Read lumasaaba She Lukyeendo 2 Bible Online

She Lukyeendo 2 - lumasaaba bible

She Lukyeendo 2

¹Umusaani mutweela khukhwaama mu shikuuka sha Levi, waayila umukhasi khukhwaama mu shikuuka sheene isho.

²Umukelema yuno waakaanila shisoombo, waasaala umwaana umusiinde, nga ali umumiliwu naabi, ni maayi weewe waamubisa muntsu khuumala kimyeesi kitaru.

³Ne n'aaboona ari s'anyala weloosela khuumubisa muntsu luundi ta, waamurukhila shikono, lwanyuma waashiluula mukari buulayi, ari kameetsi kakhengilamo ta. Wekhasa umwaana uyo mu shikono isho, waamuyila waamura mu makhalaamba kamaleeyi ke khu luutsi Nayilo.

⁴Umwaana yuno aaba ali n'umukooko weewe umukhulu. Nashiryo umukooko weewe yuno weemikhaatsaka aleeyikho, khuubona oba shiina shishinyala shaakholikha khu mwaana yuno.

⁵Lutweela umukhaana w'omuyiinga weekha iluutsi khukhwisiinga, nga baakeesa beewe balikho bakeenda ni naye woola khu ndulo khwe luluutsi. Umukhaana w'omuyiinga yuno n'abona shikono mu makhalaamba, waarumana mutweela khu bakeesa beewe khuutsya ashibukule khukhwaama isi shaba.

⁶Umukhaana w'omuyiinga n'ekula shikono, waabona nga mulimo umwaana, nga alikho alila. Shiisa shaamuwaambila umwaana uyo, kila umukhaana w'omuyiinga yuno aloma ari, “Umwaana yuno ali ni khuuba nga mutweela khu be ba Isiraeli”

⁷Khaangukho umukooko w'omwaana uyo, abe uwiimikhile nga emenielesa, weetsa waalomela umukhaana w'omuyiinga ari, “Ukana ise intsye ikhuweentsele mutweela khu bakhasi ba Isiraeli, akhutsowesele umwaana yuno?”

⁸Umukhaana w'omuyiinga weelamo ari, “N'utsye umureere.” Kila umwaana umukhaana uyo atsya khureera maayi w'omwaana umweene.

⁹Umukhaana wa Faraawo waalomela maawe w'omwaana tsana ari, “N'uyile umwaana yuno umuntsowesele, ni nase kane ikhuwe kumukheemba kwoowo,” Nashiryo maayi w'omwaana uyo, waayila umwaana waamutsowesa.

¹⁰Nga umwaana waatsowele, umukhasi uyo waamuyila isi umukhaana wa Faraawo, uwamwikesa khuuba umwaana uweewe. Kila amutwiikha lisiina ari “Musa,” nga aloma ari, “Khulwekhuuba namwangala khu meetsi.”

¹¹ Shifukhu shitweela, nga ari Musa waatsowa, ali umuundu umukhulu, waakyeendakakho waatsyakho isi ba Isiraeli baashe bataambisibwila, nga baraambisibwa buukulwa. Kila abona umu Misiri mutweela nga akhupa umu Isiraeli.

¹²Musa n'anyukanyuka waabona nga mbaawo umuundu yeesi umuboone ta, naye wenyukhila umu Misiri uyo, waamukhoonya, waabisa kumulaambo kweewe mu muyekhe.

¹³Musa n'elayo khuubona babaandu beewe luundi, waabona ba Isiraeli babili nga balikho bakhupana. Kila atsya isi uyo uwarakikhisa buusoolo waamureeba ari, “Iwe shiina kila ukhupa umu Isiraeli washoowo?”

¹⁴Kila uyo amwiilamo nga amureeba ari, “Naanu ukhureerewo iwe nga umuwuli weefwe, naluundi, iwe niye ukhukhalila ifwe kimisaango? Nase ukana khuntsira nga ni weerire umu Misiri?” Shino shareerera Musa khuurya khuukali naabi, khulwekhuuba aashifumbula ari babaandu baamanyile sheesi aaba waakholile.

¹⁵Faraawo n'awulila sheesi Musa aakhola, waamuweentsa ari amwiire. Ne Musa waatitukha waatsya mu shibala sheesi balaanga bari Midiani. Shifukhu shitweela, Musa abe wekhaale aambi n'isebele,

¹⁶aabawo bakhaana musaafu ba Yesero, uwaba umusaayi uwe Midiani, babeetsa khuutaha kameetsi khuuwa bibyaayo byaabwe binywe.

¹⁷Aabawo babaayi babeetsa baabatimisa bari barurewo batsye, ne Musa wenyukha khu ngaaki, waatseeta bakhaana bano, waawa ni bibyaayo byaabwe kameetsi.

¹⁸Bakhaana ni beelayo ingo, kila Yesero abareeba ari, “Shaamile shiryeena shaleelo mwaakobola khaangu muryo?”

¹⁹Baamwiilamo bari, “Iliwo umusaani umu Misiri ukhutseetile khukhwaama isi babaayi, khaba waakhutayila ni kameetsi waawa bibyaayo byeefwe byaanywa.”

²⁰Yesero waabareeba ari, “Ne ali waheena? Shiina kila mukheetsile ni naye? Tsya mumulaange eetse khulye biilyo ni naye.”

²¹Musa waafukiilila khuumenya muungo mwa Yesero, uwakelawo waamuwa umukhaana weewe Zipora, khuuba umukhasi weewe.

²²Zipora n'asaala umwaana, Musa waaloma ari, “Kane imulaange ndi Geresomu, khulwekhuuba ise ndi umwiitswa busa mu shibala shino.”

²³Lwanyuma lwe kimiiko kimikali, umuyiinga wa Misiri uyo waafwa. Ne ba Isiraeli baarama nga bataambisibwa, kila belootsa isi Wele bari abayeete. Khuulila khwaabwe khwaatsya khwoola isi Wele.

²⁴Wele waawulila khuulila khwaabwe, aryo Wele waashebulila indakaano isi niye umweene aakhola ni Iburayimu, ni Isaaka ni Yakobo.

²⁵Wele waabona babaandu ba Isiraeli nga bataambisibwa, kila abawaambila shiisa.