Read lumasaaba She Lukyeendo 15 Bible Online

She Lukyeendo 15 - lumasaaba bible

She Lukyeendo 15

¹Ni nashiryo shino shaakila Musa ni ba Isiraeli baaruuya Umukasya, nga beemba kumweenya kuno: Ise kane niimbile Umukasya kimyeenya khulwekhuuba niye waamalile khuuwula mu busoolo bwe kamaani! Umukasya waakilile kameetsi kaamilile tsiŋwaaŋwa atweela ni basilikhale abe babatsiikhalakho.

²Umukasya ali niye kamaani kaase, nisho shishikila ise neemba kumweenya, naluundi niye uwumbonisile ise. Umukasya ise imuruuya naluundi naamwiisamo shiriifwa, khulwekhuuba niye ali Wele wase naluundi ali Wele we bakuuka baase.

³Lisina lyeewe alaangibwa ari Umukasya, naluundi ali umusoolani uwe kamaani kamakali naabi.

⁴Umukasya awaamba kamakaali ni liiye lya Faraawo waabituuma mu nyaantsa. Ni basilikhale babafuura buulayi boosi nabo baweela mu nyaantsa Imbesemu.

⁵Kameetsi kaabamila boosi beekha aasi, besiikha aasi nga kamabaale.

⁶Mukasya, iwe nga uraambisa kamaani koowo ke angaaki ni buunyala bwoowo, iwe waminiaangula baasiku beefwe.

⁷Mukasya, mu khuwula abo boosi babaakhukhaandisa iwe, waba waawulile buusoolo bwe kamaani. Khulwe lirima lyoowo, iwe waabahesa boosi, baaba busa nga uwoosha kamasaantsa ni kumulilo.

⁸Khulwe lirima lyoowo liikali naabi, waakila kameetsi keela iyi ni neeyi, keemikha busa nga kamatikiiyi ni kameetsi kakaarama aasi, kahandalala busa nga libaale.

⁹Baasiku abe baalomile bari, Kane khubatimise khukhwoolisa ni kane khubawaambe, khukabanane byeesi bali ni nabyo. Kane khubabirise nga ni khuukana. Lwanyuma kane imbukule lurima lwase imbeere boosi bafwe.

¹⁰Ne iwe ni wareera ikhuungu yaawuutsa, inyaantsa yaabamila boosi, besiikha busa mu meetsi nga kamabaale, kameetsi kaabamila.

¹¹Mu ba wele boosi, O Mukasya, naanu uuli nga iwe? Naanu ukhwoolelela iwe mu shiriifwa ni mu bukhosefu? Naanu ukhwoolelela iwe mu khukhola bye kamakaanga, naluundi bikholwa bye shiriifwa shibiririfu nga isho?

¹²Iwe ni wookesanisa kamaani koowo, liiloba lyaabamila boosi.

¹³Babaandu beesi iwe wamweene wawonesa, iwe wabaraangiliile ni khuukana khuukali. Iwe wamweene wabaraangiliile khuuboolisa mu shifwo shoowo shiikhosefu.

¹⁴Kamanaambo kakaandi ni kaawulila bino, kaaba ni khuunikina khuukali. Abo babaamenya mu Filisitiya, khuurya khuukali khwaabawaambile.

¹⁵Ari baaraangilisi be mu Edomu ni be mu Mowabu, beetsuule buuri buukali. Ni naabo boosi babaamenya mu Kanaani, khuurya khwaabawaambile naabi.

¹⁶Khuurya ni khuunikina byaabawaambile, khulwe kamaani koowo, boosi baasila busa bafwaana nga babafwiile. Baasila busa, O Umukasya, khukhwoolisa nga babaandu beesi iwe wamweene wasikula, baamalile khuubira.

¹⁷Iwe wamweene kane ubaraangilile ubayile uboolise khu lukiingi lwoowo luroobore, mu shifwo mweesi iwe wamweene umenya, shiifwo shikhosefu sheesi kamakhono koowo kameene koombekha.

¹⁸Umukasya akhaabe umuwuli khukhwoolisa biilo ni biilo!

¹⁹Ba Isiraeli baabirira khu liloba lilyoomu. Ne ba Misiri ni baabaloondakho ni tsiŋwaaŋwa ni kamakaari kaatso, ni baselikhale abe babaakyeendela khu ŋwaaŋwa, ni benjila abe isi inyaantsa ibirira, Umukasya waakobosa kameetsi kaabamila.

²⁰Nio Miryamu uwaba umuŋoosi naluundi nga ali umukooko wa Aroni, waabukula byeesi basakayisa. Kila bakhasi boosi bamuloondakho nga beemba kimyeenya naluundi nga bashina kamashino.

²¹Kila Miryamu abeembela kumweenya kuno ari: Yimbila Umukasya kimyeenya, khulwekhuuba niye waafuurire buusoolo bwe kamaani naabi! Tsiŋwaaŋwa ni babaatsitimilakho boosi niye waabatuumile mu meetsi.

²²Khukhwaama abweene awo, Musa waaraangilila ba Isiraeli khuurura khu Inyaantsa Imbesemu, baatsya boola mu mubiimbi kwe Shuri. Baakyeenda biifukhu bitaru mu mubiimbi nga sibanyoola kameetsi ta.

²³Ni boola i Mara, baanyoola kameetsi, ne baalekha khukanywa ta, khulwekhuuba abe kaaluluwa. Ni nashiryo shiifwo isho baashilaanga bari “Mara.”[2]

²⁴Kila babaandu beŋuluŋuunya nga bareeba Musa bari, “Ne ari ifwe khunanywa shiina?”

²⁵Musa waaloomba buyeeti khukhwaama isi Umukasya, kila Umukasya amwokesanisa shisaala ari ashituume mu meetsi. Musa n'ashibukula waashituuma mu meetsi, nako keekela kamalayi ke khuunywa. Nga bali mu shifwo Mara isho, Umukasya waabakhakilisa naluundi waabawa kamakaambila ni indeekela.

²⁶Umukasya waaloma ari, “Inywe siinga muloondelela byeesi ise imbaboolela buulayi bubweene, naluundi mwaakhola ibyo bibiili bye bukhosefu mu moni tsyase ise Umukasya Wele weenywe, mwaaloondelela kamakaambila kaase ni indeekela yase, nga mukhola bibiili biilayi, ise singene imbasiindikhile shitaambiso she tsindwaale nga ni nasiindikhila ba Misiri ta. Lwekhuuba ise ndi Umukasya Wele weenywe, uubawonesa inywe.”

²⁷Lwanyuma ba Isiraeli boola mu shifwo shishilaangibwa shiri Elimu, abe shishiilimo tsisebele tsye kameetsi likhumi na tsibili, ni kimisaala kamasheendu kamakhumi musaafu. Nashiryo baakona abweene awo.