Read lumasaaba She Lukyeendo 26 Bible Online

She Lukyeendo 26 - lumasaaba bible

She Lukyeendo 26

¹“Ikhola ye lisari likhosefu yino muli ni khuukikhola khukhwaama mu bisiintsa likhumi bye ngubo imiliwu naabi. Bisiintsa bino muli ni khuubinaba mu buwutsi bwe raangi imbuusi, ni inandaafu, ni imbesemu. Muli ni khuubinaba byookesanise bifwaani bye bibuumbe bibiili ni tsindaha.

²Buli shisiintsa she ngubo iyo shili ni khuuba buuleeyi bubwoola tsimita likhumi na tsibili, ni buubalaayi tsimita tsibili. Bisiintsa byoosi bili ni khuuba nga bilekhaana.

³Munabamo tsingubo tsibili, nga buli ngubo bawaambilisilemo bisiintsa biraano.

⁴Khu luwaande luleeyi lwa buli ngubo, nabilakho ingubo iye raangi imbuusi nga yaafuumbibwilemo. Ari uraambise buubya kamakhumi karaano nga bwe zaabu khuubowa tsingubo tsyoombi atweela.

⁷Kane uwaambe bubwooya bwe tsimbusi unabemo shishibiimba khu weema. Uli ni khuunaba bisiintsa bibilekhaana likhumi na shitweela.

⁸Buli indweela ili ni khuuba ni buuleeyi bubwoola tsimita likhumi na tsitaru, ni buubalaayi tsimita tsibili.

⁹Bisiintsa biraano binabile atweela byaamemo luwaande lutweela, ni bibiramire bisesaba nabyo ubinabila atweela byaamemo luwaande lwe khaabili. Shisiintsa shishikhola khasesaba, shifuumbemo khabili shibiimbe ibweeni we liweema.

¹⁰Khu luwaande luleeyi lwa buli ingubo, nabilakho ingubo nga yafuumbiwilemo.

¹¹Ari uraambise buubya kamakhumi karaano nga bwe zaabu khubowa tsingubo tsyoombi atweela.

¹²Shisiintsa shikane shiramekho she ngubo ibiimba khu Lisari Likhosefu iyo, shili ni khuurama nga shisungwaatsa busa imukoongo we Lisari Likhosefu.

¹³Bisiintsa bino bili ni khusungwaatsa khu buli lubeka lwe Lisari Likhosefu.

¹⁴“Kholayo bye khuubiimbakho bibiindi bibili, shitweela nga shaama mu mahafu ke kamasheese, shishiindi nga shaama mu mahafu ke tsimbusi.

¹⁵“Kamatikiiyi kakaakhiisa Lisari Likhosefu lino, uli ni khuukombekhela kuusaala ku akasiya.

¹⁶Liitikiiyi lili ni khuuba tsifuuti likhumi na tsiraano khuuniina mu ngaaki, ne buubalaayi tsifuuti kabili na musaafu.

¹⁷Buli luwaande lwe litikiiyi luli ni khuubakho bitsaangi bibili ibikele.

¹⁸Muli ni khuukhola tsimbaawo kamakhumi kabili khuuba khu luwaande lw'ebikele.

¹⁹Aasi bili ni khukhwikhala mu malowo kamakhumi kane bye feetsa, kamalowo kano kali ni khuuba aasi a buli lubaawo, nio musobekhemo bubwooki bubili.

²⁰Khu luwaande lw'emurwe nayo ili ni khuubayo tsimbaawo itsyo kamakhumi kabili,

²¹nga tsili ni kamalowo ka feetsa kamakhumi kane mweesi tsiikhala.

²²Khu luwaande lw'ebukwanyaanga ili ni khuubayo tsimbaawo tsisesaba.

²³Ili ni khuubayo tsimbaawo tsibili mu soonda.

²⁴Ibikele buli ibira ili ni khuuba khubwayo, ne nga tsoolile imurwe, mutsitubaase atweela nga muraambisa ipure, nio akile kwikyele kutweela. Shino shikile ibewo tsikoona tsibili.

²⁵Ili ni khuubawo tsimbaawo shinaane ni kamalowo kaakhwo likhumi ni kasesaba k'efeetsa, nga kali ni khuuba kabili aasi a buli lubaawo.

²⁶“Muli ni khuukhola kimikhiikha likhumi na kiraano nga kye kuusaala ku akasiya, kiraano nga kili ingaaki we Isanduuku,

²⁷kiraano nga kili khu lubeka lw'ebikele. Kikiindi kiraano kili ni khuuba imukoongo wayo, nga shino shilola ibukwanyaanga,

²⁸kukuukhiikha kwe akari, nga kuli akari e tsimbaawo tsisimikha, kuli ni khuubiramo kutuume iyi ni n'eyi.

²⁹Khu ngaaki khwe tsimbaawo tsino muli ni khuubiimbakho izaabu, naluundi mukhole tsipore tsye zaabu, khuubowa atweela tsitsiitsya bukhiikha. Ikhaba tsitsiitsya bukhiikha tsili ni khuubiimbibwakho izaabu.

³⁰Uli ni khukhwiimisa i sanduuku yino musaambo isi baakhwookesamo nga uli khu lukiingi.

³¹“Mulikhola ingubo imiliyu naabi nga ilimo iraangi imbuusi n'inandaafu ni buubesemu, nga baanabiilekho bakeruubi.

³²Nga mwaamalile khuukirakho buulobo bwe zaabu bubukiwanikha, iyino muli ni khuukihanikha khu bisiindi bine bya akasiya nga baabireerekho izaabu. Muli ni khuukisimikha mu malowo k'efeetsa.

³³Nga mwaamalile khuuhanikha ingubo iye mukari, bukula isanduuku mure inyuma wayo, ikikhiisye. Iyino kane irewo lulwaakha lwe shifwo shikhosefu ni n'esho shishifuurisa bukhosefu.

³⁴Lwanyuma ubukule shishibiimba khu sanduuku ushire khu ngaaki khwayo, mukari mwe shiifwo shishiminyisa bukhosefu.

³⁵Ibulafu we ngubo yino, rawo imeetsa. Imwaalo we sanduuku rayo shisiindi sh'etaala, nga shaloleleele imeetsa. Imeetsa ili ni khuuloleelela ingaaki.

³⁶“Muli ni khuukhola ingubo ikiindi iyarukhibwa mu bumiliyu naabi, nga ilimo iraangi imbuusi, inandaafu n'imbesemu, nga yino bakikhola busa ni kamakhono, mukire mulyaango mwe weema.

³⁷Bibisuunga ingubo yino bili ni khuuba nga by'ezaabu nga yemisibwile khu bisiindi biraano bye kuusaala ku akasiya byeesi babiimbilekho izaabu. Bisiindi bino bili ni khukhwiimisibwa mu bibya biraano.”