Read lumasaaba She Lukyeendo 16 Bible Online

She Lukyeendo 16 - lumasaaba bible

She Lukyeendo 16

¹Mu mweesi kukuukhola khabili khukhwaama nga ba Isiraeli ni baarura i Misiri, khu shifukhu she likhumi na biraano, benyukha khukhwaama i Elimu, baatsya boola mu mubiimbi kwe i Siini, kukuuli akari a Elimu ni lukiingi Sinaayi.

²Nga boolile iyo mu mubiimbi, babaandu boosi baarakikha khukhwiŋuluŋuunya khu Musa ni Aroni,

³nga baloma bari, “Shiifuurisa, khali Umukasya aakhwiira ifwe nga khushiili i Misiri. Abe nga khuli i Misiri khulya tsinyama tsingali, ni kimikaati kimikali naabi, khukhwoolisa abe ni khwikura. Ne inywe mwakhurerire ifwe mu mubiimbi muno muri ifwe fweesi khufwe intsala.”

⁴Kila Umukasya alomela Musa ari, “Ise inabalakasila inywe kimikaati khukhwaama mwikulu, kikilaangibwa kili ‘imaanu’.[3] Buli shifukhu babaandu bali ni khuubusaasa ikyo kikibamala. Shino kane shikile ise imanye oba baloondelela byeesi ise inoma namwe ta.

⁵Ne buli sabiiti khu shifukhu she khaseesaba, bali ni khuubusaasa bibibamala mu biifukhu bibili.”

⁶Nashiryo kila Musa ni Aroni balomela babaandu bari, “Lwe shaleelo angoloobe kane nanywe mushimanye muri Umukasya niye uwabarusa inywe mu Misiri.

⁷Ni kumutikhinyi kane inywe mubone shiriifwa sh'Omukasya she kamaani, khulwekhuuba niye waawuliile nga inywe ni mumwiŋuluŋuunyakho. Shiina kila mwiŋuluŋuunya isi ifwe? Ne ifwe nibo banaanu?”

⁸Kila Musa eloosela nga aloma ari, “Kane inywe mumanye muri niye ali Umukasya, nga buli angoloobe niye waabaweele inywe tsinyama khuulya, ni kumutikhinyi abawe kimikaati mulye khukhwoolisa mwikurire ilala. Mulikho mwiŋuluŋuunya khu niye, akhuba khusi ifwe ta. Khulwekhuuba ifwe nibo naanu? Umukasya waawuliile khuulila khweenywe.”

⁹Kila Musa alomela Aroni ari, “Lomela lituuli lye ba Isiraeli boosi uri, ni mwisheende aambi isi Umukasya, khulwekhuuba niye waawuliile khukhwiŋuluŋuunya khweenywe.”

¹⁰Aroni n'aba nga ashikanikha isi lituuli lye ba Isiraeli, bari balola mu mubiimbi, khaangukho baabona shiriifwa sh'Omukasya nga shaakhoseleele mu mafuumbi.

¹¹Kila Umukasya alomela Musa ari,

¹²“Ise naawuliile khukhwiŋuluŋuunya khwe babaandu baase. Ne ari baboolele uri buli angoloobe kane balye tsinyama, na buli kumutishinyi kane balye kimikaati kibakhaase na khubakhaasa. Nio lwanyuma bamanye bari ise Umukasya, indi niye Wele waabwe.”

¹³Angoloobe ni oola, binywiinywi tsisiindo tseetsa tsaakwa tsaamalatana buli aandu oosi, abe isi bamenya. Ni bwasha kumutishinyi, abe liime lyawaambile khu bunyaasi.

¹⁴Nga liime lyaamalile khuubalakala, kumubiimbi kwoosi kwaaba nga kwetsuule bubuundu bubuuli nga kamahaandu, ne nga bubonekha nga kamararara.

¹⁵Ba Isiraeli ni baabona bibiindu bino baarakikha khukhwireeba bonyene bari, “Ne binaanu bino?” Khulwekhuuba abe sibaabonatsakakho bibiindu bibifwaana biryo ta. Kila Musa abalomela ari, “Kino nikyo kimikaati kyeesi Umukasya abaweele inywe ari mulye.

¹⁶Umukasya waalakiile ari buli mutweela ali ni khuubusaasa ibyo bibimala be mu ntsu yeewe. Buli mutweela ali ni khuufuna tsisowaani tsibili tsye kimikaati tsintsitsufu. Buli mutweela ali ni khuulya ekure.”

¹⁷Ni nashiryo babaandu baakhola nga ni baabalomela. Baalala baabuusanisa kimikali, babaandi babuusanisa mifwiiti,

¹⁸ne buli mutweela khuuloondekhana ni shipimo shishibamala. Alekha khubawo kikiramakho ta.

¹⁹Musa weloosela waababoolela ari, mbaawo umuundu ubiikhakho kumukaati khuukona mu ntsu ta.

²⁰Ne batweela khu nibo baalekha khuwuliilisa byeesi Musa aaloma ta, baryo baabiikhakho kimikaati kyaakona mu ntsu. Ni bwasha kumutishinyi, abe kimikaati kino kyetsuule tsinyeende naluundi abe kilikho kiwunya buubi. Shino shaakhalasa naabi Musa.

²¹Abe buli kumutikhinyi, buli mutweela abusaasa biilyo bibimumala. Ne abe uri kumuumu kubila naabi, bibiramire byaayengukha.

²²Ne abe khu shifukhu she khaseesaba mu buli sabiiti, buli mutweela abusaasa ibyo bibimumalakho biifukhu bibili. Abe buli mutweela bamubuusila tsisowaani tsine tsintsitsufu. Ne baaraangilisi be babaandu ni baatsya baboolela Musa bibiindu bino,

²³niye waabakobolamo ari, “Umukasya waalakiile ari kumukaamba shili shifukhu sha Sabato. Shili shifukhu she shiriifwa naluundi shikhosefu, she khuuwola nga mwiisamo Umukasya shiriifwa. Nashiryo busaasa ibyo bibiimala muteekhe, nga mubona muri mubiikhakho ibyo bibibamala khu shifukhu shishilooselakho.”

²⁴Ni nashiryo baabibiikha khukhwoolisa kumutikhinyi, nga Musa n'abalakila. Tsinyeende tsyaalekha khukwamo ta, naluundi biilyo byaalekha khuwunya buubi ta.

²⁵Musa waabalomela ari, “Ni mulye biilyo ibyo shaleelo, khulwekhuuba shaleelo shili shifukhu sh'Omukasya sha Sabato. Lwe shaleelo singane munyoole biilyo ibyo byaakwiile aasi nga busheele ta.

²⁶Kane mubuusatsake biilyo bino khuumala biifukhu bisesaba. Ne khu shifukhu she kumusaafu, shishili shifukhu sha Sabato, singane mubinyoolatsakewo ta.”

²⁷Khu shifukhu she kumusaafu, aabawo babaandu batweela babaatsya khuuweentsa biilyo ibyo, ne baalekha khubinyoolawo ta.

²⁸Kila Umukasya areeba Musa ari, “Inywe kane muminyaalile kamakaambila kaase ni ndeekela yase khukhwoolisa liina?

²⁹Shimanye muri ise samweene niye ubawa shifukhu sha Sabato. Nashiryo khu shifukhu she khasesaba ise imbawa inywe biilyo bibimala biifukhu bibili. Khu shifukhu sha Sabato, buli mutweela ali ni khuurama ingo weewe awumule.”

³⁰Nashiryo khu shifukhu she kumusaafu babaandu baaba mu khuwola.

³¹Ba Isiraeli balaanga kimikaati kino bari imaanu. Abe kili kimiwaanga, naluundi kifwaana nga bumiitso buwaanga, ni khuuŋaaha khwakyo abe khuli busa nga kamahaandu kakaalikho bubuushi bwe ntsushi.

³²Kila Musa aboolela babaandu byeesi Umukasya aabaloma ari, “Piimakho tsisowaani tsibili tsye biilyo bino, imaanu, mubiikhekho. Khulwekhuuba ise ingana babeetsukhulu beenywe nabo babone kimikaati kyeesi ise nabaliisakho inywe nga muli mu mubiimbi, nga ise ni nabaamisa inywe i Misiri.”

³³Lwanyuma Musa waalomela Aroni ari, “Piimakho tsisowaani tsibili tsya imaanu utsire musaatsi, utsiyile utsibiikhe mu shifwo she khukhwisaayila Umukasya, nio kimiboolo kikiitsa nyaanga mu moni nakyo kiibonelekho.”

³⁴Nashiryo Aroni waayila shipimo isho waashibiikha mu shifwo shikhosefu, nga Umukasya n'alakila Musa.

³⁵Ba Isiraeli baalya imaanu khuumala kimiiko kamakhumi kane, khukhwoolisa ni baatsya boola khu ndulo khwe liloba lye Kanani, abe lyeesi babaandu bamenyamwo.

³⁶Shipimo sheesi baapimatsaka abe shoolisa tsisowaani tsibili tsintsitsufu.