Read lumasaaba She Lukyeendo 29 Bible Online

She Lukyeendo 29 - lumasaaba bible

She Lukyeendo 29

¹Ari mu khwaawula basaayi, nio banyalise khukhuuntsakaanisa ise nga bali basaayi, uli ni khuukhola bibiindu bino: Bukula imoosi iwuunwa ni kamamiiku kabili, biilamu buulayi nga sibilikho ilomo yoosi ta.

²Ubukule kumukaati kukukhalimo kamamela ta, ubukule bukeeki bubukhalimo kamamela ta, ne nga baatubaasilemo kamafura ke tsinyanyi, ni kamahaandu keesi batubaasilemo kamafura ke tsinyanyi. Bino byoosi bili ni khuuba bye buufu bwe ŋaano buulayi naabi.

³Aamba kimikaati ikyo kyoosi ukire mu shikono, ukireere nga mutsya khuwaanayo isaayilo iye tsimoosi tsiwuunwa tsibili ni kamamiiku kabili.

⁴Reera Aroni ni babaana beewe imulyaango kwe Tabenakulo, ubasiinge ni kameetsi.

⁵Lwanyuma ubukule bikwaaro ukwaarise Aroni. Mukwaarise ikaantsu, she khu ngaaki, shishiiba khu ye khu ngaaki, atweela ni kumusipi.

⁶Bukula ingubo iye khuura khu murwe ilikho isowaani, umure khu murwe khweewe.

⁷Bukula kamafura ke khuubita, umutsukhe khu murwe umubiite.

⁸Lwanyuma ureere babaana beewe, nabo ubakwaarise mu bikwaaro byaabwe.

⁹Bali ni khukhwibowa kimisipi naluundi bakwaare bye khu mirwe. Kane bekyele basaayi khuumala biilo ni biilo. Nashiryo iyino niyo isaambo isi uli ni khuubita Aroni ni babaana beewe.

¹⁰Nio lwanyuma ureere imoosi iwuunwa i mulyaango kwe Tabenakulo. Aroni ni babaana beewe bali ni khuura kamakhono kaabwe khu murwe kwayo.

¹¹Abweene awo uli ni khuutsikhoonyela mu moni tsy'Omukasya, amulyaango kwe Tabenakulo.

¹²Raambisa lulwaala lwoowo, ubukule khu malasile ako, uwakhe khu ntsika tsye khu sheeso, ne kakaaramire ukatsukhe mwisina mwe shisheeso.

¹³Ubukule kiminaawa kye khu mala, ni luwaande luleeyi lwe shiini, ni tsimbiko tsoombi atweela ni kiminaawa kyakhwo, ubyookhele khu sheeso.

¹⁴Ne inyama iramire yoosi, atweela ni lihaafu, ni kamasisye, ubiyile ubyookhele ibulafu we kaambi, nga isaayilo irusawo bibyoonako.

¹⁵Lwanyuma ureere litweela khu mamiiku ako. Nga balikho balikhoonya, Aroni ni babaana beewe bare kamakhono kaabwe khu murwe khwalyo.

¹⁶Utaatilise kamalasile kaalyo, ukasalaase khu ndulo khwe shisheeso.

¹⁷Lwanyuma utanyakemo inyama iyo, usiinge bye muunda ni bileenge, ubire atweela ni kumurwe ni bisiintsa bibiramire.

¹⁸Byoosi atweela ubyookhele khu sheeso. Shino shili isaayilo isi Umukasya, naluundi isilikakha yayo yikhoyesa Umukasya.

¹⁹Ureere limiiku liliramire. Nga balikho balikhoonya, Aroni ni babaana beewe bare kamakhono kaabwe khu murwe kwalyo.

²⁰Bukulakho kamalasile uwakhe khu khuru khwa Aroni khu seetsa, ni khwe babaana beewe nakhwo uryo. Naluundi ubawakhe buli mutweela khu lwaala lukhuumwa lwe kumukhono ni lwe shikele, lwe luwaande luseetsa. Kamalasile kakaaramire kasalaase khu ndulo khwe shisheeso.

²¹Lwanyuma ubukule khu malasile kakaali khu sheeso, utubaasemo kamafura ke khuubita, ukasalaase khu Aroni ni bikwaaro byeewe ni babaana beewe, ni bikwaaro byaabwe. Shino kane shibakhole nibo khuuba baakhosefu ni bikwaaro byaabwe khuuba bikhosefu.

²²“Khukhwaama lino ni lili limiiku lye khukhwaawula Aroni ni babaana beewe, bukula kiminaawa kyalyo, ni kye lisyeembe, ni kye khu mala, ni luwaande luuleeyi lwe shiini, ni tsimbiko tsoombi, ni kiminaawa kyakhwo, ni shinama sh'etakho she luwaande luseetsa,

²³atweela ni kumukaati mutweela, ni kha keeki atweela ni kamafura kakaateekha, atweela ni lihaandu, khukhwaama mu shikono shishiili ibweeni w'Omukasya.

²⁴Bibiindu bino byoosi uli ni khuubira mu makhono ka Aroni ni ke babaana beewe, babisute angaaki nga shiwaanwa sha buraawa isi Umukasya.

²⁵Lwanyuma ubarusekho bibiindu byatsana, ubyookhele khu sheeso, atweela ni shiwaanwa sheesi umalile khukhwoosha, biweyo isilikakha indayi isi Umukasya, bimwikhoyese.

²⁶“Ubukule inyama iye shifuba iye limiiku lye khukhwaawulibwa khwa Aroni, ukisute angaaki mu moni tsy'Omukasya. Lwanyuma iwe uyile inyama iyo.

²⁷Tsinyama tsikhosefu tseesi uraambisire mu khwaawula Aroni ni babaana beewe, uli ni khuutsiira buraawa. Nga nitsyo: Inyama iye shiifuba ni shinama sh'omusaayi, byeesi basutile angaaki isi Umukasya mu mukholo kwe khukhwaawula.

²⁸Ikhaba nyaanga, nga ba Isiraeli bawaanayo isi Umukasya biwaanwa bibireera lukoosi namwe bye khusiima, Aroni ni babaana beewe bali ni khuufunatsaka bisiintsa bino.

²⁹“Bikwaaro bikhosefu byeesi Aroni araambisa ibyo, bili ni khuubiikhibwa buulayi, nio nyaanga lisaaye lyeewe lilimwiilila mu bikele nalyo libiraambise, nga baawulibwa naluundi nga baroborebwa.

³⁰Uyo yeesi ukheele mu bikyele bya Aroni nga umusaayi ali ni khuukwaara bikwaaro ibyo khuumala biifukhu musaafu, nio lwanyuma eetse mu Tabenakulo khukhwakaanisa mu shifwo shikhosefu.

³¹“Bukula inyama iye limiiku liliraambisibwile mu mukholo kwe khukhwaawula, ukiteekhele mu shifwo shikhosefu.

³²Aroni atweela ni basooleli beewe bali ni khuulya inyama iyo, nga bakiliilakho kimikaati kikiili mu shikono. Bali ni khuukiliila mulyaango kwe Tabenakulo.

³³Nibo bonyene babaali ni khuulya khu nyama ni kimikaati byeesi baraambisile mu khurusawo bibyoonako, mu mukholo kwe khukhwaawula ni khuurobora. Babaandu ba busheele busa bakhalyakho ta, khulwekhuuba bibiindu bino bili bikhosefu.

³⁴Noola inyama yoosi namwe kumukaati kwe khu mukholo kwe khukhwaawula kwaakonilewo khukhwoolisa shifukhu shishiilakho, ibyo uli ni khuubyoosha. Mbaawo khuubilya ta, khulwekhuuba bili bikhosefu.

³⁵“Ni nashiryo uli ni khukhwaawula Aroni ni babaana beewe musaambo isi ikhubooleele. Kumukholo kuno kuli ni khuumala biifukhu musaafu.

³⁶Buli shifukhu uli ni khuusala imoosi iwuunwa nga shiwaanwa she khuurusawo bibyoonako. Lwanyuma uli ni khuusala shishaayo she khuurusawo bibyoonako, she khuuwosa shisheeso, shiikele shikhosefu nga ushiwakha kamafura.

³⁷Uli ni khuuwayo shiwaanwa she khuuwosa shisheeso shino buli shifukhu, khuumala biifukhu musaafu. Buli shishitiila khu sheeso isho, kane shikyele shikhosefu.

³⁸“Byeesi uli ni khuuwaanayo khu sheeso nibyo bino: Buli shifukhu uwaanayo tsimeeme tsye lisheese tsitsoolisa kumwiiko mutweela tsibili.

³⁹Indweela uli ni khuukiwaanayo kumutikhinyi, ikiindi angoloobe.

⁴⁰Inyoowa ili ni khuutsiilakho khasiintsa khe buufu buunose bubweene, nga baafukiilemo ni kamafura ke tsinyanyi, n'iviini ili ni khuutsukhibwa aasi nga shiwaanwa.

⁴¹Imeeme iramire uli ni khuukiwaanayo angoloobe, nga khulikho ni buufu, n'iviini nga kumutikhinyi. Kane shiwaanwa she kumulilo shino shibe shishiwunya buulayi shishireera isilikakha indayi isi Umukasya.

⁴²“Shiwaanwa shishooshe shino shili ni khuukholebwa busheele khukhwaama khu muboolo mutweela khukhwoolisa khu kuundi. Muli ni khuushiwaanayo isi Umukasya, nga mushikholela imulyaango kwe Tabenakulo, isi kane ise ikhwaakananile iwe naluundi inganikhe ni nawe.

⁴³Abweene awo niwo isi ise ikhakaananile ba Isiraeli, naluundi khuubawo khwase khukhaakhole i Tabenakulo khuuba ikhosefu.

⁴⁴Ise ikhaakhole i Tabenakulo ni shisheeso khuuba bikhosefu naabi. Aroni naye ni babaana beewe ise ikhaabawe tsikhabi babe baakhosefu, nio banyalise khukhuuntsakaanisa ise nga basaayi.

⁴⁵Ise ikhaamenye mu ba Isiraeli imbe Wele waabwe.

⁴⁶Balimanya bari ise ndi Umukasya Wele waabwe, uwabarusa mu Misiri nabareera ino ndi nio imenye ni nabo. Ise niye Umukasya Wele waabwe.”