Read lumasaaba She Lukyeendo 24 Bible Online

She Lukyeendo 24 - lumasaaba bible

She Lukyeendo 24

¹Umukasya waalomela Musa ari, “Niina lukiingi wiitse ano. Yiitsa ni Aroni, ni basooleli beewe babili, Nadabu ni Abihu, atweela ni baaraangilisi ba Isiraeli kamakhumi musaafu. Ne nibo bali ni khukhuuntsisaayila aleeyikho.

²Ne iwe uli ni khukhwisyeenda aambi ano. Babaandu babaaramire bakhesyeenda aambi ta.”

³Musa waaboolela babaandu bilomo byoosi ni biilakilo by'Omukasya. Kila babaandu beelamo nga baloma bari, “Ifwe kane khukhole ibyo byoosi byeesi Umukasya alomile.”

⁴Lwanyuma Musa waarona bilomo ibyo by'Omukasya byoosi. Ni bwasha kumutikhinyi khu shifukhu shisheelakho, Musa wenyukha nga ashiili amali, wombakha shisheeso mwisina mwe lukiingi, nga araambisa kamabaale likhumi na kabili, khuuloondekhana ni bikuuka bya Isiraeli, likhumi na bibili.

⁵Kila arumana basaani babashiili bahele khuutsya khuwaanayo tsisaayilo tsye bibyooshe ni khuuwaanayo tsisaayilo tsye tsiwuunwa, nga nibyo biwaanwa bibireera lukoosi.

⁶Musa waakhalakho shisiintsa she kamalasile waakara mu bipwakhuli, ne shisiintsa shisharama waakatsukha khu sheeso.

⁷Lwanyuma Musa waabukula shitabu shishiilimo Indakaano y'Omukasya, waashisoma ni likono lye angaaki, nga babaandu boosi baarekeeresile. Kila babaandu beelamo bari, “Ifwe kane khukhole ibyo byoosi byeesi Umukasya alomile, naluundi singene khumuminyaalile ta!”

⁸Kila Musa abukula kamafuki kakaaba khu bipwakhuli waakasalaasaka khu baandu, nga aloma ari, “Kamafuki kano kali niko ke Ndakaano isi Umukasya amalile khuukhola ni nanywe, khuuloondekhana ni bilomo bino.”

⁹Nio lwanyuma Musa ni Aroni, ni Nadabu, ni Abihu, atweela ni baaraangilisi kamakhumi musaafu, baaniina khu lukiingi,

¹⁰baabona Wele we ba Isiraeli. Baabona aasi e bikyele byeewe nga aliwo shishiindu shishabonekha nga libaale safaya, lilyaba libonekha nga likulu.

¹¹Ikhaba nga babaandu bano khukhwaama mu Isiraeli baabona khu Wele, ne s'abawa shitaambiso ta. Baryo lwanyuma baalya naluundi baanywa.

¹²Umukasya waalomela Musa ari, “Niina wiitse khu lukiingi, uliindilekho ano, kane ikhuwe iwe kamabaale kabili khweesi ise imalile khaale khuurona kamakaambila, keesi babaandu baase bali ni khuuloondelela.”

¹³Aryo Musa n'umuyeeti weewe Yoswa nga baamalile khukhwirekekha buulayi, Musa waaniina khu lukiingi khukhwakaanana ni Wele.

¹⁴Abe Musa waamalile khaale khuuboolela baaraangilisi ari, “Inywe muli ni khuurama ano, khukhwoolisa ifwe ni khukobola. Aroni ni Huru banarama ni nanywe, nashiryo uyo yeesi ukana khuwaaba kumusaango ali ni khuubatsyayo.”

¹⁵Kila Musa aniina khu lukiingi, nio lwanyuma kamafuumbi kaafuusilisa lukiingi tsana.

¹⁶Shiriifwa sh'Omukasya sheekha khukhwaama mu ngaaki shekhala khu lukiingi Sinaayi. Kamafuumbi kaabiimbilila lukiingi ulwo khuumala biifukhu bisesaba, nio khu shifukhu she kumusaafu Umukasya waalaanga Musa ari atsye mu mafuumbi.

¹⁷Shiriifwa sh'Omukasya ni sheekha khu lukiingi, babaandu shaabafwaananila busa nga kumulilo kukuuli khuutindiima.

¹⁸Musa waaniina khu lukiingi nga luli mu mafuumbi, nga Umukasya n'amulomela. Musa waamala khu lukiingi biifukhu kamakhumi kane ni biilo nabyo kamakhumi kane.