Read lumasaaba She Lukyeendo 35 Bible Online

She Lukyeendo 35 - lumasaaba bible

She Lukyeendo 35

¹Musa waabusaasa lituuli lye ba Isiraeli boosi waabalomela ari, “Bino nibyo byeesi Umukasya abalakiile ari muli ni khuukhola.

²Muli ni khuuraamba kimilimo khuumala biifukhu bisesaba, ne khu shifukhu she kumusaafu muli ni khuuba ni khuuwola khuukhosefu, khukhuuli khw'Omukasya. Umuundu yeesi ukhola buraambi khu shifukhu isho, ali ni khukhwiiribwa.

³Khu shifukhu sha Sabato, mukhabwaanakho kumulilo muungo tsyeenywe ta.”

⁴Musa weloosela waalomela lituuli ari, “Ishino nisho sheesi Umukasya alakiile.

⁵Buli mutweela n'abukule shiwaanwa ayile isi Umukasya. Uyo uuli ni kumwoyo kukuwaana, naayilile Umukasya biwaanwa bino: Izaabu, ifweesa, ni buroonzi,

⁶tsingubo tsimiliyu nga baatsirukha buulayi, nga tsilimo iraangi imbuusi, inandaafu n'imbesemu, bubwooya bwe tsimbusi,

⁷kamasyeelo ke kamasheese ni ke tsimbusi, keesi bamalile khuuhala, kimisaala kimi akasiya,

⁸kamafura ke mutaala, bibiwunya buulayi bye khuutubaasa mu mafura ke khuubiita, ni bubaani,

⁹kamabaale keesi balaanga bari onikisi, ni kamabaale kakaamiiliisa, ke khuura khu shikwaaro she khu ngaaki ni she khu shifuba.

¹⁰“Abo boosi babaamanya buubasi ni beetse bakhole byeesi Umukasya alomile ari khukhole. Nga nimwo mumuuli, i Tabenakulo,

¹¹iweema yayo ni shishibiimba khu ngaaki, bubuuma bubuwaamba tsingubo ni kimisiindi, kimikhiikha, tsifuremu, ni mweesi babisimikha.

¹²Isanduuku iye Indakaano ni bisaala bye khuukisutilakho, shitsoloŋo she khukhwiyakhila bibyoonako, n'ingubo ikhiisa mukari,

¹³imeetsa ni bisaala bye khuuraambisa khuukisuta, atweela ni bipwakhuli byakhwo; Kumukaati kwe Khuubawo khw'Omukasya,

¹⁴itaala ni bipwakhuli byayo, ni kamafura ke mutaala,

¹⁵bubaani bwe khu sheeso, ni kamafura ke khuubita ni bibiwunya buulayi, ni shishibiimba imulyaango, ni kumulyaango kwe Tabenakulo,

¹⁶shisheeso she khukhwookhelakho tsisaayilo, ni shiibya shakhwo, ni kimisaala kye khuukisutilakho ni bipwakhuli byakhwo, ni byeesi shiimikhakho,

¹⁷tsingubo tsye khuusuunga tsikhiise lulwaanyi, kimisimikha ni kyeesi kiimikhakho, n'ingubo ibiimba imulyaango we lulwaanyi,

¹⁸bitsaangi bibiwaamba i Tabenakulo ni bitsaangi bye lulwaanyi, ni kimikosi kyakhwo,

¹⁹bikwaaro byeesi barukhire buulayi bubweene bye basaayi babaakaanisa mu shifwo shikhosefu, bikwaaro bikhosefu byeesi Aroni ni babaana beewe bali ni khuukwaara, nga bakaanisa nga basaayi.”

²⁰Lwanyuma lituuli lye ba Isiraeli lyoosi lyaarura isi Musa, buli mutweela weelayo isi amenya.

²¹Abo beesi bilomo bino byawaamba khu myoyo kyaabwe, baakhola nga ni baakana, baareera isi Umukasya biwaanwa byaabwe, khuuraambisibwa mu khwoombakha i Tabenakulo, ni bibikanibwamo ni bikwaaro bikhosefu.

²²Nashiryo, basaani ni bakhasi babaali ni kimyoyo kimilayi, abo abe babeeweleyo baareera biwaanwa byaabwe bya buli saambo nga mulimo, kimidaali, bye khu maru, tsintsiyi tsye khu ntsala, bipaangiri bye khu makhono, ni bibiindu bye zaabu, nga babiwaanayo isi Umukasya.

²³Abo babaaba ni tsingubo tsimiliyu nga tsili tsy'eraangi imbuusi, namwe inandaafu, namwe imbesemu, namwe be bubwooya bwe tsimbusi, namwe kamasheelo keesi bahalile ke tsimbusi ni kamasheese, byoosi baabireera.

²⁴Babaandi baareera ifeetsa ni bibiindu bya buroonzi, baabireera nga biwaanwa isi Umukasya. Ikhaba abo babaaba ni kimisaala kimi akasiya naabo baakireera.

²⁵Bakhasi abe babaali ni kamakhula mu bye khuunaba bikwaaro ni kamakhono, baareera biilayi naabi abe byeesi banabile nga mulimo bye raangi imbuusi, birandaafu ni bibesemu.

²⁶Aabawo bakhasi beesi kumwoyo kwawa, nabo baarukha tsingubo khukhwaama mu bwooya bwe tsimbusi.

²⁷Baaraangilisi baareera kamabaale ka onikisi, ni naako kakaamiliisa, nga kano ke khuuraambisa khu shikwaaro she khu ngaaki ni khu she khu shifuba.

²⁸Baareera bibiwunya bulaayi, ni kamafura ke mutaala, atweela ni bubaani.

²⁹Nashiryo, ba Isiraeli boosi, basaani ni bakhasi, babaabona bari shaabawaambilekho naabi mu myoyo kyaabwe, khuureerera Umukasya shoosi sheesi aaba waalakiile Musa khuukhola, baabireera khu bwaabwe busa, baabiwayo isi Umukasya.

³⁰Kila Musa alomela babaandu ari, “Bona Umukasya waaroboore Bezaleli umwaana wa Uri, naluundi umwitsukhulu wa Huri, uwe mu shikuuka sha Yuda,

³¹waamwitsusile ni Mwoyo wa Wele, uwe buunyala, kamakhula ni khuumanya bye buubasi bwa buli saambo.

³²Umukasya akana Bezaleli khuukhala kamakesi ke khuukhootsa bibiindu, nga bikholebwa mu zaabu, ifeetsa ni buroonzi,

³³mu khubeetsa kamabaale kakaamiliisa, khuubeetsa bisaala, ni kimilimo kyoosi kye buubasi.

³⁴Umukasya waamuweele niye ni Oholiabu, umwaana wa Ahisamaki, uwe mu shikuuka sha Dani, likatala lye khuuleekela babaandi kamakhula kano.

³⁵Umukasya waabaweele buumanyilifu bwa buraawa buno, bubukholibwa ni baabasi, namwe babaamiliisa, namwe babaakhola bikwaaro biilayi naabi, nga bye raangi imbuusi ni birandaafu ni bibesemu, namwe babaanaba busa ni kamakhono.”