga, ne kakhiisa ba Misiri baaba nga bali mu shiilima. Mu shilo isho shoosi khu maye kano koombitsana, alekha khubawo lilyesyeenda aambi ni lilyashe ta.

²¹Lwanyuma Musa waakolola kumukhono kweewe nga waakuloseleele khu nyaantsa. Abweene awo Umukasya waasiindikha ikhuungu iye kamaani khukhwaama ibwaamanyaanga, yaawuutsa shiilo shoosi, waakila yaawukhanisamo inyaantsa khabili, lulwoomu lwaabonekha.

²²Ba Isiraeli baakyeenda baabirira khu lwoomu, nga khu ndulo ni khu ndulo kameetsi keemile kebuusile nga kamatikiiyi.

²³Liiye lye ba Misiri lyaabaloondakho, nga likana libawaambe.

²⁴Ne nga abe antsye bukana khusha, Umukasya waalola aasi isi liiye lye ba Misiri lyaba, aryo waabayumbaasa nga asintsiila mu kulilo ni lifuumbi, khuurya khuukali khwaabawaamba nga bakana batime beelukhe batsye.

²⁵Ne kimipiila kye kamakaali kaabwe kyewaamba mu lutondooyi, ni nashiryo shaaba shihangafu naabi khukhwilooselayo. Shino shaakila ba Misiri baaloma bari, “Khayo khulekhe babaandu bano babe, khulwekhuuba Umukasya ali khu luwaande lwaabwe, nga akhusoolanisa ifwe.”

²⁶Kila Umukasya alomela Musa ari, “Kolola kumukhono kwoowo ukuloselele khu nyaantsa, nio kameetsi kakobole kamile liiye lye ba Misiri lyoosi.”

²⁷Nashiryo Musa waakolola kumukhono kweewe nga Wele n'amulomela. Ni bwasha kumutishinyi, kameetsi kaakobola, kaamila ba Misiri. Baakhakakho khuutima bari batsye, ne Umukasya waakhola inyaantsa yaabamila boosi.

²⁸Kameetsi kaakobola kaamila liiye lye ba Misiri lyoosi, mbaawo na mutweela uwarama nga umulamu ta.

²⁹Ne ba Isiraeli beeloosela busa khuukyeendela khu lwoomu, nga inyaantsa yeemikhile khu ndulo ni khu ndulo nga kamatikiiyi.

³⁰Ni nashiryo khu shifukhu isho, Umukasya waawonesa ba Isiraeli khukhwaama mu meeno ke ba Misiri. Ba Isiraeli baabona kimilaambo kye ba Misiri, nga kyaasalaniile khu ndulo khwe inyaantsa.

³¹Ba Isiraeli baabona bari kamaani k'Omukasya keesi aaraambisa khukhwoonakisa ba Misiri nga kali ke angaaki naabi. Ni nashiryo baafukiilila khukhwisaaya Umukasya, naluundi baaba ni bubwiyikino mu byeesi abe Musa aloma.