Read lumasaaba She Lukyeendo 18 Bible Online

She Lukyeendo 18 - lumasaaba bible

She Lukyeendo 18

¹Yesero aaba umusaayi uwe mu shifwo sheesi balaanga bari Midiyani, naluundi abe nga niye usaala umukyelama wa Musa. Naye waawulila bibiindu byoosi byeesi abe Umukasya aaba nga waamalile khuukholela Musa ni ba Isiraeli, ni saambo isi aabamusa khukhwaama i Misiri.

²Makiboolekho, Musa aasiindikha umukyelama weewe atweela ni babaana beewe babili, khukhwiilayo khuumenya isi Yesero, paapawe w'omukyelama mweene. Yesero waabakaanila baamenya ni naye. Mu mbuka yino, Yesero weetsa nga areera Zipora, umukyelama wa Musa, ni babaana tsana ba Musa.

³Umwaana umukiboole aasaalikha nga Musa ashiili umwiitswa busa, kila amutwiikha lisiina ari Geresomu, lilimanyisa lili “Ise ndi umwiitswa.”

⁴Umwaana ukhola khabili waamutwiikha lisiina ari Elieza. Nga limanyisa liri, “Wele we bakuuka baase niye uwanjeeta ise, waakila Faraawo waalekha khukhuuntsira ta.”

⁵Nashiryo Yesero, paapa wa Musa umukhwe, wawaamba mukha Musa ni babaana ba Musa babili, baatsya mu mubiimbi khuubona Musa, abe uuli khuumenya aambi ni lukiingi lwa Wele.

⁶Yesero waasiindikhila Musa buurume nga aloma ari, “Bona ise paapawo umukhwe, indikho niitsa khuukhubona iwe, nga ndikho niitsa n'umukyelama woowo ni babaana boowo.”

⁷Ni boola, Musa waatsya khuubakaanila. Kila enamila Yesero, khuumwiisamo shiriifwa, naluundi waamukwa mu shifuba. Nga baamalile khuusheesana, bengila mu Lisari Likhosefu.

⁸Nga bali mu bweene umwo, Musa waaboolela paapawe umukhwe, bibiindu byoosi byeesi Umukasya aakhola khu Faraawo ni khu ba Misiri, khulwe khuuwonesa ba Isiraeli. Waamuboolela bihangafu byoosi byeesi baanyoola khu ntsila, naluundi musaambo tsyeesi Umukasya aabayeetamo.

⁹Yesero waasangaala naabi khulwe biilayi byeesi Umukasya aakholela ba Isiraeli, khulwekhuuba aabawonesa khukhwaama mu meeno ke ba Misiri.

¹⁰Kila Yesero aloma ari, “Umukasya uwakhuwonesa iwe ni ba Isiraeli khukhwaama mu meeno ka Faraawo ni mu meeno ke ba Misiri, aruuyibwe naabi.

¹¹Ari ise naamanyile nga Umukasya ali uwe kamaani khuuminyisa ba wele boosi. Khulwekhuuba niye wawonesele babaandu beewe khukhwaama mu buwuli bwe ba Misiri, abe babaababirisa buubi.”

¹²Yesero waahaanayo isaayilo intsoshe ni biwaanwa bibiindi isi Wele. Kila Aroni ni baaraangilisi boosi be babaandu bekhala aasi khuulya biilyo ni Yesero, mu moni tsya Wele.

¹³Khu shifukhu shisheelakho, Musa wekhala khu shitsoloŋo khuukhala kimisaango. Babaandu boosi beetsa beema nga bamwibotookhelela, khukhwaama kumutikhinyi khukhwoolisa angoloobe.

¹⁴Yesero n'abona ibyo byoosi byeesi abe Musa alikho akholela babaandu, kila amureeba ari, “Shiina kila ulikho ukhola shishiindu nga shino shiri? Shiina kila iwe wenyene uli niye umukayi, naluundi waalekha babaandu baakhwibotookhelela bari, khukhwaama kumutikhinyi khukhwoolisa angoloobe?”

¹⁵Musa weelamo ari, “Khulwekhuuba babaandu beetsa isi ise bereeba nga bakana bamanye sheesi Wele akana bakhole.

¹⁶Nga iliwo khuukhaandisana akari aabwe, beetsa isi ise naabakhalilawo, naluundi naabaleekela kamakaambila ka Wele ni byeesi akana bikholebwe.”

¹⁷Yesero waamwiilamo ari, “Sheesi ulikho ukhola sishili shilayi ta.

¹⁸Shino shibaluyisa naabi iwe ni babaandu babaakhwiitsayo, khulwekhuuba kumulimo kuno kuli muhangafu naabi, umuundu mutweela wenyene s'ukunyala ta.

¹⁹Rekeeresa ise ikhuwe khu makyesi, naluundi kane Wele akhuyeete. Khali ubeele iwe niye ukanikha isi Wele, nga ureera kimisaango kyaabwe isi Wele.

²⁰Iwe n'ubaleekele kamakaambila ka Wele, ni byeesi niye akana bakhole, uryo ubokesanise bamanye isaambo isi bali ni khukhwibirisamo ni byeesi bali ni khuukhola.

²¹Ni khuuminyisilakho ilala, robora khukhwaama mu baandu bano, abo babeesamo Wele shiriifwa, babaali babeyikinwa, naluundi babaakhalya iwoongo ta. Uwaambe babeene abo ubarewo nga baawuli khu matuuli ke babaandu baboola oba likhumi, namwe kamakhumi karaano, namwe shitoondo shitweela, namwe shikana shitweela (1,000).

²²Khayo bano babe nibo babaakaya babaandu mu misaango kya busheele, ne kimisaango kya buraawa, nikyo kyeesi bareera isi iwe. Shino kane shikhwaanguyisile iwe kumulimo kwoowo, naluundi kane babaandi babe nga bakabanana mu bwakaanisi buno ni nawe.

²³Iwe n'ukhola shino, naluundi ili niyo isaambo isi Wele akana ushikholemo, kane unyalise kumulimo kuno, ni babaandu bano buli mutweela kane eleyo ingo weewe nga ali mu lukoosi.”

²⁴Nashiryo, Musa waaloondelela kamakhula ka Yesero, waakhola nga n'amulomela.

²⁵Musa waarobora baawuli baalayi khukhwaama mu buli shikuuka she ba Isiraeli, waabawa khuuraangilila kamatuuli ke babaandu. Nga batweela baraangilila babaandu likhumi, babaandi kamakhumi karaano, babaandi shitoondo shitweela, ni babaandi baraangilila shikana shitweela.

²⁶Bano baraamba nga baakayi be kimisaango kye babaandu, mu misaango kya busheele. Ne kimisaango kya buraawa, nga bakiyila isi Musa.

²⁷Lwanyuma Musa waasiibula Yesero, kila elayo ingo weewe.