Read lumasaaba She Lukyeendo 30 Bible Online

She Lukyeendo 30 - lumasaaba bible

She Lukyeendo 30

¹“Lwanyuma uli ni khuukhola shisheeso khukhwaama mu kuusaala ku akasiya, she khukhwookhelakho bubaani.

²Shili ni khuuba nga buuleeyi ni buubalaayi bilekhaana khu sentimita kamakhumi kane na tsiraano, ne khuuniina mu ngaaki nga shoolisa tsi sentimita kamakhumi syeenda. Uli ni khuukhola tsiintsika nga tsyaayiwaamba khu bweene.

³Khu ngaaki, tsindulo ni tsiintsika tsyasho, uli ni khuubibiimbakho ni zaabu. Naluundi ukhole shibuumbe she zaabu wibotokhelese shisheeso shoosi.

⁴Aasi we shibuumbe isho, khu luwaande lululoleleele shisheeso, rakho tsipore tsy'ezaabu tsibili, nga muno mweesi bara kimisaala kye khuusuta.

⁵Kimisaala kye khusuta kino ukikhole khukhwaama mu kuusaala ku akasiya, nga khu ngaaki ubiimbakho izaabu.

⁶Shisheeso she bubaani shino uli ni khuushira ibulafu we ngubo ikhiisa Iweema, luwaande lululoleeleele shishibiimba khu Weema, ibweeni we shitsoloŋo she khuukhala kimisaango, shishiili angaaki e weema, isi ikhaakhwakaananile iwe.

⁷“Buli kumutikhinyi nga Aroni aŋoona tsitaala, ali ni khukhwookhela khu sheeso bubaani bubuwunya buulayi.

⁸Naluundi buli angoloobe nga Aroni awaambisa tsitaala, ali ni khukhwookhela bubaani mu moni tsy'Omukasya. Shino shili ni khuukholikha khuumala kimiboolo kyoosi.

⁹Ukhawaanayo bubaani bwoosi bubukhali bukhosefu, namwe biwaanwa bibyookhebwa, namwe bye bilimwa namwe bye khuunywa ta.

¹⁰Shifukhu shitweela mu buli kumwiiko, Aroni ali ni khuupyeeluusa shisheeso isho, nga ara khu ntsika khwasho kamafuki kakaamile mu shaayo sheesi baraambisire khuuwaanayo khuurusawo bibyoonako. Buli kumuboolo kuli ni khuukhola shino buli kumwiiko, khulwekhuuba shino nisho shisheeso shishiminyisayo buukhosefu isi Umukasya.”

¹¹Umukasya waalomela Musa ari,

¹²“Buli lweesi ubalila ba Isiraeli mu linaambo lyoosi, buli mutweela ali ni khuusasula isi Umukasya shishimusikula. Nio shikile ilekhe khubawo tsindwaale tsoosi tsiimbi nga ubala babaandu ta.

¹³Buli uyo yeesi isi ubala ali ni khuusasula bino: Shisiintsa she shipimo khuuloondekhana ni shiifwo shikhosefu, naluundi shisiintsa she shipimo isi Umukasya.

¹⁴Abo boosi babaabalibwa nga boolisa kye buukhulu kamakhumi kabili ni khuumiinyisakho, bali ni khuuwaanayo shiwaanwa shino isi Umukasya.

¹⁵Mu khwaakaanisa Umukasya shiwaanwa she khukhwiyakhila bibyoonako shino, umuyiinda n'umutaambi bali ni khuuwaanayo shitweela busa.

¹⁶Raambisa kamapeesa kano mu khulolelela i Tabenakulo. Shino kane shikile Umukasya ashebulile ba Isiraeli, nio anyalise khuubeyakhila inywe bibyoonako byeenywe.”

¹⁷Umukasya waalomela Musa ari,

¹⁸“Khola lukalaaya lwe khuusaabilamo nga luli lwa buroonzi, urekho ni kumukhoondi kwa buroonzi. Lure akari e Tabenakulo ni shisheeso, ulwitsusemo kameetsi.

¹⁹Aroni ni babaana beewe bali ni khuusaaba kamakhono kaabwe ni khuusiinga bikyele mubweene umwo.

²⁰Bali ni khuusaaba nga beetsa khukhwingila mu weema, namwe nga beetsa khu sheeso khuuwaanayo biwaanwa, namwe khuuwaanayo isaayilo intsoshe isi Umukasya. Bali ni khuusaaba nga bashiili khukhwakaanisa musaambo itsyo ta. Nga sibashikholile baryo ta, kane bafwe.

²¹Khuusaaba kamakhono ni bikele khuno, lili liikaambila lye biilo ni biilo mu buli kumuboolo.”

²²Lwanyuma Umukasya waalomela Musa ari,

²³“Tsya ubuuse bye khukwiihakha bibiwunya buulayi bubweene, bibyoola tsikilo tsiraano ni bisiintsa musaafu bya mira, ni bya sinamoni ni kuusaala kukuwunya buulayi, nga buli shitweela shoolisa tsikilo tsibili ni busiintsa syeenda.

²⁴Khukhwaama khu kuusaala ku akasiya, ubuse tsikilo tsiraano ni busiintsa musaafu, ni tsi lita tsitaru ni busiintsa shinaane tsye kuusaala kumusabibu.

²⁵Tubaasa bibiindu bino byoosi buulayi, waamisemo bye khukhwihakha bibiwunya buulayi, ako kabe kamafura ke khuubita.

²⁶Raambisa kameene ako khuubita i Tabenakulo n'Isanduuku iye Indakaano,

²⁷ikhaba n'imeetsa, ni shisiindi sheesi itaala yimakho, ni bipwakhuli byoosi, ni shisheeso she khukhwookhelakho bubaani.

²⁸Karaambise ni khuubita shisheeso she biwaanwa byeesi boosha ikhaba ni bipwakhuli byakhwo byoosi, ni lukalaaya atweela ni kumukhoondi kwalwo.

²⁹Uli ni khuubibiita tsikhabi nio biikele bikwalaafu, na buli shishibitiilakho nasho kane shibe shiikwalaafu.

³⁰Raambisa kamafura kano khuubita Aroni ni babaana beewe, ubaawule banyalise khuuba baakwalaafu, nio baantsakaanise ise nga basaayi.

³¹Lomela ba Isiraeli uri, ‘Khuubiita khwase khukwalaafu khuno khuli ni khuubawo mu buli kumuboolo.

³²Kamafura kano sibaakha baakatsuukhatsaka khu muundu uwa busheele busa ta, naluundi mukhakholatsakayo kakaandi kakaali nga kano ta. Kali kamakwalaafu, naluundi nanywe muli ni khuukayila muryo.

³³Uyo yeesi ukane atubaase kamafura kakaandi khuuba kakawunya buulayi nga kano, namwe waakawakha khu muundu uwe bulafu busa, bali ni khuumutuuma ibulafu we lituuli.’ ”

³⁴Umukasya waalomela Musa ari, “Busaasa bibiwunya buulayi nga nibyo onisha, galubanumu, ni bubaani buulayi naabi, nga buli shitweela shilekhaana mu bukali.

³⁵Biwe umuundu uwamanya khuutubaasa bubaani, akhole buulayi naabi naluundi bukwalaafu aremo ni kumuunyu.

³⁶Bukulakho bulala ubutsuunge bunoke naabi, ubure ibweeni we Isanduuku iye Indakaano, isi kane ise ikhwakaanane iwe, ibweeni we Tabenakulo. Buno buli ni khuuba nga nibwo bubufuurisayo mu bukwalaafu.

³⁷Ukhekholelayo wamweene bubaani bubufwaanana nga buno buri ta. Buli ni khuuraambisibwa n'Umukasya yenyene, naluundi uli ni khuubuyila nga bukwalaafu.

³⁸Uyo yeesi uwikholelayo bubaani buulayi bubuwunya buulayi nga buno buri, ali ni khuutuumibwa ibulafu we lituuli lye babaandu beewe.”