Read lumasaaba She Lukyeendo 22 Bible Online

She Lukyeendo 22 - lumasaaba bible

She Lukyeendo 22

¹“Umuundu ni eeba iyeeyi namwe lisheese ne waalikhoonya, namwe waalikulisa, ali ni khuuliha ni tsiyeeyi tsiraano. Ne lisheese ali ni khuuliha ni kamasheese kane.

²Umuundu n'anyoola umwiifwi nga waafunile intsu yeewe wengiilemo alikho eeba, ne waakhupa umwiifwi uyo waamwiira, s'abakho ni kumusaango ta.

³“Ne siinga umuundu uyo akhupa weera umwiifwi uwiitsile khukhwiiba waamwiira kumuusi, aba ali ni kumusaango. “Umwiifwi aakha khuuliha byeesi ebile. Ne siinga aba nga s'ali na shiindu shoosi ta, baakha bamukulise umweene, ni kamapeesa bakaraambise khuuliha byeesi ebile.

⁴Shishaayo sheesi ebile ni bamunyoola nga ali ni nasho shishiili shilamu, oba ali ni iyeeyi namwe isikilya namwe lisheese, buli shitweela ali ni khuushiliyila kimiluundi kibili.

⁵“Umuundu n'alekha bibyaayo byeewe byaalya biilyo mu mukuunda kw'omuundu ukuundi, ali ni khuubukula khu bifuura buulayi khukhwaama mu mukuunda kweewe umweene, aliyile uyo uwe kumukuunda.

⁶“Umuundu n'awaambisa buuyi ne bwaatsya bwoosha biilyo bya beene mu mukuunda namwe byeesi baamala khaale khuubuunga, uwaambisile ali ni khuuliha umweene we biilyo bibyoonakisibwile.

⁷“Umuundu n'akhubiikhisa iwe ifeetsa yeewe, namwe bibiindu byeewe bibiindi, ne lwanyuma baabiiba khukhwaama mu ntsu yoowo. Ne umwiifwi n'anyoolikhana, ali ni khuubiliyila kimiluundi kibili.

⁸Ne ni balekha khunyoola umwiifwi ta, umweene uwe ntsu mweesi baabibiikha ali ni khukhwiitsa isi baakayi, okesanise oba niye uwibile bibiindu ibyo namwe ta.

⁹“Babaandu babili ni bakhaabisanila khu shiindu, oba iyeeyi, namwe isikilya, namwe lisheese, namwe shikwaaro, namwe shishiindu shoosi shishiiba nga shaakoraanile, nga buli mutweela aloma ari shili shisheewe, kumusaango kuno bali ni khuukureera isi baakayi. Uyo isi umukayi aba waakhaliile kumusaango khuumufuura, ali ni khuuliyila uwashe bibyoola kimiluundi kibili kye shishiindu isho.

¹⁰“Umuundu n'ayila wowashe isikilya, namwe iyeeyi, namwe lisheese, namwe shishaayo shoositsana khuumwaayisila, ne shaafwa, namwe shaakholikhakho shiindu shoosi, namwe shaakoraana baalekha khushibonakho luundi ta,

¹¹ali ni khukhwitsubila uwashe mu lisiina ly'Omukasya ari niye mbaawo sheesi akholile khu shaayo isho ta. Umwene uwe shishaayo ali ni khufukiilila khukhwitsuba ukhwo, ni nashiryo s'aliyila umweene washo ta.

¹²Ne nga beebile shishaayo nga abe shili mu makhono keewe, ali ni khuuliyila umweene washo.

¹³Tsisolo tse mwirome ni tsibwakala shishaayo isho tsaashilya, ali ni khuureera bujulisi, nio alekhe khuliyila umweene we shishaayo ta.

¹⁴“Umuundu n'atsya wo washe waaloomba shishaayo ne shaafuna buwaangafu namwe shaafwa nga shili mu makhono keewe, ali ni khuuliyila umweene uwasho mu bwitsufu.

¹⁵Ne shishiindu ni shikholikha khu shaayo isho nga umweene uwasho aliwo, uyo ushiloombile s'amuliyila ta. Ni iba bari abe shishaayo shino baashipaangisile khuuraamba, kamapeesa abe keesi uyo aweeleyo, kaba kamala khuuliha.

¹⁶“Umusaani siinga awooya umukhaana isi bashiili khuselela ta, wetubaasa ni naye, ali ni khuuwaanayo bye khuukhwa, umukhaana uyo ekyele umukhasi weewe.

¹⁷Ne paapawe w'omukhaana uyo n'aloba khuuwa umusaani uyo umukhaana weewe, umusaani uyo ali ni khuuwaanayo bye khuukhwa isi bawaanayo khulw'omukhaana uuli indungubaasi.

¹⁸“Umuundu yeesi uuli umulosi ali ni khukhwiiribwa.

¹⁹“Umuundu yeesi uwaamba shisolo waakona nasho nga umuseetsa namwe umukhasi weewe, ali ni khukhwiiribwa.

²⁰ Umuundu uwaanayo biwaanwa isi ba wele babaandi, waalekha khuwaanayo isi Umukasya ta, uyo ali ni khukhwiiribwa.

²¹ “Mbaawo khuubirisa buubi namwe khuumiinilisa umwiitswa ta. Khebulila muri nanywe mwabeene mwaba babeetswa mu Misiri.

²²“Banamulekhwa ni baafuubi mukhababirisa buubi ta.

²³Ni mubabirisa buubi, ne baandilila ise nga bakana buyeeti, kane imbatimiilile imbayeete.

²⁴Lirima lyase kane libe liikali naabi, ni nase kane niire basaani musiinywe, nio akile bakhasi baabwe nabo bekyele banamulekhwa, ni babaana baabwe bekyele baafuubi.

²⁵ “Nga wekopisile mutweela khu baandu baase uuli umutaambi kamapeesa, ukhamuloma khuukhukoboselakho ni kamafuurisa ta.

²⁶ Umuundu nga waakhuweele shikwaaro sheewe khuuwaambilila ari nio umwikopese kamapeesa, uli ni khuushimwiisilayo nga antsye bushiili khukhwilabula ta.

²⁷Khulwekhuuba isho nisho sheesi ebiimba mu shilo. Ne busa aba kane ebiimbe shiina? Nga umuundu uyo waalilile isi ise ndi, kane ise imwiilemo, khulwekhuuba indi uwe shiisa.

²⁸ “Mbaawo khuukanikhatsaka buubi khu Wele, namwe khuutsuba abo babaali baawuli boowo ta.

²⁹“Muli ni khuuyubakho khukhuumba ise biwaanwa bibyaama mu likyesa lyeenywe ni bibyaama mu vini yeenywe. “Umwaana umukiboole uwesiinde muli ni khuumuwaanayo isi ise.

³⁰Mwaakha mukhole shishiindu sheene nisho shitweela khu byaayo byeenywe ni kamasheese keenywe, khuuwaanayo bikiboole isi ise. Ne muli ni khuubilekha khuumala biifukhu musaafu nga bili ni maawaabwe, nio khu shifukhu she shinaane mubiwaaneyo isi ise, Wele weenywe.

³¹ “Muli ni khuuba babaandu baase baarobore, babaali bakhosefu isi ndi. Ni nashiryo mukhalya inyama iye shishaayo sheesi isolo iye mwirome yirire busa ta, muli ni khuukiwa tsiimbwa tsikilye.”