Read lumasaaba She Lukyeendo 19 Bible Online

She Lukyeendo 19 - lumasaaba bible

She Lukyeendo 19

¹Kumweesi kwe khataru nga kurakikha, khukhwaama nga ba Isiraeli ni baarura mu Misiri, boola mu mubiimbi kwe Sinaayi.

²Ni benyukha khukhwaama i Refedimu, boola mu mubiimbi kwe Sinaayi, baamenya mu mubiimbi ukwo. Abweene awo, baamenya mwisina mwe lukiingi.

³Kila Musa aniina khu lukiingi isi Wele. Umukasya waamukanikhayo khukhwaama mu lukiingi nga amuloma ari, “Tsya uboolele ba Isiraeli uri:

⁴Inywe mwabeene mwabona sheesi ise nakhola ba Misiri. Naluundi mwamanya isaambo isi ise nabareeramo ino isi samweene, naaba busa nga kunywiinywi waasu ni kusutila kamaana kaakwo khu ndaha tsyakwo.

⁵Ni nashiryo, ni kane muloondelele byeesi ise imbaboolela, naluundi mwaloondelela indakaano yase mu shibala shoosi, kane inywe mube babaandu babaase baaburaawa, khulwekhuuba shibala shoosi shili shishase.

⁶Isi ise samweene, kane inywe mube buyiinga bwe basaayi naluundi linaambo likhosefu. Biilomo bino nibyo byeesi iwe uli ni khuuboolela ba Isiraeli.”

⁷Nashiryo Musa weelayo, waalaanga baaraangilisi be babaandu, kila ababoolela ibyo byoosi byeesi Umukasya aaba waamalile khuumulakila.

⁸Ni babaandu nabo atweela beelamo nga baloma bari, “Byoosi byeesi Umukasya alakiile, kane khubyoolelese.” Musa ndi naye waatsya waaboolela Umukasya byeesi babaandu baaloma.

⁹Umukasya waalomela Musa ari, “Bona indikho niitsa is'uli nga ndi mu lifuumbi liikali naabi, nio babaandu bawulile nga ise inganikha ni nawe. Shino kane shikile busheele bafukiilise byeesi iwe uloma.” Musa ndi weelayo waaboolela babaandu sheesi Wele aaloma.

¹⁰Umukasya waakanikha luundi isi Musa, waamulomela ari, “Tsya uboolele babaandu uri shaleelo ni kumukaamba bali ni khukhwipyeeluusa. Bali ni khuusiinga tsingubo tsyaabwe,

¹¹babe nga bali baberekefu khu shifukhu she khataru. Khulwekhuuba khu shifukhu she khataru isho, ise ikheekhe imbe khu lukiingi Sinaayi, isi babaandu boosi bakhaambonele ise.

¹²Uli ni khuurawo lulwaakha isi babaandu bali ni khukhwaakama. Bareewule uri bakhaniina khu lukiingi namwe balwitiilakho ta. Uyo yeesi ukane etiile khu lukiingi, kane eribwe.

¹³Mbaawo khuuwaamba khu muundu ufwaana aryo ta, akhali bali ni khuumwiira nga bamukhupa busa kamabaale namwe ta, bamulase busa buyiingo. Oba umuundu, namwe shishaayo shishitiila khu lukiingi, bali ni khuushiira. Lwanyuma lwe khuufuura ikhoombi, awo nio babaandu besyeende aambi ni lukiingi.”

¹⁴Lwanyuma Musa weekha aasi khukhwaama khu lukiingi, waakobola isi babaandu, kila abapyeelusa. Lwanyuma baasiinga bikwaaro byaabwe.

¹⁵Kila alomela babaandu ari, “Mu biifukhu bitaru muli ni khuuba baberekefu, ne mu mbuka yino umusaani akhetuubaasakho n'umukhasi ta.”

¹⁶ Khu shifukhu shishakhola khataru, nga antsye ashiili kumutishinyi, aabawo tsimbeni ni khukuula khwe fula. Kamafuumbi kamakali kaabowelela lukiingi, naluundi ikhoombi iye likono liikali lilyeene yaafuura. Babaandu boosi babaaba mu kaambi baaba ni khuurya khuukali naabi.

¹⁷Abweene awo, Musa waaraangilila babaandu khuurura mu kaambi, khuutsya khukhwaakanana Wele, boosi beema mwisina mwe lukiingi.

¹⁸Lisuusi lyaabowelela Lukiingi Sinaayi, khulwekhuuba abe Umukasya weekhile khukhwaama mwikulu mu mulilo kumukali. Lisuusi lyetuukha lyaafwaana busa nga lilirurira khwifuumbilo khu ngaaki, naluundi lwoosi lwaanikina.

¹⁹Likono lye khoombi ni lyeloosela khuuba lye kamaani kamakali naabi khuuminyisakho, Musa waakanikha, ni Wele waamukobolamo ni khuubalukha khwe fula.

²⁰Umukasya weekha weetsa khu ngaaki khwe Lukiingi Sinaayi. Kila alaanga Musa ari atsye amwakaananile khu ngaaki. Musa waatsya nga Wele n'aloma.

²¹Kila alomela Musa ari, “Yiilayo aasi ureewule babaandu khuulekha khukhalisa lulwaakha lweesi ureerewo mwisina mwe lukiingi ta. Khulwekhuuba ni bakhalisa baakhupa tsimoni tsyaabwe khu Wele, kane baakali khu nibo bahele.

²²Naluundi khayo basaayi babeetsa aambi n'Umukasya banyoowe bepyeeluuse. Khulwekhuuba ni balekha khuukhola shino ta, kane Umukasya abawe shitaambiso.”

²³Musa waakobolamo Umukasya nga aloma ari, “Babaandu sibanyala baaniina khu lukiingi ta. Khulwekhuuba iwe waamalile khaale khuukhureewula uri khurewo lulwaakha, naluundi uri khwipyeeluse.”

²⁴Umukasya waalomela Musa ari, “Yilayo wiitse ano nga uli ni Aroni. Ne ukhafukiilisa basaayi ni babaandu baakhalisa lulwaakha khukhwiitsa ingaaki ino isi Umukasya ta. Ni bakhola isho, kane ise imbawe shitaambiso.”

²⁵Aryo Musa weekha aasi isi babaandu, waababoolela byeesi Umukasya aabaloma.