Read lumasaaba She Lukyeendo 25 Bible Online

She Lukyeendo 25 - lumasaaba bible

She Lukyeendo 25

¹Umukasya waalomela Musa ari,

²“Boolela ba Isiraeli uri bandeerere biwaanwa. Umuundu yeesi ukane awaaneyo shiwaanwa, kane ashikhuwe iwe mu lisiina lyase.

³Biwaanwa byeesi uli ni khukhwakaanila nibyo bino: Izaabu, ifeetsa, ni buroonzi,

⁴ni buwutsi bweesi bakholamo bikwaaro nga buli bwe raangi imbuusi, ni buubesemu, ni noobwo bweesi bakholamo bikwaaro bibyareremukha busa, ni bubwooya bwe tsimbusi.

⁵Bali ni khuukhuwa bisyeelo bye kamamiiku byeesi bamalile khuuhala, ni bisyeelo bye tsimbusi, atweela ni tsimbaawo khukhwaama khu kuusaala ku akasiya.

⁶Kamafura ke khuutsukha mu taala, ni bye khukhwihakha bibiwunya buulayi bye khuutubaasa mu mafura ke khuubita basaayi,

⁷kamabaale kamamiliwu kakaalaangibwa kari onikisi, ke khuura khu bikwaaro Efodi[7] bye basaayi naluundi khuutseeta shifuba.

⁸Naluundi ise ingana bantsombakhile ise shiifwo shikhosefu, nio ise niitse khuumenya ni babaandu baase.

⁹Shifwo shikhosefu shino muli ni khuushoombakha khuuloondekhana ni isaambo isi samweene kane ikhwookesanise.”

¹⁰“Baboolele uri ni boombakhe Isanduuku nga baraambisa kuusaala ku akasiya, iyoola buuleeyi tsi sentimita shitoondo shitweela ni likhumi (110), buubalaayi tsi sentimita kamakhumi kasesaba na tsisesaba, ni khuuniina mu ngaaki tsi sentimita kasesaba na tsisesaba.

¹¹Mukari ni khu ngaaki muli ni khuukimaalamo ni zaabu, ni khu shifunikho nakhwo muli ni khuurakho izaabu.

¹²Mukhole tsipore tsye izaabu tsine, mure aasi a buli isoonda iye sanduuku.

¹³Khootsa bisaala bine bye kuusaala ku akasiya, mubimaalekho n'izaabu,

¹⁴mubibirisile mu pore tsine itsyo, nio munyalise khuusutilakho isanduuku tsana.

¹⁵Bisaala ibyo bili ni khuurama mu pore itsyo, mukhabirusaakamo ta.

¹⁶Nga ise naamalile khuukhuwa iwe Kamakaambila likhumi kakaaronebwele khu mabaale kabili, uli ni khuukara mu sanduuku nyene iyo.

¹⁷Muli ni khuumaala shifunikho she sanduuku iyo n'izaabu.

¹⁸Ubukule izaabu ukholemo bakeruubi babili.

¹⁹Kerubi mutweela abe khu lubeka lutweela, ukuundi naye abe khu lubeka lwe sanduuku luluundi.

²⁰Bakerubi bano mubabuumba nga baabambuule tsindaha tsaabwe, baabiimbile Isanduuku, naluundi bali ni khuulolelelana.

²¹Uli ni khuura kamabaale kakaalikho Kamakaambila likhumi mukari mwe saanduuku, nio khu ngaaki khwayo ubiimbekho shifunikho she zaabu.

²²Ise ikhaakhwakaananile iwe abweene awo, khu ngaaki khwe saanduuku akari e bakerubi. Abweene awo ise ikhaakhuboolele iwe kamakaambila keesi uli ni khuuwa babaandu baase ba Isiraeli.

²³“Muli ni khuukhola imeetsa mu kuusaala ku akasiya, iyoola buuleeyi tsi sentimita kamakhumi shinaane na shinaane, kamakhumi kane na tsine buubalaayi, ni kamakhumi kasesaba na tsisesaba khuuniina mu ngaaki.

²⁴Isanduuku yoosi kimaale ni zaabu, naluundi ni khu ndulo mukibuumbilekho izaabu.

²⁵Muli ni khuukikholela ifuremu iyoola nga shikalabo buubalaayi mukibotokhelese, ni khu bweene ukhwo muli ni khuurakho izaabu.

²⁶Mukhole tsipore tsine tsye zaabu, mutsibowe khu bikele byayo bine nga buli shikele shilikho ipore indweela.

²⁷Tsipore tsino tsili ni khuuba aambi n'ifuremu, nio babaasuta babirisilemo bisaala bibiisuta.

²⁸Imeetsa bali ni khuukisutila khu bisaala byeesi mubeetsa mu kuusaala ku akasiya, ne nga mwaamalile khuubimaala n'izaabu.

²⁹Bipwakhuli ni bibuumba byoosi bibireebwa khu meetsa yino nga bili bye khuutsukhamo biwaanwa bye viini, bili ni khuuba nga byaakholebwa mu zaabu yenyene.

³⁰Imeetsa yino ili ni khuubiikhibwa mu shifwo shikhosefu, naluundi busheele muli ni khuurakho kimikaati kimikhosefu.

³¹“Aamba izaabu yonyene busa ukholemo shisiindi she taala. Ibikele sheesi yikhalakho ni kumukhoondi kwayo, bili ni khuubuumbibwa busa, ikhaba bupwakhuli bubuubakho, ni byeesi baraambisa khuukimiliisa, byoosi bali ni khuubibuumbila khu bweene.

³²Ili ni khuubakho tsisakya tsisesaba, nga buli lubeka luli ni khuubakho tsisakya tsitaru.

³³Buli lutweela khu sakya tsiseba tsino, luli ni khuubakho bimuli, nga bili bibalaayi shangaaki, ne binyelele ibikele.

³⁴Khu shisiindi khubweene khuli ni khuubakho bipwakhuli bine, nga khulikho ni bimuli byakhwo.

³⁵Buli mu shifwo mweesi lusakya lwaamila khu shisiindi, ili ni khuubawo shiimuli.

³⁶Shisiindi she taala shino, ni tsisakya kyasho ni bimuli bibiibakho byoosi, bili ni khuukholebwa khukhwaama mu zaabu yonyene busa.

³⁷Itaala inyoowa iba khu ngaaki, ni bwaakamilo wa buli lusakya ibeyo tsitaala tsisesaba, nga tsabuumbibwa khuuba tsimulikha khuulola ibweeni we shisiindi she taala.

³⁸Biibano bibisoongola tsitaala tsino ni lulweelo khweesi bara byeesi basongola khu taala, bili ni khuubuumbibwa khukhwaama mu zaabu.

³⁹Itaala yino ni bibitsiilakho byoosi bili ni khuumalawo buukali bwa zaabu bubwoola tsikilo kataru na tsine.

⁴⁰Bino byoosi bili ni khuukholekha khuuloondekhana ni n'eyo isi nakhwookesa nga uli khu lukiingi.”