Read lumasaaba She Lukyeendo 23 Bible Online

She Lukyeendo 23 - lumasaaba bible

She Lukyeendo 23

¹ “Ukhakanikhatsaka bubeeyi khu baandu babaandi ta. Ukhawaanayo bujulisi bwe bubeeyi nga ulikho ukana ubisebise uyo uuli ni kumusaango ta.

²Ukhaloondelelatsaka busa sheesi babaandu babaandi, abe baakhaba baakali baryeena sheesi baloma, nga uwayo bujulisi mu musaango ta. Uli ni khuukanikha bya ŋali.

³Nga uwayo bujulisi, ukhaba khu luwaande lw'omutaambi bari khulwekhuuba ali umutaambi ta.

⁴ “Nga waanyoolile shishaayo sh'omusiku woowo shaakooranile, uli ni khuushimukoboselayo.

⁵N'uba nga waanyoolile isikilya y'omuundu ukhakhukana iwe ta nga bisutwa byaakisitoweele, yaakwiile aasi, ukhakibirakho busa ta. Uli ni khuumuyeeta ukinyuse.

⁶ “Umutaambi nga waayilile kumusaango kweewe mu baakayi, bali ni khuukukhala nga beemikha khu bwaŋali.

⁷Mbaawo khuutsuntsumilisa umuundu khu sheesi akhakholile ta, namwe umuundu ukhali ni kumusaango ta, nio bamukhalile kwe khuufwa. Khulwekhuuba ise singene niyakhile umuundu ukhola aryo ta.

⁸“Mbaawo khuufukiilila khuulya iwoongo ta. Khulwekhuuba iwoongo ibofwaasa tsimoni tsaabo babaakhola kwe bukayi, naluundi yaaboraanisa bwaŋali.

⁹ “Mbaawo khuubirisa umwiitswa buubi ta. Inywe mwabeene mwaba babeetswa i Misiri, mwaamanya buulamu bw'omwiitswa nga ni buli.

¹⁰ “Mu buli kumukuunda, muli ni khuubyaalamwo naluundi mukyesemo biilyo khuumala kimiiko kisesaba.

¹¹Ne mu mwiiko kwe kumusaafu, muli ni khuulekha kumukuunda ukwo kube busa, kuwolekho. Shino kane shinyalise bataambi nabo khuulya mu liswa ilyo. Ni byeesi baba nga baalekhilemo, bisolo nabyo bilye khu byeene ibyo. Muli ni khuukhola muryo mu mikuunda kyeesi mulimamo kimizabibu ni kamatuunda kakaandi.

¹² “Muli ni khuukhola kimilimo khuumala biifukhu bisesaba, ne khu shifukhu she kumusaafu muli ni khuuwola. Ikhaba iyeeyi yoowo ni isikilya yoowo, bili ni khuuwola. Ikhaba baakulwa boowo, ni babeetswa babaamenya muungo mwoowo, bali ni khuuwola.

¹³Bonela ilala muri muli ni khuuloondelela byeesi ise inomile. Mukhesaayakho ba wele babaandi namwe mwaakanikhakho khu masina kaabwe ta.

¹⁴“Buli kumwiiko muli ni khuukhola kamayiiya kimiluundi kitaru, nga mukhebulila ise.

¹⁵ “Muli ni khuulya kamayiiya ke kumukaati kukukhalimo kamamela ta, nga ise ni nabalakila inywe. Khu mbuka niyo inyene mu mweesi kwa Abibu, muli ni khuulya kimikaati kino khuumala biifukhu musaafu. Khulwekhuuba mu mweesi kweene ukwo nimwo mweesi inywe mwarurira mu Misiri. Buli mutweela ali ni khuukhundeerera ise shiwaanwa shishintsakhila ise.

¹⁶ “Muli ni khuulya kamayiiya ke Likyesa.[6] Kano kali ni khuuba nga murakikha likyesa ly'ebyo byeesi mwamiitsa. Naluundi muli ni khuulya kamayiiya ke khuubusaasa nga kumwiiko kuwakho, isi mubuusaasila biilimwa khukhwaama mu mikuunda kyeenywe.

¹⁷Buli mwiiko basaani bali ni khukhwiitsa khu mayiiya kano khukhuuntsisaaya ise.

¹⁸“Nga mwaakholeele ise isaayilo iye shishaayo, mukhakireera nga mwaatubaasilekho kimikaati kikiilimo kamamela ta. Naluundi muli ni khuushibona muri kiminaawa kye shishaayo kili ni khukhwookhebwa khu shifukhu sheene isho.

¹⁹ “Buli mwiiko, muli ni khuubukula bibyaamo bifuura buulayi bibinyoowa, mubireere mu ntsu y'Omukasya, Wele weenywe. “Mukhawaambatsaka inyama iy'emeeme mwaakiteekhela mu mabeele ka maawe wayo ta.

²⁰“Ari bona, ise ndikho indumana malayika khuutsya iburaangisi weenywe. Niye anabatseeta inywe khu ntsila yeenywe, naluundi abayile aboolise mu shifwo sheesi ise namala khaale khuubarengarengekhela inywe.

²¹Byeesi aloma muli ni khuubirekeeresa, naluundi mubitsiilekho. Mukhamuminyaalila ta, khulwekhuuba nimukhola muryo, singene amwiyakhile ta. Malayika yuno aliwo mu lisiina lyase.

²²Nga inywe mwaarekeeresile naluundi nga mwaakholile ibyo byoosi byeesi niye abalomela inywe, kane ise isoolanise baasiku beenywe ni kamaani kamakali naabi.

²³“Malayika wase kane abaraangilile inywe aboolise khu liloba lye ba Amori, ba Hiti, ni ba Perizi, ni ba Kanani, ni ba Hivi ni ba Yebusi, nio ise imbahese boosi imbamalewo.

²⁴Ne nga malayika waaboolisile ibweene iyo, inywe mukhesaaya ba wele baabwe, namwe mwaabakaanisa biwaanwa ta, namwe mwaatsiila khu bikholwa byaabwe ta. Ne akhali inywe muli ni khukhwoonakisa ba wele abo, nga mukhupaka bisiindi byaabwe mubaminiangulake.

²⁵“Muli ni khukhuuntsisaaya ise senyene, uuli Umukasya Wele weenywe. Kane imbawe tsikhabi tsye khuuba ni kameetsi kamakali ni khuuba ni biilyo biikali. Naluundi kane ise imbarusekho inywe tsindwaale tsoositsana.

²⁶Mbaawo umukhasi ulituumisa she muunda ta, namwe uliba umukuumba mwinywe ta. Buli mutweela alimenya khukhwoolisa n'ahangaalila ilala mu miiko kye buukhulu.

²⁷“Ise ikhaakhole kamanaambo ako kabe ni khuurya khuukali. Naluundi abo boosi babaabasoolanisa inywe, kane imbakosasekosase imbamalemo kamakesi, baryo baasiku beenywe boosi batime babelukhe.

²⁸Ise ikhaasiindikhe luufu luubi naabi lutsye lwoonakise ba Hivi, ba Kanani, ba Hiti, nga inywe mushiili khukhwoolayo ta.

²⁹Ise singene indimise babaandu bano mu mwiiko kukuunyoowa nga inywe mwinjila khu liloba lino ta, khulwekhuuba liiswa kane lisiimbe ni tsisolo tsimalatane mwoosi.

³⁰Kane ise ndimise baasiku beenywe mbola mbola nga inywe mubona, khukwoolisa ni musaalana muwaambe liloba ilyo yoosi.

³¹“Lulwaakha lweenywe lulirakikhila khu Inyaantsa Imbesemu khukhwoola khu luutsi Efurati, naluundi khukhwaamila khu nyaantsa Meditereniani, khukhwoola khu mubiimbi. Ise ikhaabawe inywe kamaani ke khuuwula babaandu babaamenyamo, muryo mubatimise barure khu liloba ilyo.

³²Inywe mukhakholatsakakho indakaano ni nabo, namwe ni ba wele baabwe ta.

³³Mukhabalekha baamenya khu liloba lyeenywe ta, khulwekhuuba banyala baakila inywe mwoonaka isi ise. Ni mubalekha baabamenyamo, kane babaakhonjelese inywe mwisaaye ba wele baabwe.”